#قطار_العمر
البارت الرابع والعشرون
للكاتب غزوان علي
ومتانيــك
والخنگه ترس ريتّـــي
يعافيتي المشت وياك
رد وجيب عافيتّـــي..!؟
فتحنا الباب صار فارس گبالنا عطت بلهفه واخيراً رجع سندي وظهري ركضت وحضنته وابوس بيه وابجي ممصدكه رجعلي
فارس.. على كيفج حبيبتي مراح اطير
ميناس.. ممصدكه عيوني انت صدوك گبالي
سالم .. هاج السگط بشحمه ولحمه ولو صاير معصعص مابي شحم بس اهم شى كدامج
فارس.. ولك اخويه الخايس رجعت للسانك الزفر
سالم .. شعندي غيرك اذا مااقسم الك المن اقسم وحضنته حيل
ميناس.. تعال طب گلبي نور وينها
فارس.. وصلتها للبيت كالت تعبانه بعدين ازورها
ميناس.. لان اني المفروض ازورها اكعد گلبي
شعجب رجعت
فارس.. ليش متردين ارجع
ميناس.. اصلاً ممصدكه عيوني عيد عندي هسه والله عيد
فارس.. رجعت احط حد للمهزله الي صارت
ميناس.. اووف عوفها الله يسامحها
سالم .. على شنو تحجون
فارس.. بعدين اكولك مو هسه وقته تعال كولي شنو هاي البطولات بروسلي صاير تهد وتتعارك وينك وين الحب مو جنت مرتاح وطير حر باقي بس تعيب عليه لان انوح على نور
سالم .. مخبل ولا على المخبل حرج نمت كعدت حبيت سوايتي المطي ميسويها خليني ساكت واتوب ما اتوب هلمره تخبلت بلزايد عليها اريدها كمت مااشوف مره ولا بنيه لو ايه من الجمال متحرك شعره بيه ولك بس لا مسويتلي سحر المصخمه
ميناس.. ههههههه هذا هم حظها الي يحجيك البنيه وينها وين السحوره اصلاً انت لزكت الها شكد طردتك وانت لازك
سالم .. لزكت جونسن مو مثلي وداعتج خليها سكته
فارس.. ردت تصيد وانصاديت ولك
سالم .. اييي ولك كون موال هسه اجره يوصلني للبصره على الي صار بأخوك ولك حتى ابو نواس شرب من ورايه كال منعول الصفحه اتزوجها مو لعبت روح امي من وراك ويجر البطل وداعتك واني ما اكذب
فارس.. هههههه لا يابوي انت وين اكو مثلك صادق
ميناس.. رايحه اسوي غدا
فارس.. ياغدا ساعه ١١ ونص الصبح
ميناس.. بين ميصير اقل شى لل٢ وهم حتى تاخذ وياك لنور خطيه وين بيها هسه تطبخ
كمت اشتغل واني حتى همي وتعبي نسيته من رجع الغالي
سالم .. كولي شرجعك هي العالم كعد تطفر تخبلت انت
فارس.. شفت الوضع كدامك اخوتي كلهم سافر واخرهم فيصل ذاك الشهر ومبقى بس حسن وسعد وذوله صغار وانمار ميكدر يرجع مهدد وبارق كال ماارجع لو الدنيا تحترك منو بقى بس اني
سالم .. وممجبور ترجع وعلى شنو اصلاً انت كعد تشوف حالنا من سئ الاسوء
فارس.. ماكو احد يم البنات وامي واخوتي مراهقين صغار كولشي ماكو اصلا الخوف عليهم اكثر
سالم .. وام احمد قبلت ترجع
فارس.. نور متخبله وصايره نار حارت شسوت حتى مترجع واني دكيت رجل ما اكدر ابقى بعد اختنكت والله خلي بس فتره ارتب الوضع هنا وارجع
سالم .. حقها تره كعد تشوف حالنا وخاصه جهه بيتك كارثه شون طبيتو وطلعتو
فارس.. مالهم دخل بينا كم شهر وارجع وعدت نور بهذا الشى
سالم .. مبين الي جابك شى جبير واله ماكو واحد يعوف الجمال والامان ويجي للشلعان الگلب هنا
فارس.. اوووف المهم رجعت لدوخ راسك عوفك مني انت شخبارك وضعك
سالم .. وضعي طايح حظ هذا عمك قافل قفله خبلني حرت المن جبت اله لك ٧ مرات خطبتها ويوميه جماعه شكل يرحون يخطبوها اليه بس يسمع اسمي ينتل تكول كاتل ابوه
فارس.. وهي شتكول
سالم .. مغلوب على امرها والعجيب ابد ميسألها تردي لا بس اول مخطبتها سأل وانتهى
فارس.. وشناوي تسوي
سالم .. اكو جماعه من جيش المهدي اتفقت وياهم راح اخذهم واروح
فارس.. انت صدوك تحجي لو تتشاقه
سالم .. ماعندي غير حل انطيني حل واني من ايدك اليمنى لليسره
فارس.. وشيسون الك وشون قبلو يجون وياك
سالم .. اني رحت لقائد فصيل عدهم دخلت عليه كتله اني جايك دخيل هو عباله شغله سنه وشيعه وتنظيم بقى الكل واكف ومتهيأ اخاف اسوي حركه عوجه
تفضل شتريد أمر
سالم .. لا يأمر عليك ظالم اني اريدكم ترحون ويايه خطابه
ما اكولك منظرهم واحد يباوع بوجه الثاني
فارس.. هههههههه حقهم اي كمل
سالم .. لتستغربون اني احب وحده وخطبتها من ابوها ٧ مرات وقافل واريدكم طبابه خير تقنعوه حتى اتزوجها على سنه الله ورسوله
شنو سبب رفض اهلها لازم اكو سبب بيك شى ومقابل عليه
سالم .. كفيلك الله كولشي ما ادري بس اروح اكوله اريد بتك عاط ماعندي مره للزواج غيرها ميكول حتى رحتله وحدي ردت افتهم ليش هيج يكرهني ميكول
هي تريدك
سالم .. اكيد
شوف عمي مرحبه عليك احنا وياك للوحه ماطول رايدها بلحلال نجرلك ابوها ليمك وهو يزوجها الك بس توعدنا تحط المره بعيونك
سالم .. على راسي مو بس عيونك بس خلي تصير الي
عوف عنوانك وعنوانها وبيه خير الله يقدمه
