زواجك بالاكراه وعلاجك قدري ( صكر الصخرة)

الفصل الثاني عشر

انت مثل المستنقع تجر كل من يلمسك الى الاسفل .. تجعل كل من حولك يصبحون مثلك .. نصيحه مني ..اذا فكرت ان تحب لاتفعلها .لانك تقتل من تحب ايضا
..........

كان لازم صكر يبقى بالمستشفى على اقل تقدير اسبوع كامل ..وجان لازم يسوي علاج طبيعي همين لان اثرت الضربه على رجليه ولو قليل لكن اثرت بشكل ما .. هو متحمل ان يبقى بالمستشفى يوم واحد وحتى عمليته جانت خطرة لكن هذا صكر محد يكدر يضبطه .
اهتمت بيه هند هوايا ..وجابوله جهاز للمشي حتى يتمرن عليه والايام عدت بسلاسه ..لكن قرب هند من صكر خفف من حده المشاحنات بيناتهم ..
علي راد يجي لكن لان مشغول بمرته حجا وياه صكر وكله لاتجي هسى لحد ماتهدى الامور .. وبهيج قرر علي يستقر ببغداد لان خلصت اوراقه وكاعد مرتاح ببيتا الجديد وبعدين يجي يشوف اخوه ويجيب مرته وابنه ..
جانت حليمه تعتب على علي لكن صكر جان يسكتها ..
فد يوم جانت حليمه ونضال كاعدين دايسوون معجنات بالمطبخ وسميه طالعه ويا يمامه داتجهز جان على الاساس عرسهم هالاسبوع لكن اجلوه لحد ميصير صكر زين ..
فدخلت هتد حتى تاخذ مي لصكر .. صاحتها حليمه ..
اجت هند وكعدت بصف نضال .. فكالتلها حليمه.

حليمه .. يمى بنتي ..مصار المجال حتى اتشكرج بالي سويتيه لابني .. ادري انت اجيتينا بضروف مو طبيعيه بس والله اني حبيتج وتمنيت ابني ينسعد وياج .. حتى لو جنت مرات اضوجج بالحجي

هند .. شكرا .مصار شي . بس اني سويت هذا لانه جزء من شغلي .. مو علمود فد شي ..

حليمه ..حتى لو .. انت رديتي ابني الي سالم ..لو تردين روحي انطيج

هند... شكرا ام صكر. الله يخليكم لبعض .. اكوم انطي الدوا لصكر ..تسمحولي ..

هند راحت اندارت نضال لحليمه وكالت ..

نضال .. لو ما هند ..جان مات صكر .. والله هالبنت كل هالظلم الي شافته اهنا ..وانقذت حياة صكر. .

حليمه .. عيني نضوله .. هذا صكر محد ميكدر يوكف اكباله وميحبه ..اكيد حبته ..

نضال ..معقوله .. يمعوده جان حسها يجي مرات اسمعه بين الكلمه والثانيه اتكله اكرهك

ضحكت حليمه وكالت . الايام راح تثبتلج .. مشفتي خوفتها بعيونها عليه ..

نضال ..الله يهديهم ..

ورجعو يكملون الي بيدهم .. اهنا هي دخلت داتودي المي لصكر حتى يشرب ادويتا وبعدين اتظمد جرحه

هند .. هاك صكر. .اخذ هذا الدوا ..

اخذه من ايديها بدون ميحجي ..بعدين اندار لان راح اتغير الضماده .. شالت القديمه وعقمتها بالمعقم ..جانت مستغربه من قوته ..وتحنله للالم وكالت

هند .. ميوجعك من اخلي هالمعقم القوي على جرحك

صكر .. بلي يوجع