- إركني على جنب يا مدام
= إيه مدام دي ماتحسن ملافظك
- هي كلمة مدام بقت شتيمة دلوقتي؟
= ما أنا ماتعبتش وإشتغلت وخدت كورسات وعملت لنفسي كيان كبير وفِ الأخر ييجي واحد زيك يقولي يا مدام.. أنا إسمي الأستاذة سارة
- إنتي مش الأستاذه سارة دا إنتي الأوزعة سارة
= الطول عُمره ما كان عائق فِ مسيرتي الناجحة.. بالمُناسبة يحضرني موقف إنـ..
- ششش موقف إيه إنتي هتحكيلي قصة حياتك!
= تصدق أنا غلطانه إني وثقت فيك وبحكيلك أسراري
- هو أي عابر سبيل معدي كدا بتحكيله أسرارك
= بقولك إيه ماترغيش كتير وإتفضل قول موقفني ليه؟
- عشان أنا ظابط ودا كمين.. فَ طبيعي أوقفك أفتش العربية وأشوف الرُخص
= تفتش العربية ! للدرجة دي مش واثق فيا؟
- مالك!
= إنتوا كدا الرجاله، كُلكوا شكاكين.. حاجه تقرف
- إيه دا فِ ايه!
= ششش إنت هتصاحبني موقفني ليه.. إنجز؟
- ايه يا ولية فِ ايه؟ إنتي بتكلميني كدا ليه!
= موقفني ليييييييه؟
- عشان حزام الأمان.. مش رابطة الحزام ليه؟
= بيكرمش الهدوم.. وأنا لسة كاوية البلوزة قبل ما أنزل.. يرضيك يكرمش البلوزة؟
- لأ وعهد الله مايرضيني.. طيب وسُرعتك؟
= لأ التسرع دا طبع فيا، دايمًا مُتسرعة فِ قراراتي.. مثلًا امبارح خدت قرار و..
- ششش قرار إيه وزفت إيه! أنا بتكلم على سُرعة العربية.. عديتي السُرعة المسموحة ليه؟
= عشان مستعجلة.. إيه الأسئلة الغريبة دي!
- بقولك إيه أنا قرفت.. إفتحي الشنطة أبُص فيها وبعدها تمشي من قُدامي
= مش معايا شنطة أصلًا.. شايلة بُك بينك وعليه بطوط.. عارف بطوط؟
- يادين أومي
= إنت كمان بتسب؟
- ياستي قصدي شنطة العربية.. شنطة الزفتة اللي إنتي ركباها
= بس ما تقولش زفتة
- طيب هاتي رُخصتك
= مسحوبة
- وريني الوصل؟
= ضاع
- أنا استاهل ضرب الجزمة إني وقفتك أصلًا.. إطلعي إطلعي
*العربية مش بتدور*
= بقولك يا ظابط.. العربية مش عايزة تدور.. مُمكن زقه؟
- الله يرحمك ويسامحك يابااا.. قولتلك أدخل تجارة إنجلش
