صباح يوم جديد في جامعه ***
طلعو من المحاضرة الكانت شبه مملة للبعض وحتماً قاسيه على ياسر وشلتو الما بعرفو للقرايه درب ولا للإجتهاد ..
علي كان بجر لي مها في شعرها وبضحك على وشها لمن تتضايق وتزعل ..
مها:باااايخ
علي: ما هاين علي اخلي النكشه دي في حالا
مها: نكشه!!!؟ اصلا انت العرفك الموضه والكيرلي شنو
توته:ياخ حرام عليك علوة بي حالو ما بعرف الموضه
قاطعها محمد: انتي بتتكلمي عن علي متأكدة؟ انت بتتزكر يا ياسر لمن قلنا نعمل شبونغ ودخلنا محل الجزم وقال بصوت عالي السنيكرز دي شكلااته يااخ خلا الناس كلها تعاين لينا
ياسر بضحك: قااسي يا محمد
علي: اي اطعمجو ، الاسنيكرز دي من قمنا شكلاته القلبها جزمه شنو
مها: ما لو مواكب الموضه كان عرفت
توته عاينت لمقداد السرحان: هي سرحان وين انت
مقداد: ياخ البت المع مجاهد دي طلقه عدديييل كدة
علي: وين! ويين وين طلقه وين
محمد: عاين هناك يا شفت
توته باحساس غيرة واشمئزاز: دي؟؟؟؟ عايني يا مها قال رزان طلقه
مها: النصيحه انا زاتي منبرشه تضامنا مع مقداد ..
توته جرت لمها نور خلتها تتمتم
مقداد: اسمها رزان كمان ، اول مرة اشوفها شكلها برلومه
ياسر:برلومه شنو يا الرايح احنا في نهايه السنه
مقداد: اي صاح ، تكون جكسيتو من برة
توته: عاااااديه جدا على فكرررة
محمد: موتيي يا توته
مجاهد من بعيد انتبه انهم بعلقو في البت المعاه عاين لاصحابو نظام تعالو .. جو عليهم ..
مجاهد لياسر: وين يا حلبي
ياسر: ...؟ وووو اهلا
محمد: خير مالك المرة دي
مجاهد: انت السألك منو؟
محمد وقف: انا ما محتاج اتسأل عشان ارد واضح
مجاهد: والله كويس طلع ليكم لسان
توته: هي هي انت قايل روحك وين سألناك احنا ولا جينا جنبك
علي مسكها: انتي ما تتدخلي
توته:لالا بتدخل العبيط دة قايل روحو باتمان كلو يوم جاي عامل فيها واو وداير يجوطا معنا
مجاهد جا عليها لكن مقداد وقف قدامو: اها عايز تضرب البنات برضو
مجاهد: واضربك انت زاتك لو عايز
طوالي علي جا عليه ونفس الشي ياسر واصحاب مجاهد الاتنين وقفو وراهو
ياسر ببرود: حركات السنير دي ما بتاكل معانا يا زول داير تضرب اضرب والله إلا تشوف شعاع ..
مجاهد ما خلاه يكمل كلامو وضرب مقداد القدامو بونيه ونفس الشي ياسر .. علي مسك يدو واداهو كف وراهو بونيه في بطنو .. اصحاب مجاهد مسكو علي وضربو ومقداد ومحمد بقا يحاجزو ويضربو في اصحاب مجاهد وياسر ماسكنو زمايلاو عشان ما يضرب مجاهد الطلع مطوة وكان جاي علي ياسر .. فجاءة الساحه اتملت ناس تحاجز وناس تصور .. وماهي إلا دقائق والادارة جات حاجزتهم .. دكتور هشام كان بعاين من بعيد بدون ما يتكلم ..
ودو الشباب الادارة اما توته ومها كانو بعيدين من الصورة ..
مها: اكيد المرة دي حيفصلوهم
توته: الخوف احنا زاتنا نتجاب
مها: لالالا ما تقولي كدة انتي عارفه بابا لو عرف
توه بضحك: اتخيلت منظرك هو بقولك شغاااله بلطجييه وطااخ يضربك
وتابعت: لكن مقداد وياسر ما عليهم خوفه
مها: اصلك ما بتطمني .. انا حمشي الاستراحه لانو اعصابي باظت
توته: يلا طيب ...
