على ناصية الحب ..❤ " اسكريبت"

لقاءنا 👫

- البيه فاكر انه لما يلبس بلوفر فوق القميص وكوتشي ابيض .. ويظبط دقنه ويلبس نضارته السوده وكمان يبصلى كده من تحت لتحت .. قال هاخد بالى !!

- نهااااال ؟!

- احم .. انا ممكن اخد قلبي كمان واروحله عادى ..

- طيب وانت متعصبه ليه بقي ؟! ماتسيبى الراجل في حاله .

- مممم .. اصله بصراحه شكلو ءمر اوى النهارده ..

- ايوة ايوة منا خدت بالى ..

- دى مهزله وقله ادب !! مين سمحله يخرج كده من بيتهم .. دا نهاره النهارده اسود منقط بسواد ...

- ياستى اهدى بس وغضي بصرك ولا كأنه موجود !!

- انت هبله يااسراء !! اغض بصرى ازاي يعنى وهو طابق علي قلبى .. دا لو اختفى من قدامى ثانيه بس ببقى زى المجنونه واقول راح فين وجيه منين ..

- بت متجننيش معاكِ ... اهو سي امير بتاعك دا اللى فرحانه بيه هيشيلنا الماده .. اهمدى بقي وذاكري ..

- ياسلام لو يشيلكوا انتو الماده ويشيلنى اانا اسمه  😉

- لااا دانتِ فيوز دماغك ضربت خلاص .. هقوم اجيب حاجه نطفحها قبل السيكشن .. عاوزه حاجه ؟!

فجاة لقيت نفسي بصرخ وبشدها من دراعها
- اسراء الحقى .. البت منار الملزقه دى راحت قعدت معاه ..

- الله يخربيتك وبيت اليوم اللى طلعتلنا بيه بسي امير دا كمان ... ياستى ماتسيبى الناس في حالهم ..

- بصي بصي الحقى دى بتاخد رقمه ولا ايه ... اى جبروت البنات دا !! لا المهزله دى مايتسكتش عليها .. منا مش هقعد اتفرج كده عليهم لحد ما لاقينى بتعزم ع فرحهم ..

مكنتش وقتها شايفه ولا حاسه بنفسي غير انى عاوزه اصرخ للعالم كله واقولهم " امير دا خط احمر واى بنت تقرب منه انا ممكن اكلها بسنانى " .. على ماافتكر ان اسراء حاولت كتير بكل قوتها تمنعنى بس انا لا حياة لمن تنادى .. مافوقتش غير لما لقيت نفسي واقفه على ترابيزتهم وانا مش عارفه انطق ولا كلمه .. هما الاتنين بصولى وكانت منار هتبتدى تتكلم .. لقيته هو قاطعها في الكلام وبيقول لى بثقه
- فى حاجه يانهال ؟!

فجاة نسيت نفسي والدنيا كلها .. ايه دا انت بتقول اسمى عادى كده .. تصدق انا مكنتش متخيله ان اسمه بالحلاوة دى .. طيب قول كده تانى عشان قلبي مش مصدق الاولانى ... فوقت على صوته وهو بيتكىء لورا
- مش نهال بردو ؟!

- اااااه اااه ... د .. دكتور كان عندى سؤال .

- اتفضلى ..

التوتر احتلنى ومابقتش مجمعه الكلام
- اااه .. ااه سؤال في الماده ..

- تمام ... سامعك ..

منار اتدخلت في الوقت دا وهى مش طايقانى اصلا
- انتى مش شايفه انه بيشرحلى ؟!