حي الله االزلم والوطن حياهم
هذول الرخصو للموت ملكاهم
كحل عينهم دخان ينزف ليل
وقمرة موقف التاريخ سماهم
بصوت اجدامهم دخلت القاع انذار
وضل ميل الزمن يمشي اعله ممشاهم
رتبتهم علم فوق الجتاف يصير
ونشيد الوطن مو دخان بجاهم
العراق براسهم مابيهم زغيرون
ذول الصدق لو قلنه علي وياهم
رسمو خارطه وكتبو عليها الله
اكبر وطن ولده بعلم غطاهم
دمهم والمطر يغسل ذنوب الناس
الشرف يتوضه من يسمع بطرواهم
رغم سلميه وانطو حصة التابوت
فزعولك فرح والموت رداهم
دللو يالوطن فدوه الولد يرحون
الغيره تلولي والكاروك وصاهم
العلم والشيله لو طاحن القطره تطيح
صوت الوالده اعله الوطن رباهم
وقفو عظم هدهد عكس روج الماي
وتوحدو كلهم وطن شفناهم
كلما كبر حبهم جرح ابونه يطيب
وتموت التفرقه الما ترهم وياهم
وجهم مو شمس طلعت على الخضراء
بيض قلوبهم بس سمر يمناهم
شعب ماخوذ حقه شلون عينه تنام
حلات الزلم من تفزع بنخواهم
بعنه ارواحنه والوطن مو للبيع
الفرات ودجله فشله نقول بعناهم
ابدمهم مو حبر خل يكتب التاريخ
هذول الرخصو للموت ملقــــاهم
نشيد الوطن _ الشاعر مصطفى العيساوي لثوار الشعب العراقي في مظاهرات 25 أكتوبر 2019
أنت تقرأ
اناشيد وقصائد واشعاروطنية مكتوبة لتظاهرات العراق
Poesíaالاناشيد والقصائد والهوسات العراقية الوطنية الخاصة بالتظاهرات العراقية
