كريم فضل مبحلق قدامو والخوف متملكو ..... فداء بقت سايقة العربيه على حسب الوصف الوصفو ليها هزبر ( هزبر دي يخوانا تنطق كالاتي هيييييزبر ..... كسر الهاء وفتح الزين ..... وشد الباء )
هزبر كان بعاين لي كريم بي مراية العربية .... وكريم م قدر يعاين ليهو مرتين .... بس بقا بعاين بالشباك .
الجو كان مكهرب ⚡⚡⚡⚡⚡.
فداء ساقت لحد م وصلت البيت الوصفو ليها
هزبر وهو بفتح الباب : انزل .
كريم طوالي فتح الباب ونزل .
اول م دقو الباب مها فتحت ليهم .
هزبر دخل وكريم دخل معاهو .
مها : كريم كنت وين ؟
سكت م رد عليها
هزبر : مها لو سمحتي .... جيبي كباية فيها لبن ..... ولو في زبادي برضو جيبيه
_ كويس .
هزبر دخل بي كريم الصالون وقفل الباب .
_ كريم
_ اي
_ عملت شنو ف نفسك
كريم بنرفزة : ولا شي ياخ
_ اتكلم كويس
_ م عملت شي ياخ
_ كريم .... اسمعني كويييييس ... الدرب الماشي فيهو دا لو استمريت فيه م حيحصل خير .... م عشان دخلت الجامعه معناها تعمل العايزو .... شايف امك البره دي .... ممكن تروح فيها لو انت استمريت ف طريقك دا ..... غايتو انا م حكتر كلامي معاك .
لكن اعرف لو استمريت ف البتعمل فيهو دا حتخسر نفسك .
كان كريم قاعد في الكرسي وبس بعاين لي هزبر .... الواقف قدامو .
مها دقت الباب .
هزبر : ادخلي
دخلت وهي شايلة كاست زبادي وكباية لبن .
كان الخوف باين في وشها وهي بتعاين لي ولدها القاعد بهدوء .
ختت الصينيه وعاينت لهزبر : مالو يا هزبر ؟؟؟؟
_ ماف شي م تخافي
شال كباية اللبن ومداها ليه : اشرب
كريم شال الكباية براحه وبقا بيشرب في اللبن
( اللبن ومشتقاته بفكو السطله 😃)
مها كانت بتعاين ليه بخوف وبقلق .
ونظراتها كانت بتتحول بينو وبين هزبر .
بعد م خلص الكباية ... مدا ليه كاست الزبادي .
كريم : م عايز
هزبر بنهره : اسمع الكلام .
مدا يدو بي تردد وشال الكاسه
مها : يا هزبر مالو عليك الله وريني 💔
_ مها ... قلت ليك ماف اي شي ... م تخافي
هزبر وهو بعاين لي كريم : بعد م تخلص امشي اخد ليك دش وامشي اوضتك .
كريم هز راسو وطوالي قام .
مها وهي بتقعد ف الكرسي : يا اخواني الولد دا خلاص عايز يجنني والله .
_ انتي لسا م شفتي حاجه
_ كيف يعني
_ عديل .... حيوريك عروض اكثر .... هو هسه شايف نفسو انو ولد جامعه وكبير ويا دنيا م فيك الاااااا انا .
_ طيب انا اعمل شنو يا هزبر ؟
_ خلي بالك منو واعرفي لي اصحابو اسماءهم منو .
_ اها
_ وخلي الباقي علي انا
_ طيب ..... م اعدمك ان شاء الله .... وكيفك هسه ؟ كتفك رجلك بقت كيف .
_ الحمدلله ماشا ف تحسن .
_ مهتم بتغذيتك ؟
_ الحمدلله .
عاين لي ساعتو : انا حامشي بعد دا
_ لا لا اقعد اشرب ليك شي .
_ معليش مستعجل .... لكن بجيك تاني ..... كيف منتصر ( زوجها)
_ كويس والله الحمدلله .... احتمال يجي قريب
_ ربنا يكتب سلامتو ان شاء الله
_ تسلم يارب .
_ يلا .
_ استنى البس توبي عشان اقدمك .
_ لا لا ... خليك م تتعبي نفسك ...
ودعتو بس لحدي باب الصالة وهو طلع .
لقا فداء مستنياه في العربية زي الفاره 😂
فتحت التأمين وهو ركب .
فداء : مالو الولد دا ؟
_ دا موضوعو طويل شديد
_ حاجات الشباب المطوفشين دي صح ؟
_ بالضبط كدا
_ غايتو ربنا يسترو ويهديه .... بس م تكون ضربتو ولا كدا
_ لا .... اسلوبي دوبلوماسي ... لكن لو استمر في طريقو حغير اسلوبي .... وانا متأكد انو م حيقيف طوالي
فداء وهي بتتحرك : غايتو .
م اتكلمو في الطريق كثير .
هزبر رجع كرسيه لي ورا وفضل مراقبها بنظراتو
لحد م وصل .
اول م دخلو الكلاب نبحت .
فداء بي سرعه طلعت المفاتيح وبقت بتهز فيها😌 بي طريقة اجبرت هزبر على الضحك لكن بصوت منخفض 😂
صفق وهو بقول ليها : ممتاز بقيتي بتتعلمي .
دخلو جوه لقو الثلاثي قاعدين في الصالة الجوه وخاتين شاييهم وكيكهم .
هدى كانت بتعاين لي فداء كأنها ضرتها : نورت يا هزبر
_ بي نورك
كان بتكلم معاها بطريقة جاده من دون م يبتسم وكدا
هدى : شنو يعني خالي ضيوفك براهم
_ معليش بس كان عندي مشوار مهم
_ ايوااااا
اما إكليل فكانت بتحرك في سبابتها في طرف كباية الشاي الكبيره الشايلاها ونظراتها كانت بي احساس i don't care
هزبر : عن اذنكم
وطلع فوق فداء وقفت شوية وقالت ليهم السلام عليكم .
ردو ليها بطرف خشمهم وطوالي طلعت فوق.
اول م دخلت الاوضة لقت صينية اكل مختوته وهي اصلا كانت جعانه وطوالي نزلت فيها اكل من طرف بعدها شالتها ومشت على اتجاه المطبخ ... اثناء م هي ماشا سمعت نفس الصوت السمعتو المره الفاتت .... صوت كدا غريب من اوضة هزبر .... زي صوت حاجة كدا بتتجر او بتقع .
بقت شايلة صينيتها وبتعاين لي باب اوضتو بي فضول .... لحدي م حصلت المطبخ ... لقت عزيزة قاعده ..... شكرتها على الاكل الختتو ليها في الاوضة .... وبقت قاعده معاها للونسة .
_ انتي يا عزيزة مش قلتي هزبر دا وحيد م عندو اخوان
_ اي
_ قال عندو اخت
_ اي مها ... لكن م اختو شقيقتو ... بنت خالتو ... ربتها امو
في طفولتها .... ولمن هزبر اتولد ام مها هي الرضعتو
_ اهااا ... يعني اخوان بالرضاعه
_ اي
_ لكن غريبة م حصل جات هنا
_ بتجي مرات مرات .... مشغولة بي بيتها وعيالها
_ مممممممممم
_ انتي ياختي مشيتي مع هزبر وين ؟؟؟؟
_ كان عندو مشوار وسقت ليه
_ عاد م شفتي اممممو .... قلبت الدنيا قلب وهايجه وزعلانه
_ لي يعني ؟
_ عشان طلعتي معاه وهي م عايزاك تكوني معاها .... خايفين عليه منك 😂
فداء الكلام زعلها شديد وسكتت شوية تاني رجعت اوضتها ونامت
____________________________________
الساعه ٢ صباحا :
الشوارع كانت فاضية ....
كان واقف بتاع سكيورتي قدام شركة ...
لاحظ من بعيد لي واحده جايا .
كانت بتلفت الانظار بي مشيتها ..... شعرها الطويل كان بيلعب بيه الهواء .
كانت لابسة بنطلون اسود وقميص اسود وجزمه تمبر سوداء .
وشعرها منسدل لي نهاية ضرها .
وقفت قدامو وهي بتلعب بي خصلة من خصلات شعرها : لو سمحت ... عربيتي اتعطلت في بداية الشارع ... وانا براي ... عايزاك تساعدني .
عاين ليها ف عيونها الاسرتو .... اتأمل في ملامح وشها الجذابة وهو بيسأل نفسو بنت زي دي بتعمل شنو بره براها ل
لساعه ٢ صباحا .
مشا معاها لحدي محل العربية الواقفة .
اتكلت على عربيتها وبقت بتعاين ليه .
فتح مقدمة لدقيقة كدا رفع راسو لمن اكتشف انو ماف اي عطل ف العربية .
عاين على جهتها لقاها مافيشة .
حسا بيها وراه .
قبل وراه لقاها واقفة وهي مبتسمه .
قربت منو كأنها لبوة شرسة عايزة تصتاد فريستها .
كان عايز يزح لكن ختت يدينها بي اطرافو .... وبقت محاصراه بيدينها .
قالت ليه بصوت هامس : مهدي
_ مهدي منو ؟
_ انت
_ انا م مهدي
ضحكت بصوت عالي ووقفت عديل : مهدي على السيد .... ضابط مخابرات..... كلامي صح ولا غلط ؟
_ انتي منو ؟
_ انا الجيت عشان اخلص عليك ..... طبعا جابوك بدل هزبر لكن معليش 😂😂😂😂 ... م حتستمر .
بادلها الضحك وهو بيقول : انا الحخلص عليك
صفقت وهي بتضحك : حماااااس .... حلو شديد راجل لي مرا ... ونشوف منو البيفوز .
قبل م تكمل عبارتها كان عايز يديها بنيه .... بس اتفاجأ لمن مسكت يدو بقوة رهيبة .... وادتو بدل البنيه اتنين بي سرعه محيره .
هز راسو : باين انك م هينه
_ انت لسا م شفت حاجة .
زحا من جمب العربية وهي متابعاه بي نظراتها المخيفه .
وفجأة انقض عليها .... ضربها في معدتها بقوة .... وهي ردت ليها الضربة بي شلوت مسخن في فكو خلاه يدوخ ويقرب يقع في الارض .... سحب مسدس كان مخبيه بي طيات قميصو .... وقبل م يرصصها .... سمع صوت بيقول : هي .
قبل وراه .... وارتسمت في وشو كل ملااااامح الدهشة لمن شاف زول هو بعرفو كويس .... م اداه فرصة عشان يتكلم وطوالي ضرب بي رصاصة جات في صدرو .... في نفس المكان الاترصص فيهو عبد الرحمن .... كانت ضربة مميته ... خلتو طوالي يقع في الارض في بركه من الدماء .
وقفت وهي بتعاين للشايل المسدس وابتسمت .
كأنها بتشكرو .
وبي سرعه الاتنين ركبو العربية واتحركو
