زواجك بالاكراه وعلاجك قدري ( صكر الصخرة)

الفصل الخامس عشر

مااصعب ان يعيش الإنسان في غموض كبير ..داخل حلقه من الاوهام والاكاذيب .. يُنسج داخل سر اذا باح به يتكسر كل العالم من حوله
................

في بيت العائله الجبير كاعدين الكل على الريوك ماعدا بالطبع صكر وهند لانهم مجانو بايتين بالليل بالبيت ..
اما البقيه فجانو موجودين كلهم حول الميز مال الاكل .. الكل انجمعت على تتريك ...بين ماصبو الجاي .. حجا الشيخ حجايه ..

جاسم .. بما انه الكل متجمعين تقريبا .. راح نتوكل ونعلن على موعد عرس سجاد من يمامه الي هو الجمعه الجايه ياذن الله ..

الكل ابتسمت موافقه الا يمامه جانت ضحكتها مصطنعه .. بعدين اندار الشيخ على علي وكال

جاسم .. علي .. بعد السوايه الي سويتها من وراي سامحتك ..والعشيره كلها عذرتك وقدرت فعلتك الرجوليه .. بس مو معناها انه موافق اتروح لبغداد وتبتعد عنا .. لازم ترجع اتعيش ويانا

ترك علي الاكل من ايده وباوع بفرحه وهي جانت متوتره وكال .

علي .. بويه .. اشكركم كلكم ..اولا لانكم اتقبلتم زواجي وزوجتي . لكن شغلي مااسمح لاي احد يدخل بيه .. كم مره عدتو هالموضوع ماتعبتو وارد نفس الجواب. اني مراح اغير مكان تعيني .. وهذا اخر كلام عندي ..

جاسم .. شكلك اتريد تتمرد .. بس مو عليْ مو تتمرد على ابوك ومدينتك

علي .. بويه هذا قراري وحياتي .. مثل ما اني مااداخل بقراراتك وحياتك ..انتم هم لازم تتفهمني

جاسم صار عصبي وكال .. انت منو حتى تدخل بقراراتي ها ..ولك انطيتكم عين اكثر من الازم ..

اداخلت سميه مثل الحيه الي تبخ سم وكالت .. اشفنا منكم ياولاد حليمه غير التمرد والعصيان اذا انت لو صكر

باوعت بيها حليمه بحقد جيف تحجي على اولادها وشافت جاسم صار عصبي اكثر من لدغته سميه ..
راد يكوم .. لزمته حليمه وباوعت بيه بكسره وكالت ..
حليمه .. عوفه .. خلي يجرب بغداد .. وعود بعدين يغير رائيه ..

قاطعهم سجاد وكال .. خليه بويه براحته .بعدين من يتندم يرجع .. المهم راح تبقى لعرسي غير

هز براسه علي ..ب اي .. لكن جاسم مكمل الريوك كام ولحكته حليمه علمود اتهدي بيه .. اما نضال فاخذت شبل بحضنها علمود فرحه تاكل .. وحنين فرحانه بعرس اخوها ..
من طلعت حليمه ورا جاسم كالت .

حليمه .. على كيفك وياهم للولد ترى مو صغار هيج راح تخسرهم .. سايسهم وصادقهم حتى يطيعوك

جاسم رد باستهزاء وكال .. مثل ماسويت ويا صكر ..وشوفي النتيجه. من يوم التزوج واحنا منشوفه مثل اوادم ..حتى شغله تاركه .. الي مايسمع كلامي هاي تاليتها .. علي وصكر انفلتو من ايدي ..

حليمه .. لاتكول هيج .انت الخير والبركه .. بس استحمل شوي همين وروح وياهم لنهايه الطريق .. وتاليها حيرجعون الك وين يرحون ..اول وتالي مرجعهم الصخره وانت