في الجانب الاخر جميلة و حامد
جميلة نامت و الدموع في عيونها و هي منتظرة حامد يرد على رسالتها
اصبح الصباح ،، جميلة صحت من النوم ،، لقت انو حامد ما رد ليها و قالت في نفسها الغائب عذرو معاهو ،، قامت صلت و ساعدت امها في شغل البيت و لبست عشان تمشي المكتب حق حامد
و بعد جهزت اتصلت على حامد لكن لقت انو تلفونو مقفول ،، طلعت مشت على حسب الوصف الوصفو ليها حامد و وصلت المكتب بعد تعب 😥
دخلت المكتب و لقت واحدة شغالة في المكتب ، الزولة دي متزوجة واسمها سماح
جميلة : السلام عليكم
سماح : و عليكم السلام
جميلة : انا جميلة ،، جاية انزل معاكم شغل هنا
سماح : مرحبتين جميلة ،، شرفتينا كتييير ، اتفضلي
جميلة : يزيد مقدارك ، تسلمي ☺
سماح : انا سماح مهندسة مدنية ☺
جميلة : انا خريجة هندسة معمار ☺
سماح : ما شاء الله ، جاية تبع منو للشغل !
جميلة : جيت عن طريق باشمهندس حامد
سماح : تمام والله ، هو لسه ما وصل لكن بكون في مسافة السكة لانو مواعيدو البجي فيها 9 ص
جميلة : طيب حنتظرو 😊
سماح :تشربي شنو
جميلة : لا شكرا ، شربت من البيت و جيت ، لمن اعطش بطلب
سماح : عايزة تقولي علينا بخلاء و لا شنو 😂 ، لازم تشربي حاجة و ليك علينا تلاتة ايام بس و تاني مافي ليك هههه
جميلة :: هههههه تسلمي ، طيب بشرب شاي سادة لو في
سماح : تمام ☺ و قامت نادت : خالتو عشة لو سمحتي 2 شاي سادة
جميلة و سماح قعدو اتونسو و شربو الشاي و اتعرفو على بعض ،، عرفت انو سماح متزوجة خال حامد ،، اتبسطت جدا عشان اتعرفت على زول من اهل حامد لانو كان نفسها تعرفهم كلهم و تحبهم و يحبوها 😍
بعد تلت ساعة حامد جاء داخل المكتب ،، لقى جميلة في وشو و كان ما مرتاح و ضحكتو باهتة
جميلة لمن شافتو اتبسطت و قامت مشت عليهو
جميلة : سلام حامد ☺
حامد : و عليكم السلام جميلة ، ما شاء الله جيتي بدري و سلم على سماح من بعيد
