The True Conqueror [Complete]

Chapter 17

Unicode

"မိစ္ဆာအရှင်သခင်က မသေဘူးတဲ့...သူမသေတဲ့အတွက် လူ့လောကကို ဖုံးလွှမ်းနေတဲ့အမှောင်စွမ်းအားတွေ ကပ်ဆိုးတွေက ပျောက်မသွားဘူး...အဲ့ဒါကြောင့် လူ့လောကရဲ့ဘုရင် နဂါးစီးနင်သူအရှင်က မိစ္ဆာအရှင်သခင်ကို သေစေနိုင်မယ့် ဓားတစ်လက်ပြုလုပ်ခဲ့တယ်...သူကတစ်လတိတိအချိန်ယူပြီး တောအုပ်နက်ထဲက လိုဏ်ဂူထဲမှာ ဓားတစ်လက်သွန်းလုပ်ခဲ့တယ်...ဒါပေမယ့် အဲ့ဒီဓားက မိစ္ဆာအရှင်သခင်ရဲ့ ရင်ဝကို ထိုးဖို့ကြိုးစားနေတုန်းမှာပဲ အရည်ပျော်သွားတယ်...မိစ္ဆာအရှင်သခင်ရဲ့ စွမ်းအားတွေက ပြင်းလွန်းပြီး သူ့ရဲ့ဓားက ခံနိုင်ရည်မရှိဘူး။ ဒီလိုနဲ့ နဂါးစီးနင်းသူအရှင်က ဓားတွေတစ်လက်ပြီး တစ်လက်ပြုလုပ်ခဲ့ပေမယ့် သူက မိစ္ဆာအရှင်သခင်ကို အသေသတ်နိုင်မယ့် ဓားကိုမပြုလုပ်နိုင်ခဲ့ဘူး''

လီချန်းယုံက ဇာတ်ကြောင်းကို စိတ်ဝင်စားစွာပြောပြနေသလို လင်းမိုကလည်း အာရုံမပြောင်းပဲနားထောင်နေသည်။

"နဂါးစီးနင်သူအရှင်ရဲ့ ကြင်ယာတော်က သူမခင်ပွန်းရဲ့ လူ့လောကကို ကယ်တင်ဖို့ကြိုးပမ်းနေတာတွေ မအောင်မြင်တာတွေ သိတဲ့အခါမှာ သူမကိုယ်တိုင် မိစ္ဆာအရှင်သခင်ကို ချုပ်နှောင်ထားတဲ့ မြေအောက်ခန်းထဲသွားပြီး မိစ္ဆာအရှင်သခင်ကို သတ်နိုင်မယ့် ဓားအကြောင်းသွားမေးခဲ့တယ်''
လီချန်းယုံ၏ စကားဆုံးသောအခါ လင်းမိုက မှတ်ချက်ပြုလေသည်။

"သူမက မင်းနဲ့တူတယ်''

လင်းမို၏ စကားကြောင့် လီချန်းယုံက အံ့အားသင့်သွားဟန်ဖြင့် မျက်ခုံးပင့်ပြသည်။
"ဘာလို့လဲ''

"ဘယ်သူက ရန်သူကို ကိုယ့်ကို သတ်နိုင်မယ့် လျှို့ဝှက်ချက်ကိုပြောမှာလဲ...သူမကတုံးလိုက်တာ''

"မင်းမသိပဲမပြောနဲ့...နဂါးစီးနင်းသူရဲ့ ကြင်ယာတော်က မင်းပြောသလို တုံးတယ်ဆိုရင်တောင် သူမက သူ့ချစ်ခင်ပွန်းအတွက် အသက်တောင်စွန့်ရဲတယ်...အဲ့ဒီလို ချစ်ခြင်းမျိုးက နေရာတကာ တွေ့နိုင်ရမယ်ထင်လို့လား''
လီချန်းယုံ၏ လေသံမာမာစကားသံကြောင့် သူဒေါသထွက်သွားသည်မှာ သေချာပါသည်။