لعبة القدر بتحكي عن قصتين مختلفتين في الرواية ،، القصة الاولى خيالية لكن كمان فيها اجزاء مقتبسة من قصة حقيقية و القصة التانية خيالية بحتة
بطلة القصة الاولى مآب و هي فتاة مهذبة و جميلة بتدرس في الجامعة و بتحب اهلها جدا و بتحترمهم
مآب : امي انا ماشة الجامعة يلا سلام
اميمة : خلي بالك من نفسك حبيبتي و اتحصني
مآب : حاضر يا امي و انتي كمان خلي بالك من نفسك
ماب طلعت للجامعة و ركبت المواصلات و وصلت الجامعة
مآب : ازيكم يا بنات
اسراء : كيف يا اوبة
سماح : اهلييين ماب
مآب : الحمد لله ، جبتو الشيت حق استاذ عمر
اسراء : اي جبتو و الله المادة دي غياظة خلاص
مآب : خلاص نمشي نراجعها بعدين مع بعض
سماح : احسن نقراها زي ما قلتي من هسي
دخلو البنات محاضراتهم و بين المحاضرات قرو المادة و فهموها
و نهاية اليوم اي واحدة مشت بيتهم و دا برامج ماب اليومي
مآب بتحب الفيس جدا و وقت تلقى وقت فاضي بتدخل الفيس طوالي و عندها صديقات كتاااار من الجامعة و الاهل و حتى الغريبات و كانت ما بتقبل طلبات صداقة من اولاد و طوالي بترفض طلبهم و كانت بتقبل طلبات الصداقة من البنات طوالي و بتنزل منشورات مفيدة و دينية و منشورات مضحكة كمان
كانت خليط و زولة مرحة و ملتزمة و في يوم من الايام جاءها طلب صداقة من واحدة اسمها هالة و مآب قبلت الطلب و هالة رسلت ليها طوالي
هالة : بشكرك على قبول طلب الصداقة يا ماب
مآب : العفو اختي
هالة : انا هالة بدرس في جامعة السودان محاسبة
مآب : اتشرفنا كتيير يا هالة و انا ماب بدرس محاسبة كمان لكن في جامعة الخرطوم
هالة : جميل جدا والله ، نفس التخصص ممكن نستفيد من بعض
مآب : اكيييد حبيبة ☺☺☺
هالة : تسلمي يا ذوق ، انتي ساكنة وين يا ماب
مآب : ساكنة اركويت و انتي ؟!
هالة : انا ساكنة الكلاكلة
مآب : حتة جميلة الكلاكلة ☺
هالة : تسلمي يا اوووبة ، عيونك الاجمل ، عندك اخوات و اخوان انتي ؟!
مآب : لا انا وحيدة امي و ابوي
هالة : انا كمان وحيدة امي و ابوي
مآب : خلاص انتي اختي من اليوم ☺
هالة : الله يخليك لي يارب
اميمة نادت ماب
مآب : عن اذنك يا هالة امي بتناديني
هالة : اتفضلي حبيبة
مآب مشت لامها و ساعدتها في حاجات البيت و اتونست معاها حبة و دخلت غرفتها تصلي و تقرا قران و بعداك فتحت النت ونزلت منشورات و هالة عملت ليها لايك و رسلت ليها
هالة : مساء الخير ماب
مآب : يسعد مساءك هالة
هالة : منشوراتك بالجد جميلة و حلوة
مآب : تسلمي كتيير من ذووقك
هالة :بالجد نفسي اعرفك اكتر و نكون صحبات شديد ،، بتحبي شننو و بتكرهي شنو
مآب : ههههه حاضر حبيبة ، انتي اصلا بقيتي صحبتي من قبلت طلبك ☺، انا بحب البساطة و بكره الحقد ، نفسي السلام يعم و كل الناس تساعد بعض
هالة : جميل جدا والله ، انا كمان زيك بحب الناس البساط و المتواضعين
هالة : ملاحظة انو ما عندك اصدقاء اولاد في الفيس ، كلهم بنات !
مآب : اي ما عايزة اصادقهم ، اهلي ما برضو اتكلم مع زول غريب و ما عايزة اخون ثقتهم دي ، كمان كدة احسن لي عشان الكلام الكتيير معاهم بخلي العلاقة تتخذ مجرى اخر
هالة : كلامك صاح لانو بحصل تعود ،، و احسن كمان انك ما عندك اصدقاء اولاد ☺ ،، يعني افهم من كلامك انك انتي ما مرتبطة بزول !!؟
مآب : لا ما مرتبطة 😁
هالة : و لا مخطوبة !!!؟
مآب : و لا مخطوبة كمان
هالة : 😍😍😍 بالجد
مآب : جادة والله ههههه ، مالك فرحتي كدة ، ما عايزاني اتخطب و لا شنو ههههه
هالة : لا لا ما كدة ،، كنت قايلاك مخطوبة ،،ما ممكن بعد جمالك و ادبك دا كلو ما تتخطبي
مآب : جمالي 😳😳😳 ، انتي شفتيني وين !!!؟ ، انا ما رسلت ليك صورتي و انتي ما شفتيني قبل كدة
هالة : ....
يتبع
الحلقة الجاية حنتعرف على الشخصية التانية في الرواية
