#في_علم_الغيب_3
الحلقة الثالثة
طلبت منها تعزف أي معزوفة ببالها!.. حكتلي تكرم.. ابتسمتلي وراحت طلعت آلة الساكسفون وبدأت تعزف.. كنت بحالة صدمة وألم وخوف.. المقطوعة يلي كانت بتعزفها نفس يلي سمعتها بالحلم!!!.. قمت عن الكنبة وصرت بتطلع على البيت وبفتح بالشبابيك وبتطلع يمين ويسار بطريقة مرعبة.. وكل ما تعلى النغمة أصرخ لأ ... لألأ.. لأ!!!.. صرخت بصوت عالي وتسنيم اتوقفت عن العزف مذهولة وملامح الصدمة على عيونها.. وقالت لعزة.. شو صار مع اخوكي؟!.. ليه هيك بعمل!؟.. استغربت عزة وشفت امي واقفة جنب باب المطبخ مرعوبة من تصرفاتي.. قرّبت مني وحكتلي شو صرلك حبيبي؟!.. بهاللحظة بدأت اتصرف طبيعي واضحك.. قلتلهم كيف كان تمثيلي؟!.. قدرت اقنعكم؟.. قالت تسنيم بالرغم اني ما اقتنعت وارتعبت!.. بس برافو.. طلعت ممثل كمان؟!.. صفقتلي وأنا ما قدرت أتكلم واحكي أنا ليه هيك عملت.. خفت.. خفت ينهار البيت علينا.. خفت يدخل أشخاص مو معروفين للبيت ويرشونا بطلق ناري.. أو أشوفها ميتة على الأرض.. بالأخص عند نص المقطوعة.. مكان ما بدأ الحدث بالحلم!.. بس هالشي ما صار.. فكرت وتسنيم لسه بتتكلم!.. انه هالشي ممكن رح يصير بالمستقبل؟!.. بس أنا كيف فيني أعرف الوقت يلي رح يتحقق فيه الحلم؟!.. سواء كان خلال يوم أو سنة أو خمس سنين أو عشرة أو حتى خلال دقايق!.. الفكرة صارت مرعبة أكثر.. وكل حدث عم بشوفه واقعياً قدام عيوني بأكدلي إنه حتماً النهاية رح تتحقق كمان!.. كنت حزين وأنا شايفها عم تحكي عن مستقبلها والجوائز يلي بتتخيل نفسها رح تاخدهم بعد سنين والمجلات والجرايد والمواقع يلي رح تكتب عنها.. ما قدرت اخليها تكمّل.. قاطعتها وطلبت منها تحكي عن البنت.. حكت دانيا كانت احلى شخصية بالعالم.. مو متخيلة انها تركتني وراحت.. قبل لأحكيلك أي شي!.. انت عنجد رح تكتب عنها بروايتك الجديدة؟!.. قلتلها ايوه بس لا تخافي ما حد رح يعرف انا عن مين عم بحكي والأحداث رح تكون مبهمة ومحرّفة!.. حكت أنا أرتحتلك كتير قتيبة وحبيت العرض المسرحي يلي عملته بس سمعت عزفي!.. دانيا كان عندها مرت أب سيئة جداً.. وأبوها مدمن شرب.. حكولي إنها تعرضت كتير للتنمر بكل المدارس يلي دخلتهم لأنها بنت متوحدة ومو مفهومة.. بس أنا لأني جارتها كنت صاحبتها.. البنت قلبها كتير طيب.. ويلي عرفته واقتنعت فيه بس شفت وراق علاجها إنها ما كانت مسحورة ومرت أبوها ما أذتها.. البنت مريضة نفسياً بمرض الهوس الإكتئابي الحاد.. ويلي بخلي مزاجها ينقلب بلحظة لإكتئاب حاد أو لفرح مفرط بدون سبب وأنا شفت هالشي بعيني بس خالتها كانت تخبي.. عالجوها ويمكن قطعو علاجها بسبب مصاريف الجامعة.. خالتها يلي كانت تصرف عليها بس الظاهر صار بينهم خلافات.. صارت تقول عزة.. مسكينة!.. كانت بتتأثر بكلام الناس كتير.. قتيبة كان هيك بفترة من فترات حياته بس بعدين بطّل يهتم.. ياريتها عرفته وتعلمت منه إنه إنتقاد الناس شيء لا بد منه!.. حكت تسنيم.. هاد مرض حبيبتي.. قد ما تعلمت ما فيها تسيطر على نفسها!.. أجا أخي ريان من شغله وشافنا قاعدين سلّم علينا وابتسم ودخل لجوا.. وتقريباً سمع آخر الحديث.. طلعت تسنيم من البيت وأنا دخلت لغرفتي متوتر.. اجت لعندي عزة وسكرت الباب وحكتلي انا سمعت الكلام يلي صار بينك وبين وسام.. انت بدك تضيّع نفسك وتحرق قلبنا عليك!.. تغيير شو يلي بدك تعمله!.. انت مو عارف لوين بروح أي واحد بفكر بهيك تفكير!!.. قلتلها عزة لو حد عرف بهالموضوع أنا رح أزعل منك كتير!.. أنا بحياتي ما زعلتك بس لو حد عرف رح أزعلك!.. قالت انت فعلاً رح تزعلني ورح تزعلنا كلنا!.. انا رح ابعدك بس ما رح أفضحك لا تخاف.. حكيتلها أنا أصلاً خايف.. انتو مو ملاحظين انو تصرفاتي صايرة غريبة!.. مو ملاحظين عليّه شي غريب؟!.. حكت صح.. قلتلها أنا عم بحلم أحلام بتتحقق.. وسألت مفسر أحلام اليوم وقلي إنه في ملائكة عم تحاول توصللي رسائل وعم تيجيني بالحلم وتفتحلي أحداث رح تصير.. حلم مبارح كان حرب وصاحبتك يلي كانت هون هيه كانت بطلته!.. ماتت قدام عيوني تحت انهيار بيت.. وجريمة الإغتيال شفتها قبل ساعات بالحلم وانتحار دانيا كمان.. كان مشهد مفصّل قدام عيوني!!.. ضحكت عزة وقالت عم تحاول تلهّيني عن المهم لتنسيني موضوعك.. بدك تنسيني انت شو عم تعمل بهالكلام هاد!.. قلتلها وفزعي بالليل وطلبي إنو هالبنت تيجي على البيت.. هاد تمثيل؟!.. صفنت فيني بدون لتتكلم وقالت قتيبة لا تفكرني غبية.. لمحت عيني على المكتب وشفت جنب كتبي المصفوفين فوق بعض ريشة صغيرة.. قلتلها لفّي راسك وشوفي شو في على الكتاب.. قالت ريشة!.. شو قصة الريش عندك بالغرفة؟!.. قلتلها وجود الملائكة.. ما بعرف شو رح يوصلولي اليوم بالليل.. بس هاد دليل قاطع لتقتنعي.. بقسملك إنه الريش ما عم يتركني بالغرفة.. أنا قرأت اليوم عن الموضوع بهالكتاب.. وجود الريش من وجود الملائكة!.. شفتها ارتبكت وخافت وصارت تتطلع على الغرفة.. وحكت خلص ما تكمّل.. أنا طالعة وأجّل الكلام.. طلعت من الغرفة وما كنت عارف انا ليه حكيتلها.. كان غلط أو صح بس ما قدرت أخبّي.. اتصلت مع بنان وقلتلها انا بعتذر على اسلوبي السيء.. حكتلي إنها مو زعلانة بالعكس عارفة انك بتحبني وكنت رح تعتذر!!.. كنت كرهان صوتها.. أوقات بننخدع بالناس.. من أول لحظات التعارف بنفكرهم بشبهونا بس لما نتعمق فيهم ونعرفهم من جوا وبشكل أقرب بنندم على كل كلمة حكيناها معهم.. حتى السلام!.. قالتلي بكرا وين رح تغديني؟.. رح استناك لتخلص محاضرات ونطلع سوا لا تهرب مني!.. قلتلها حكيتي لحد عن الموضوع؟.. قالت ما تخاف قتيبة أنا مو حقودة.. وكنت بعرف انك رح ترجع.. ما حد عرف إلا أختك.. ويمكن ما تصدقني لأنها بتحبك وبتصدقك شو ما حكيتلها.. قفلت المكالمة ومسكت ورق وصرت بكتب أفكار مبدأية للرواية.. بتتكلم عني وعن حياتي بطريقة مبهمة مش مفهومة.. قلبي كان يدق مع كل كلمة بكتبها وبتطلع حواليه.. فتحت باب البرندة.. كان غروب وبرد بداية الشتا.. كل كلماتي كان نهايتها علامات سؤال.. ماذا الآن؟.. ما الذي سيحصل؟.. من سأرى؟.. ما سوف يحدث؟.. هل أحلامي جميعها ستتحقق؟.. اتصلت بالرقم يلي اعطاني ياه نوراني وحسيت إني لازم أجرّب الشي يلي حكاه!.. انا فعلاً جواتي طاقة سلبية.. كره وبغض ويمكن ملل وضجر.. ردت بنت وحكيتلها حابب أعرف أكتر عن هالنوع من الجلسات.. حكت جلسة طبيعية مدتها ساعة.. في ناس كتير بتتشافى منها نفسياً.. يعني فيك تعتبرها جلسة راحة واستجمام.. عقلك بصفى وجسمك برتاح وروحك بتتفتح!.. حتى في ناس بسببها صارو أكتر وعي وبياخدو قرارات مناسبة.. فيك تقول بصيرتهم والعين الثالثة عندهم انفتحت.. بس لازم تكون متهيأ جسدياً لإلها.. قلتلها هالوقت مناسب؟.. حكت انت نفسياً جاهز؟.. وصلت المكان وما كانت من اهتماماتي هيك أماكن أبداً.. بس كان لازم أجرّب وأسمع نصيحة نوراني.. سلّمت عليه وقالتلي أنا هند.. أنا رح أعملك الجلسة.. تفضل.. قلتلها شو يعني ريكي؟!.. قالتلي كلمة يابانية مكونة من مقطعين.. ري.. الطاقة الكونية.. وكي.. الطاقة الشخصية المنبعثة من جميع المخلوقات ويلي بتمدها بالحياة.. والعلاج بكون وصول للتوافق بين الطاقتين!.. قلتلها راسي مصدّع.. قالت هلأ رح تشوف السحر.. نام واسترخي.. حطّت إيدها على وجهي ورفعتلي راسي لورا.. حسيت بإسترخاء وهدوء تام.. وراسي بدا يصفى.. كانت بتشبه جلسات المساج لكن بطريقة غريبة!.. من شدة الهدوء والموسيقى الخافتة خلال أقل من نص ساعة نمت نوم تام.. بعد انتهاء الجلسة فتحت عيوني بقوّة.. اتطلعت عليّه وقالتلي شو حاسس؟.. صرت أبكي.. استغربت منّي وحكتلي أستاذ قتيبة شو في؟.. طيب ابكي وريّح نفسك هالشي طبيعي وممكن يصير.. صرت أحكي لأ يالله!.. لأ!.. حكتلي مين خنساء؟.. قلتلها مين؟.. حكتلي أنا بسألك مين؟!.. بتقربك؟.. حبيبتك؟.. امك؟.. مين؟.. قلتلها اذا انتي بتعرفي أنا بعرف.. احكيلي كيف كانت ملامح وجهي وأنا تحت الجلسة؟.. قالت لأول مرة بحياتي كلها بستغرب من مريض!.. انت في شي فعلاً عم يأثر بحياتك.. الموضوع نفسي!.. قلتلها شو سمعتيني بحكي؟.. قالت سمعت بعض الكلمات يلي كنت تحكيها.. كررت إسم خنساء.. وحكيت أمي إهزمي المرض وعيشي.. وانت واحد نذل ومو أخو!.. وملاكي ما تتركني.. وخدي إبنك وسافري أنا رح أموت هون.. ونسيت شو لسه!.. ممكن تفسير لكلامك؟.. حكيتلها أنا يمكن مريض نفسياً.. قالت و ليه ما شفت دكتور نفسي؟.. هاد علاج بديل بتعمله وبعدين يمكن ترجع تتعب.. بس العلاج النفسي ضروري!.. حكيتلها يمكن أرجع لهون ما بعرف متى بس شكراً عكل شي.. صرت أبكي وما قدرت أقوم.. قالتلي لأ الموضوع باين فعلاً صعب.. انت شو شفت احكيلي.. أوثق فيني.. أنا شكلي مريح صحيح؟.. شو شفت؟.. قلتلها بهالساعة انكشفلي كل شي.. شفت مستقبل عيلتي ومستقبلي لبعيد كتير.. حكتلي يعني شو أفهم؟!.. لتكون عم تتوهّم.. حكيتلها لأ.. مو وهم أنا أحلامي تحققت.. أمي رح تموت ويمكن هالشي قريب.. وبابا كمان.. واختي رح تسافر سفرة طويلة مع إبنها.. كنت بودعها وأنا حاسس إني ما رح أشوفها كل حياتي الباقية.. نهايتنا صعبة.. خنساء مين ما بعرف بس هيه بنت قالتلي اشفى لنتزوج.. ولو رحت بحياتي ما رح اتزوج.. لأول مرة بحس إني فعلاً عم بحب!!!.. هاد الشعور يلي كنت بستناه من سنين.. حسيته اليوم وأنا نايم.. بترجاكي آنسة هند كيف فيني أنسى يلي شفته.. المستقبل صعب كتير وكله خراب.. عدا عن مشهد شفته ركبلي الجزء المفقود من الحلم الماضي.. حكتلي شو هوه!.. قلتلها ما فيني أقول.. صعب صعب!.. حكت بس أنت وثقت فيني وحكيت.. قلتلها بهيك أمور ما في ثقة.. ما بعرف اذا كلامي هون ممكن يكون مسموع!.. حكت ما في حد تعال شوف بنفسك الممر فاضي.. بس خلص متل ما بدك.. انت انفتحتلك العين الثالثة وبسرعة قصوى.. وشفت أشياء يمكن ما كان لازم تشوفها.. بس يمكن تهيؤات.. قلتلها تمام هوه هيك!.. انا بدي امشي.. وين بحاسب؟.. حكت برا.. طلعت بسرعة ودفعت الحساب ومشيت.. اتصلت مع وسام.. رد عليه.. صرت أبكي بالشارع واحكيله شفت كل شي.. قلي ليه بتبكي؟.. حكيتله شفت مستقبلي ومستقبل عيلتي شفت تفاصيل كتير.. وأنا لسه بحكي معه ودمعتي بعيوني شفت ريشة طايرة بالسما.. وبقيت تطير لوصلت لإنارة الشوارع العالية.. الناس كانو بتطلعو عليّه بإستهجان.. إنه هاد مجنون؟!.. ووسام حكالي اجي هلأ على بيتكم؟!.. قلتله اسبقني.. كان المركز بمنطقة بعيدة.. وتخيلاتي يلي شفتها بالحلم كنت عم بركبها بخيالي بالطرقات وأشكال الناس.. أنا لازم أنقذهم من يلي بصير.. لازم أعمل شي!.. يلي شفته صعب.. السنين الجاية صعبة كتير!.. بعتتلي عزة رسالة بعد نص ساعة.. قتيبة وينك وسام هون.. وصلت البيت.. امي كانت بتجهز العشا وبابا بصلّي.. وريان مبسوط وبحكي لوسام إنه إنقبل بالجامعة يلي بده ياها لدراسة الدكتوراة بمجال الهندسة.. فاتحين على محطة إخبارية وبيحكيلو عن الإنتماء للوطن وإنه ما اختار يسافر لبرا بالرغم إنه مقبول بجامعات اوروبا بس بقي يحاول بوطنه لنقبل.. امي حسّت انه فيني شي وقالتلي ليه عيونك حمرة؟.. حكيتلها ما في شي يمكن اخدت برد.. خافت وحطت إيدها على راسي وقالتلي عليك سخونة.. تعال تعشى لتاخد الدوا.. قلتلها بدي احكي مع وسام شوي.. قالتلي هلأ كُل بعدين بتحكو!.. قلتلها بعد شوي حبيبتي مو قادر.. أصرّت لأكل واخد الدوا.. وأنا صرّخت وقلت بعدين!!.. بابا استغرب وقلّها اتركيه.. دخلت مع وسام.. قلي ليه هيك كسرت بخاطر امك؟!.. شو في شو صار معك!.. قلتله عملت الجلسة يلي حكا عنها نوراني.. وياريتني ما عملتها.. قليّ بهدوء.. وشو شفت!.. قلتله هالبلد رح تتدمر.. وأهلها رح يتهجّرو.. ونص مواطنينها رح ينقتلو.. ما رح يصير تغيير ولا أي شي.. مستقبلهم خراب.. نحنا ليه بنتعب حالنا؟!.. عشان شو؟!.. عشان نموت!!!.. قلي انت شو عم تحكي!.. خلص لهون وبكفي.. مو لازم تصدق كل شي بتشوفه!.. قلتله تسنيم رح تموت بالقصف.. اجت عنا وعزفت نفس المقطوعة يلي سمعتها بالحلم.. هلأ عرفت شو رح يصير معها.. واخوي رح يخونّي ويخرّب مستقبلي.. هاد يلي جوا مبسوط بنجاحاته.. واختي رح تسافر وما بعرف شو نهايتها هيّه وابنها.. أما أمي رح ياخدها المرض قبل كل هالأحداث.. رح تتركني.. صرت أبكي.. وهوه حكالي وإذا ما صار شي من هاد!.. قلتله رح يصير.. الملائكة عم تفتحلي أحداث المستقبل.. شفت نص أحداثه بالتفاصيل.. حاسس راسي رح ينفجر.. الليلة ما فيني أنام.. قلي هلأ مو مفروض منك تفكّر.. بس سؤال صغير جاوبني عليه ووقتها رح نطلع من هون.. قلّي شو السنة يلي رح يصير فيها الحرب؟.. قلتله ما بعرف.. حكالي وانت ناوي تبقى تفكر لوقت غير معلوم الله وحده يلي بعرفه وتضل على هالحالة؟!.. حكيتله بعرف صعب بس صار عندي فكرة مسبقة عن كل شي بده يصير.. ليه ما نكون جاهزين ونقلب مخططاتنا؟.. اذا الحياة خربانة وخربانة.. ليه ما نخربها من هلأ!.. صرّخ بصوت واطي وقلي مجنون!!.. بدك نثور ونشتغل عالمفضوح.. انت عارف شو ممكن يصير؟.. قلتله عرفت شو رح يصير وما رح يهمني شي!.. حتى الناس يلي رح تبقى معي للآخر صرت عارفهم.. او عندي فكرة مبدأية عنهم.. حكالي شو يعني عم توجّهلي كلام؟.. يعني أنا رح أتركك واتخلى عنك!.. قلتله مو متأكد.. خلينا نتعشى.. ما فيني أزعّل أمي أكتر من خمس دقايق.. حكالي وقف شوي.. تذكرت شي.. مين خنساء؟.. قلتله خنساء أول حب بحياتي وآخر حب.. بتتذكر بس قلتلك الملاك شو قلي؟.. هلأ عرفت شو معنى جملة تلات كلمات بكل كلمة همزة وبكل يوم حدث.. خنساء هيه أول كلمة فيها همزة.. بقي كلمتين ولو فكرنا كويس بأحداث الحلم رح نكشف كمان كلمات.. بس رح أخليهم لوقتهم للليالي الجاية!.. قلي يعني أفهم انك بطلت تخاف من النوم أو الأحلام؟.. قلتله بعد يلي شفته اليوم بجلسة الطاقة ما عاد يخوفني شي.. ولو بدي أشوف نفسي ميّت!.. ما في أصعب من أنك تشوف حياتك الجاية من دون يلي بتحبهم.. من شدة حبي لإلهم.. فكرة غيابهم كانت قالقيتني من زمان كتير.. ما كنت بعرف كيف رح يجي يوم واتحمل حياتي بدونهم.. بس لمّا عرفت يمكن صار في نوع من الراحة.. فعلاً إنه نهاية القلق راحة!.. طلعنا نتعشى.. بابا فتح سيرة دانيا وصار يسأل عن السبب يلي خلّاها تعمل هيك.. امي حكتله يلي قالته تسنيم.. وعزة قالتله عن مرضها النفسي.. شفت بابا ارتبك وتشردق بالأكل.. وسام حس إنه ملامحه تغيّرت.. وأنا كنت بسأل نفسي بابا ليه ارتبك!.. قام عن الطاولة وريان غيّر الموضوع.. فجأة اندق الباب.. راحت عزة فتحت الباب.. سمعت صوت ود بتصرخ وبتقول الحقيني عزة في واحد حاول يفتح باب بيتنا ونحنا لحالنا.. ولمّا اتطلعت من عين الباب شفت واحد مسلّح.. وبس سمع صوت البيانو عرف انه في حد بالبيت وهرب.. شفته عم يطلع من باب البناية!.. لحقوه بسرعة قبل ليبعّد
يتبع..
