الرواية قيد الكتابة كل يوم تنزل حلقة ان شاء الله
قراءة ممتعة
ــــــــــــــــــــ
في الجانب الاخر
مآب : انا ما رسلت ليك صورتي 😳 ، عرفتيني كيف جميلة !
هالة : هههههه انا حاسة انك جميلة من كتاباتك و افكارك ، جمالك الداخلي باين و الجمال الخارجي اصلا ما مهم
مآب : ههههه خلعتيني طبعا قلت شافتني وين ! ،، كنت حأشك انك جن عاشق هههههه لاني قريت رواية قبل فترة بتحكي عنهم الكتبتها تهاني محي الدين 😉
هالة : انا كمان قريتها 😂 لا ما تخافي ، انا ما خالد هههههه ما بجيك ناطة و كمان انا بت زيك ههههه
مآب : بهزر معاكي ههههه عارفاك بت لانك لو كنتي ولد ما كنت قبلت طلبك اصلا 😁 ، و كمان انا قاعدة اتحصن و ما بتجيني حاجة ان شاء الله
هالة:- ان شاء الله ، وربنا يحفظك بالجد التحصين درع واقي للمسلم من كل شر
مآب : اميين و جمعا يارب ، اها انتي مخطوبة و لا لا 😁
هالة : لا ما مخطوبة ، لكن في زول عاجبني جدا و بتمنى يكون من نصيبي 🙈
مآب : ادعي ربنا ، هو قادر انو يجعلو من نصيبك و الدعاء يغير شر القدر و كمان استخيري و لو فيهو خير حيكون من نصيبك ان شاء الله و لو ما فيهو خيير ما حيكون ليك 😊
هالة : اللهم امييين يارب و اكييد الفيهو الخير هو البحصل ، يلا عن اذنك ،، ماشة اذاكر حبة
مآب : اتفضلي و انا كمان حاطلع اذاكر شووية ، تصبحي على خيير حبيبة
هالة : و انتي من اهل الخيير
هالة و ماب بقو يتكلمو مع بعض طوالي بالفيس و لقو انو افكارهم قريبة لبعض و حصل بينهم انسجام و بقو صحبات جدا جدا و بقى ما بمر يوم الا و هم يدردشو مع بعض و تقريبا عرفو بعض جدا و بفهمو بعض طوالي
و في يوم و هم بدردشو
هالة : في اولاد بدخلو بحسابات بنات كتار حتعرفي كيف اذا كانت بت او ولد !
مآب : ما بتعرفو والله ، بغيظوني طبعا الاولاد البعملو كدة ديل 😡 ،، ما بعرف حيستفيدو شنو لمن يدخلو بحسابات بنات 😒
هالة : هي بالجد حركة ما حلوة لكن لكل زول اسبابو ، ما معروف يمكن غرضهم خيير
مآب : ما شايفة ليهم مبرر يخليهم يعملو كدة و الخير دا العايز يعملو يقوم يعملو عديل و ما لازم يتخبأ بقناع بت ، لان الحق و الحاجة الكويسة ما بتخجل 😒
هالة : كلامك صاح والله ، عايزة اسالك سؤال يا اوبة !
مآب : اتفضلي يا هلول
هالة : انتي مواصفات فارس احلامك شنو ؟
مآب : يكون ذا خلق و دين و اهلي يحبوهو و يجي عن طريق اهلي و البجيبو لي اهلي انا بتزوجو لانهم ادرى بمصلحتي 😊
هالة : يعني ممكن تتزوجي زول ما بتحبيهو !!؟
مآب : انا ما بؤمن بالحب قبل الزواج و ما بدي نفسي فرصة اقع فيهو
هالة : لكن الحب دا ما اختيار و بجي براهو
مآب : يلا انا ما بديهو فرصة يجي ، هو بجي بالكلام و المعرفة بالاولاد و بحصل تعلق و عشان كدة انا قلت ليك ما بحب اتعرف على الشباب
هالة : كمان في الحب من اول نظرة دا بجي من غير كلام 😉
مآب : بدعي ربنا يكون من نصيبي بس و طبعا الحب قدر و بتمنى لو حصل و حبيت زول يكون من نصيبي
هالة : ان شاء الله ياااارب
مآب : انسي الموضوع دا هسي لاني حاليا عايزة اخلص جامعتي بس و احفظ القران و نخلي الحب دي لنصيبنا و قسمتنا
هالة : كلامك صاح و الله 😊
مآب :انا عايزة انزل مركز تحفيظ قران كريم حاليا
هالة : كويس والله ،، ما شاء الله عليك و الله حفظ القران حاجة كويسة جدا 😍
مآب : تعالي انزلي معاي و نحفظو سوا و تكون صحبة خيير ، في مركز في جبرة اسمو الاترجة كويس جدا ، كمان نشجع بعض للحفظ واشوف مقرركم كيف حق جامعتكم
هالة : لكن يا ماب 😰
مآب : يا هالة انا نفسي اشووفك والله ، نحن لينا اكتر من شهر بنتكلم مع بعض و انا ما قاعدة اقابل ناس الفيس لكن انتي وثقت فيك من خلال كلامي معاك و لقيتك زولة كويسة ، عشان كدة اما تجيني الجامعة او اجيك جامعتك و نتفق عشان نمشي مركز التحفيظ سوا 😍
هالة : بصراحة يا ماب ، انا عايزة اعترف ليك بحاجة و خايفة تزعلي مني 😥
مآب : ما تقولي كدة ، انا ما بزعل منك خالص ، انتي اختي والله ،، مستحييل ازعل منك ☺
هالة : مهما حصل ما حتزعلي مني 😔
مآب : ايوا ، قولي في شنو قلقتيتي عليك جدا 😰
هالة : بصراحة ........
يتبع
اها قولو توقعاتكم 😄
