#قطار_العمر
البارت الثالث والعشرون
للكاتب غزوان علي
طلعت بدون تفكير كان كل همي شلون اوصللهم مع العلم اعرف خطوره واعرف احتمال امووت وخصوصا اني حلاقه ومهدده بلقتل اكثر من مره خوفي على امي واخوتي عمه عيوني بذاك الوگت مشيت بلطريق وهو هذا الطريق الوحيد لياخذني ع بيت اهلي ماكو غيره لان الشوارع كوله مسدوه وهل طريق فاصل بين بيتي وبين اهلي ومن وصلت كانت المفاجاة التنظيم ينتظرني حتى ياخذوني
بعدها فتت من شفتهم ولا ارتبكت ولا خفت حجيت بقلبي كلت همه نسوان وجبناء لو زلم جان حسبت حسابهم مع الاسف هاي الشوارب واللحيه بلوجوه تقربت منهم شكلهم مقرف اللي ظافر شعره ولظفيره مثل ظفيره المره ولافها ع البيكي سي واللي شعره طويل واللي لاف شعره كبايه طبعا وياهم شباب عاديين ومن المنطقه ومعروفين شكلا واسما
فتت واحد صاح بي هيييي التفتت جان ظنه يخوفني او يرهبني جاوبته خييير كال ليش متسلميين كتله تخسسسى ولك توكف مره بلشارع علمود السلام هاي قوانينكم وهذا الجييتو عليه رد واحد عليه كله اتركه خلها بطريقها تروح حجى الثالث كال وين رايحه
ميناس.. امي متخربطه وماعدهم رجال بلبيت
كالي وانتي رجال ويضحك بستهزاء
ميناس.. بميه رجال
رد الثاني كال والنعم منج مااشك بهل شي كالي بس خلي ابالج بعد 10دقائق نبدي مواجه مع الروافض اذا مرجعتي قبل هل وقت معناها تبقين عد اهلج
ميناس.. عادي رحت ع السريع امشي بس اريد اوصل ااخ ياعبير هسه ليش تلفونج انغلق گلبي نار اخاف صار شى وصلت بسرعه فتحت الباب
لكيت عبير بلطارمه تنتظرني
ميناس.. ولج يمصخمه شكو شصار
عبير .. شلون جيتي
ميناس.. من الطريق احجي بسرعه صاير شي
عبير .. لا اريدج تجين تباتين عدنه
ميناس..عطت بيها عيطه كل عقلج شنو انتي واعيه شكاعد تحجين الامه محتركه والتنظيم مالين الشوارع بس هو مو صوجج صوجي اني الي عفت بيتي وجهالي واجيت ركض عبالي صاير شى من اشتعلت لشتج اذا صدوك اريد اطلع لحكتني ركض عبير ..شفتيهم ومسوولج شي شنو حجوو وياج
ميناس.. ولللللي مني لا الزمج هسه بلشارع وامسحه بيج دفعتها وركضت اريد ارجع لبيتي اول موصلت الطريق كانت ال 10دقائق خلصانه بدأ الرمي والمواجه بين الجيش والتنظيم اني كعدت بعد مسيطرت ع نفسي رجليه بعد متعيني بين الصدمه وبين الرعب والتفكير مشاعر متضاربه جان كدام عيوني بس ابني وبتي شنو ح يصير بيهم وشلون انعمه ع عيوني واجيت واذا انگتل شحيكولون الناس شجابها يم التنظيم بهل وقت ونگتلت كمت اضرب على وجهي من الندم والخوف والادعيه والايات القرأنيه متفارك شفايفي الطلقات مثل المطر واني على ساعه گلبي يوكف من الخوف
ومااحس غير واحد منهم سحبني ورى الاشجار شمرني
شرجعج يا حرمه مو كنالج لترجعيين
ميناس .. اني حاطه ايدي ع اذاني وابجي من الرعب حتى مجاوبته وغمضت عيني ومنتظره الطلقه الي راح تگتلني
فتحت شويه عيونه شفت شون هذا الي بصفي يضرب والطلقات مطر علينا گلت مستحيل نطلع سلامات
دخيلك ربي بأسمك الاعظم نجيني وابجي واصيح ياالله ياالله
عاط هذا الي بصفي اسگتي لاتكشفين مكانه
من خوفي حطيت ايد على حلكي وايد على اذني وغمضت واردد اسماء الله الحسنى وابجي
