إيطاليا
سافرت عليا إيطاليا للعمل وسافر _جو_ علشان حفله هيقيمها هناك ونزلوا فى نفس الفندق لكن متصدفوش ولا شافوا بعض, فى يوم مي راحت لعليا غرفتها :
_ انا زهقانه يا أخت عليا
_ انزلي قولتلك
_ لا مش كل مره بقي , انزلي معايا مش طالبه انزل لوحدي
_ انتى مبتزهقيش كل مره اقولك مش بحب التنطيط
_ لا مبزهقش علشان أوقات بيأثر زني عليكي , طيب بصي أعزميني ع العشا ونسهر برا
_ سهر ,, دا انتى طموحة
_ يا عسل ,عليا متبقيش رخمة بقي , راحت فين عليا اللى كانت بتتنطط فى كل مكان وانا البرطه بتزقيني نخرج ونروح ونيجي, ايه قلبان الحال دا وقت ما اتلحلح انتى تبقي بروطه
_ انا ببقي عاوزة اقعد فى هدوء علشان اركز فى الشغل
_ علشان خاطري بقي يا عليا , لو منزلتيش معايا هصوت وهتقمص شخصية المجنونه وهقولهم انك خطفاني .. ايوه بأرادتي بس خطفاني بقولك اهو
وافقت عليا تنزل مع مي , وكان مصطفي معين حراسة ترافق عليا وبالاخص لما تكون خارج مصر , اتجهوا لمطعم والطقس كان جميل , طلبوا العشا وقعدوا يستمعوا للموسيقي :
_ ايه يا مي , انتى سخنه حبيببتي
_ بعد الشر عني ,, بس ليه ؟
_ مختاره مكان هادئ بعيد عن الدوشة
_ ماهو علشانك, علشان اعرفك ان أختياراتي فى الجون مش زى ماانتي فاكرة
_ يارب دايما إختياراتك تفلح كده
_ يارب يا عليا يارب
رن موبيل مي وقامت ترد عليه بعيد , فى نفس التوقيت دخل المطعم _جو_ واصدقائه , وهو داخل لمح عليا وقف مكانه فقرب له صديقه حركة وشاورله ع الطاولة بتاعتهم, قعد وفضل باصص عليها يشبه عليها :
_ مالك يا جو عينك على الترابيزه دى
_ انا شوفتها قبل كده
_ يابني ماانت بتشوف كتير فى ايه
_ يلا اطلب الاكل يلا
قعد واستمرت نظراته لعليا يحاول يتذكرها , قرب الويتر وبينزل الاكل ع الترابيزه تذكر عليا وخبط ع الترابيزه مما افظع الموجودين :
_ فى ايه ؟
- افتكرتها .. افتكرتها الانسيال
_ بتقول ايه ؟
قام وقف وحط ايده فى جيب البنطلون وطلع الانسيال, كان محتفظ به فى جيبه لمده 7 شهور , بص ل الانسيال وأبتسم : صاحبتك ظهرت أخيرًا
خلصت مي مكالمة التليفون ورجعت ل عليا , الاكل نزل وهما قاعدين لمحت مي تجمع عند طاولة قريبة منهم , فضولها خلاها تركز يكون حد مشهور , واتفأجات ب جو :
_ الحقيني يا عليا
_ فى ايه ؟
_ حبي الاول رقم 501
_ ماله مات ؟
_ بعد الشر .. هنا موجود هنا
_ معلش يا مي ,, مين حبك الاول رقم 501 ؟
_ جو, قائد الفرقة الموسيقية اللى انا فان ليها, اللى كانت فى الحفله اللى فى لندن وبعد ما حجزت تذاكر رجعنا ومحضرتش .
_ انا مش فاكره ولا فاهمه انتى بتقولي ايه ؟
_ ولا هتفهمي اللى حساه, انه موجود هنا بلحمه وشحمه
_ طيب انتى عاوزة ايه مش فاهمة ؟
_ اروح اكلمه , اخد منه اوتغراف و نتصور
_ انتى بتتكلمي بجد؟
_ ايوه ..
_ مي انتى قريب هتقابلي حبك رقم 502 قريب وهتنسي رقم 501
_ يعني اتماسك
_ ايوه خليكي تقيله
_ انتى صح ,,
وهما بيتكلموا قرب منهم جو وقفه صاحب المطعم وطلب منه ومن فرقته يغنوا اغنية , واول ما اعلن صاحب المطعم بفقرتهم فرحت مي جدًا , عكس عليا مهتمتش . ابتدت الفرقه فى العزف وغنوا اغنيه من أغانيهم, كانت مي سعيدة جدًا ومندمجة معاهم , خلص اغنيته واتكلم جو وقال :
_ الاغنية اللى هغنيها دى أهداء مني لكل شخص عربي موجود هنا او هيسمعني . لان أصولي عربية ف حاسس برغبة كبيره اغنيها , ابتدا يغني اغاني مصرية ونالت أعجاب الموجودين وتفاعلوا معاها , ولما ابتدا يغني عربي لفت انتباه عليا وبصت عليه وصادف انه كان بيبص عليها , ورجعت بصت قدامها , وسط تحيه الموجودين شكرهم _ جو_ واتجه لطاولة عليا ومي, ومي شافته بيقرب عليهم وقلبها بيدق ولسه هتتكلم كان وصل عندهم :
_ مساء الخير
_مساء الخير
_ انا اسف ع تطلفي والازعاج بس ممكن تسمحولي 5 دقائق من وقتكم
لسه عليا هترد ردت مي : أتفضل طبعًا يا جو
ابتسم ليها : انتى تعرفيني
خرجت الموبيل : صورك معايا فى كل مكان انا فان لك
_ فرصه جميلة
_ والله مافي اجمل منك
_ نعم
اتكلمت عليا : سوري مي بتحب تهزر
_ اسمك مي ,, اسمك جميل
_ ايوه انا مي وهي عليا
وبطريقه غير مباشره ابتسم لانه عرف أسمها :
_ عليا اسم جميل
_ ايوه اسمانا جميلة
_ وانا يوسف لكن أصحابي والكل بيقولولي جو دا طبيعي لانى حياة عمري كله فى أوروبا , انا مطرب فرقة غنائية بسيطة بتقدم جميع أنواع الاغاني والموسيقي
ردت مي : حفاظم اغنيه اغنيه
_ وعليا ؟
_ لا عليا ملهاش فى الميوزك اوي غير الاغاني القديمة دا لو هتسمع غير كده لا , لكن انا مدمناك وفرحت جدًا انى سمعتك لايف أخيرًا بعد ما فشلت محاولتي المره الاخيرة , تعرف انا حجزت تذاكر لينا لكن للاسف رجعنا مصر واتجمعنا فى الصدفه الجميلة دى
_ احنا اتقابلنا قبل كده
_ فين دا
نظر الى عليا : احنا اتقابلنا مرتين فى لندن من 7 شهور
ردت مي : عليا .. فين ؟
_ مره فى الجيم ومره ع البول
ردت عليا: انا مش فاكره , انا بسافر كتير ففى تفاصيل بتقع مني وانت بتتكلم من 7 شهور
مي ادخلت : لا عليا ذاكره الماضي عندها فى الباي باي
نظر اليها يوسف: فى حاجة ضاعت منك فى الفندق ؟
_مش فاكره
_ عليا ,, مش قولتيلي ان الانسيال الفضه وقع منك
_ ايوه لكن مش فاكره وقع فين
_ انسيال فضه ؟
_ ايوه هو دا وفيه حرف ايه
ردت مي: معقوله معاك ؟
- احتفظت به قولت ممكن صدفة اقابل صاحبته وارجعه ليها تاني
_ ايه الصدفه دي بجد
فرحت عليا بالانسيال : بجد شكرًا انك حافظت عليه المده دى كلها
اتكلمت مي: عليا كانت مضايقة فتره وزعلانه انه ضاع منها
_ هو معاك
حط ايده فى جيب البنطلون وبعدين تراجع :
_ ايوه معايا فى الفندق اكيد مش هيكون فى جيبي معرض ان يضيع فى اى لحظة , عمومًا انا ممكن اجبهولك مكان ما انتي موجوده
_ لا متتعبش نفسك عرفنا انت فين وهبعت حد ياخده منك
ابتسم ليها : يعني بالذوق بتقوليل مش هعزمك على فنجان قهوة
- لا ابدًا ازاي تقول كده
تدخلت مي: احنا موجودين فى فندق رويال وقاعدين أسبوع وهنرجع مصر
قرب شخص من اصدقاء يوسف وقاله انهم هيقوموا
_ طيب انا هستأذن دلواقتي وبكره الصبح الساعه 11 هكون عندكم دا لو ينفع
فتحت مي الموبيل تبص ع المواعيد : لا فاضين هنستناك نفطر مع بعض انا كده كده بصحي متأخر
ابتسم ليها يوسف: اتفقنا
بص ل عليا : فرصة سعيدة
_ انا الاسعد
اتحرك خطوتين ورجع : ممكن الموبيل علشان اعرفكم لما أوصل الفندق
مسكت موبيله مي وسجلت رقمها : دا رقمي
كان يوسف عاوز رقم عليا لكن ابتسم ل مي: تمام,, اشوفكم الصبح
اتحرك يوسف وخرج مع أصحابه من المطعم ونظرت عليا ل مي بغضب : ايه اللى عملتيه دا ؟
_ عملت ايه ؟
_ انتى ناقص تقوليله عنوانا فى مصر
_ المره الجايه
_ لا بجد ليه كده, كان اى حد يروح يقابله ويجيب الانسيال لينا
- وفيها ايه يا عليا , الراجل يكرم قال هيجي لينا , بقولك ايه يا لولي دا حبى الاول
_ رقم 501 ,, يارب صبرني ع ما اصابني
- يارب اللى اصابني يصيبها يارب
_ الناس بتكبر تعقل انتى بتكبري تتهبلي
_ سبتلك العقل والرزانه ووش الخشب اللى مصدراه لخلق الله
_ يلا بينا نرجع الفندق يلا , وابقي قابليني لو سمعت كلامك تاني وخرجت معاكي
ضحكت مى : برضه بتحبينى وهتنزلي معايا لولى
رجعت عليا الفندق ودخلت غرفتها ورن موابيلها كان مصطفي :
_ وحشتيني
_ وانت أكتر , عامل ايه يا حبيبي ؟
_ انا بخير وانتى
_ الحمدلله , لسه راجعه من برا كنت بتعشي انا ومي برا
_ خرجتوا , دا واضح ان زن مي كان ليفيل الوحش انهارده
_ مسبتنيش غير لما انزل معاها
_ بس كويس انك نزلتي تغيري جو وتكسري الروتين المعتاد بتاعك
_ ايوه شويا ..
-تعرفي انك وحشاني جدًا
_ حبيبي كلها اسبوع اخلص الشغل هنا وارجع
_ اليوم اللى مبشوفكيش فيه بالنسبالي سنه
_ خلاص تعالي انت
_ لا هستناكي علشان اوحشك اكتر
_ امم ماشي
_ هتعملي ايه ؟
_ هنام
_ طيب ممكن تكلميني قبل ما تنامي
_ حاضر
قفلت معاه التليفون وقعدت اخدت نفس وقامت دخلت الحمام تاخد دش ورجعت تنام واتصلت ب مصطفي واتكلموا شويا وقفلت ونامت .
يوسف قاعد مع اصدقائه فى مقهي وكان سرحان وقفشه صديقه :
- ايه الابتسامة دى يا جو
_ لا متركزش معايا
_ لا بجد فى ايه ,, باصص ل الانسيال ومبتسم
_ عارف يا بيل , انا عمري ما بصدق فى حوار الصدفة دا, الا من 7 شهور
_ صاحبه الانسيال
_ ايوه قابلتها 3 مرات صدفه , وكل مره احساسي مش عارف اوصف , انا كان معايا الانسيال وقولتلها انه مش معايا علشان اشوفها الصبح علشان اعرف هى نازله فين
_ ايه اللى بسمعه دا, انت يا جو, دا اعجاب من أول مره ولا ايه ؟
_ مش عارف بس حاسس انى سعيد
_ معاك رقمها بقي
_ للاسف لا معايا رقم صديقتها , صديقتها مسمحتليش بفرصة, هى فان لينا من زمان وانت عارف المعجبين لما يقابل فنانه المفضل .
_ طيب ايه
_ مش عارف ؟
_ طيب خلي بالك يا جو مش كل البنات سهله وغير كده انت عندك مشاكل فكر فيها الاول وأولهم السيد الوالد اللى زهقني من كميه الناس اللى بيبعتهم علشان يقولولي أقنعك ترجع الشركة وتبطل لف وسرمحه فى الشارع
تغيرت ملامح يوسف: هو دا وقته اقول احساس مش فاهمه تقولي ابوك وشركة
_ ماهو دا واقعك يا جو قولت افوقك
_ المهم دلواقتي ترتيبات الحفلة بتاعت بعد بكره تمام ولا فى مشاكل
_ بكره فى بروفه وكله تمام
يوسف جاتله فكره : عاوزه أطلب منك طلب
_ خير ..
_ هقولك .
فى اليوم التالي عليا كعادتها صحيت بدري واتجهت للجيم وبعدها فطرت ورجعت غرفتها , ع حدود الساعه 9 خبطت باب غرفتها ودخلت مي :
_ ايه النشاط دا
_ عاوزه اقولك انا صاحيه من 6 الصبح
_ يااه , طيب ليه منزلتيش معايا الجيم وفطرنا سوا
_ كنت بجهز مش فاضيه
_ تجهزي ازاي يعني مش فاهمه ؟
- كنت بشوف هلبس ايه وعملت ماسك كده علشان بشرتي تبقي منوره كده
_ ودا ليه ؟
_ هو انتى مش معانا ولا ايه , اعتقد كنتي قاعده معانا امبارح وسمعتي بنفسك الساعه 11 يوسف هيبقي هنا
- وهل دا مبرر لكل اللى بتعمليه دا , داانا ولا مره بتصحي تفطري معايا
_ يا لولي انتى معايا ع طول لكن جو دا امنيتي اقابل
- حبك الاول رقم 501 عارفه
_ سبيني بقي استغل فرصتي
_ طيب يا مستغله فى مواعيد انهارده
_الساعه 1 والساعه 6
_ تمام
_ يلا اجهزي بقي علشان ننزل
بتصت عليا ع الساعه : الساعه 9 ونص هننزل نعمل ايه دلواقتي مش قولتي الميعاد الساعه 1 و6
_ مش دا يا عليا ركزي علشان خاطري , يوسف هيجي الساعه 11
_ الساعه 9 ونص
_ مااحنا ننزل افطر نشرب حاجة نستناه كده يعني
_ مي ..
_ مفيش مي بقي نفسي متطلعيش عيني
_ انا هنام شويا , ابقي انزلي انتى قابليه وهات الانسيال منه
_ ياريت بس ذوقيًا لازم انتى تاخديها دا جايلك لغايه عندك
_ طيب افرضي مجاش هننزل نستناه خلينا هنا مرتاحين
_ يعني هو ممكن ميجيش
_ ممكن جدًا , لسه محسساني انه انتيمك بطلي هبل بقي
_ ماشي
وهما فى الغرفة رن موبيل مي من رقم ردت وكان يوسف وعرفها انه فى اللوبي منتظرهم , قفلت التليفون وبصت ع الساعه :
_ الساعه 10 ونص جيه قبل ميعاده بنص ساعه ,, يلا بينا
نزلوا اللوبي ويوسف شافهم وهما بيقربوا عليه وقف وب ابتسامه استقبلهم , قعدوا وطلبوا مشروب واتكلموا :
_ اسف لو جيت بدري
_ لا ابدًا, اساسًا كان فى ناس بتقول انك مش ممكن تيجي اصلًا
بصت مي على عليا وضحك يوسف : ليه مش هاجي ؟
اتكلمت عليا : لا عادي ممكن تنشغل او يظهرلك مشوار ظرف يلغبطلك مواعيدك
_ لا انا فى مواعيدي زى السيف
_ حمد الله ع سلامتك يا سيف
ضحكك يوسف على مزحه مي واتكلمت عليا :
_ فين الانسيال ؟
بملامح زعل : انا أسف بجد
_ ضاع ؟
_ لا موجود, لكن لما وصلت بصيت ع العلبه فى العربية اللى حاطط فيها الانسيال مش لاقيتها , صديقي ادم كلمني وقالي انى نسيتها فى الفندق
_ هو معاك بجد ؟
اتفاجئ من سؤال عليا : مش فاهم قصدك
تدخلت مي بعد ما حست ان فى سوء فهم هيحصل :
_ اكيد معاه هيعرف منين انه ضاع منك انسيال فضه وفيه حرفك
_ انتى فاكراني بكذب
تحدثت مي: لا مش قصدها , عليا تقصد يعني علشان لو عندك مواعيد وكده والعطله
_انا كان ممكن اتصل اعتذر بس انا كنت وصلت ففضلت اعتذرلكم شخصيًا مش بمكالمه ولا رسالة
- حصل خير , احنا قاعدين لاسبوع فى اى وقت مناسب لك تنورنا زى دلواقتي كده نشرب قهوة مع بعض ولا ايه يا عليا
_ ايوه زى ما مي قالت
خرج يوسف ظرف من جيبه وقدمه ل عليا :
_ دى دعوة لحفله بكره , هى حفله صغيره بسيطة ويشرفني تكونوا موجودين أكيد
مسكت مي الدعوة : انا جربت احجز التذاكر كانت خلصت
ردت عليا : هشوف جدولنا لو يناسبنا اكيد هنحضر
تدخلت مي: مفيش بكره غير مواعيد الصبح من بعد 3 احنا فاضيين ,,هى الحفله الساعة كام ؟
_ الساعه 7 بليل
_ تمام جدًا هنكون من الحاضريين ان شاء الله
_ مي انتى ناسية موعد الساعه الساعه 6
تذكرت مي: اه صح دا موعد اتقدم كنت ناسياه مش عارفه هنلحق الحفله ولا لا
نظر يوسف ل عليا : الحلفه هتبدء 7 ولو جيتوا نص ساعه اكيد هيفرق معايا
_ ان شاء الله
_ اعتبره وعد
عليا لاحظت نظره يوسف ليها : ان شاء الله
- هيكون معايا الانسيال لو عاوزاه
استغربت عليا من أسلوب يوسف واصراره انهم يحضروا الحفلة , مي مسكت التذاكر : ان شاء الله هنكون موجودين .
قام يوسف ومشي وبصت عليا ل مي بعصبيه :
_ مي كذا مره اقولك بلاش طريقتك دى فى الكلام
_ طريقه ايه ؟
_ لهفتك وموافقتك ع اى حاجة , مش يمكن انا مش عاوزة اروح وكنت هعتذر ب لباقة
_ ماهو انا علشان عارفه انك هتعملي كده مسمحتلكيش تعملي كده
_ ايه ؟
_ عليا , احنا بنشتغل والشغل ماشي مظبوط , لما بتيجي فرصه تغيري جو برا نطاق الشغل انتى بتهربي منها , الناس الطبيعيه بتهرب من الشغل , انتى بتهربي للشغل , دا مش حياة , اتنفسي شويا, فى حاجات كتير فى الدنيا تستاهل تعيشيها وتشوفيها, ليه حاشره نفسك فى زون واحد , دى مش حياة يا عليا
_ انا مشتكتش يا مي, دى حياة انا اختارتها ب ارادتي
- ايوه لكن بتفتحلك شبابيك . بصي منها مش تقفليها عيشي يا عليا
_ مي انا مش رايحه فى مكان اخلص موعد الشغل وبعدها ابقي روحي براحتك
_ وانا مش هتحرك غير وانتى معايا بقولك اهو
تركتها عليا وعادت لغرفتها وجلست مي تتأفف من طريقة عليا , فى اليوم التالي جهزت عليا وكانت فى انتظارها مي واتجهوا بالسياره لمواعيدهم , وفى الاتجاه التاني يوسف فى مكان الحفله بيبص ع الانسيال وبيتمني ان عليا تيجي الحفله , يوسف حاول ع اد ما يقدر ان الحفله تبدء 8 اخرها ساعه , وكان دايما يبص ع الحاضرين يبحث عن عليا ومي ومحدش فيهم ظهر , ومي وعليا فى مقابله العشاء العمل وعليا بتتكلم فى الشغل ومي بتبص فى الساعة وبتحاول تستعجل عليا وعليا مش مهتمه بيها , كلمتها قالتلها تسأذن وتروح هى الحفله ومي رفضت وقعدت معاها ,, وصلت الساعة 9 ونص ومي خرجت بتلف فى المكان وفجاءه ....
يتبع ...
