#قطار_العمر
البارت السادس والاربعون
للكاتب غزوان علي
كمت غسلت بس گلبي يوجعني وميته قهر والشهكه بعدها بصدري واني بلحمام دخت اتوقعت ضغطي ارتفع واترنح غسلت بسرعه وداانشف وجان تزلك رجلي والوكعه على راسي وظهري حسيت عظامي تكسرت اريد اكوم ماكو حسيت شى حار نزل اباوع كاع الحمام كله دم وعطت ماما الحكيني
اصرخ بصوت عالي وبلحمام الصدى يكون اعلى ركضت عمتي خطيه فتحت الباب شافتني مدده بلكاع وجهه اصفر وتطلم على وجهه واسمع عمي بره يكولها ولج شبيهه خطيه مدخل يتوقع اكيد ممبدله
ام ريسان .. كومي يمه ساعديني
ميناس.. ماما والله مااكدر
ام ريسان .. شون يمه عمج مايكدر يدخل
ميناس.. الزحلكه قويه احس عظامي كله يوجعني كوه لزمت البواري واسند نفسي وكفت بمساعده عمتي واباوع على رجلي والكاع كلها دم
ام ريسان .. صخام ولج يمه بس لا طارحه
ميناس.. فتحت عيني ولطمت على صدري وكمت ابجي جنت انتظر لحظه لحظه حتى احبل كوه وكفت وغسلت ولبستني عمتي والدموع مقبلت توكف من عيوني
طلعت خطيه لكيت عمي كاعد وايده على راسه وجان تنفتح الباب ريسان يطلب يلهث يمكن عمي مخابره
ريسان .. شبيج منوس
ميناس.. كولشي محجيت وياه بس كتله وديني دكتوره
ركض لغرفه الموجوده جوه جانت مثل المخزن رتبوها وسوها غرفه خطار صغيره بس كولش حلوه رتبها بعد ما فصل محمد الطابق الفوك عن اهله لهذا اخاف احد يجي عدهم يبات بالغرفه موجوده هاي صارت غرفتي بوقت اقامتي عدهم جابلي ملابس منها اباوع بعيونه وگلبي يكوله ها ارتاحيت هسه خلي تفيدك الفلوس والبيت
احس بعيونه الخنكه بس حالياً واحنا بهذا الموقف غير السكوت ميفيدنا
لبسني هو وامه لبست العبايه على راسها وطلعنا واقرب دكتوره
لحظات اكول بلكت ماكو شى واطلع حامل بس النزف جان مو طبيعي
ودخلت بسرعه بدون انتظار سره لان حالتي كولش تعبانه
ومع الاسف اسقاط الدكتوره تنصحني وتحجي ويايه واني دموعي تنزل بدون متوكف حطتلي مغذي وانطتني مسكنات وضربتني ابرتين جنت مثل اللعابه همه يتحكمون بيها اني بس ساكته لحد بعد ساعه طلعنا كوه امشي ضغطي صاعد وجسمي ثلج وحالتي تصعب على الكافر من عرف ريسان سكت ودنج وطول الطريق هدوء احنا
رجعنا لبيت عمي ودخلت امشي على كيفي وهو ساندني دخلني للجربايه وغطاني بدون اي كلمه بس گلي محتاجه شى اشرت براسي لا باس راسي وطلع تمنيت كل الصار مصار جان هسه فرحانين ليش الفرح ممكتوب الي واذا انكتب ياخذ شى مني بلمقابل
نمت من تأثير المسكنات مااعرف شكد نمت بس الظاهر هوايه كعدت على لمسه منه يلعب بشعري ويهمس بهدوء منوس حبيبي
ميناس.. اممم
ريسان .. مجعتي
ميناس.. فتحت عيوني وحجيت بهدوء وكوه ابلع ريكي ساعه بيش
ريسان ..ساعه ١٢ الظهر
ميناس.. ليش شكد نمت
ريسان .. من البارحه المغرب نايمه لهسه وكل شويه ادخل اشوف انفاسج ونومتج جنتي نايمه بعمق كلت اقلها تاكلين شويه وبعدها ارجعي نامي
ميناس.. باوعت بيده صينيه بيها شوربه دجاج عمتي كولش طيبه تسويها خطيه مسويتها اليه وصمونه وكلاص ليمون
واني من شفت الصينيه جعت
خلي اكوم اغسل
ريسان .. ابقي اكلي وغسلي
ميناس.. كعدت زين وسندت ظهري على الجربايه ولزم الماعون بيده ردت اخذ الخاشوكه منه مقبل كلي اني اوكلج جانت بعيونه نظرات احتاريت افسرهم حب على ندم على اشتياق ما اعرف بس نزلت عيوني احس گلبي بعده يوجعني منه والي انكسر بداخلي شى جبير مو بسهوله يروح وبقى يوكلني مثل الطفل ويمسح حلكي الهدوء الي بينا كان غريب ممتعلمين اني وريسان على هيج وضع دوم اذا كعدنا سوه اله يبوس ويشم ويدغدغ يعاملني مثل الطفله شفت ايام وياه من دلال كأمرأه مشفتها بحياتي لهذا استغرب الديصير بينا
شبعت كافي
ريسان .. بس هاي اللكمه
ميناس.. والله شبعت
ريسان .. لخاطري ولو ادري خاطري انتهى من داخلج
ميناس.. جان اشربها من ايده قبل ليكمل مشكلتي اني كولش احبه لريسان لان احتواني كأمراه وتعامل بكل حب وحنان ويايه رغم شكد مرت ظروف بينا مابيوم تجاوز عليه ولا خاني ولا أذاني بكلمه حتى من يضوج يبقى ينكت ويضحكني حتى لا انقهر بس شجاه حظي الاسود هذا
