قصة تشرين
البارت الثاني سواد القلوب
بقلم #zainab_alnajar
نسماتك منعشة ياتشرين تثلج بركان قلبي ولو للحضات.. خذني مع رياحك خذني معك خذني اليك .. اريد الفرار منك اليك
فاطمة صلت الفجر وگاعده بالسطح بعدها مامستوعبه وفاة ابوها دموعها تنزل بسكوت وتفكر بمصيرها
وتناجي رب العالمين يارب انطيني القوة
نزلت جوه بيتهم جبير وكلش حلو وحديقة واسعة ابوها كان صاحب املاك وعنده خير من الله امها تمرضت بعد ولادة اختها اضطروا يرفعولها الرحم وابوها من كثر حبه لامها ماقبل يتزوج
كانت قبل تسمع ابوها يگولها انتي واختج عندي ب 10 ولد .. بعد ما توفى وحست نفسها بدون سند تمنت لو متزوج ابوها وصاير عدها اخ تنسند عليه وتواجه عمها لأناني واولاده ياويلج من الجاي يا فاطمة تتذكر بيوم موت ابوها… .
_ ها سجاد شلونكم عمي .. تگدر تسگيلي البستان يابسة راح تموت اشجارها
_ لا والله ما اگدر .. مو بناتك يعادلن كومة زلم اخذهن يسگن.. والله نطيتك الي عندي عمي وتعرف شرايد
_ عفية والله رجال وتعرف تحاجي عمك بس العتب مو،عليك… راح اشوف ابوك شيگول
_ ابو سجاد شفت ولدك شلون يحجون
_ اي بنات عمهم وحقهم احسن ما تروح فلوس عمهم للغريب يستفيد منها همه احق بيها ..
_ يعني البنية ما تريده هو ابنك شمكمل دراسة ولك بنتي بعد سنة وتتخرج دكتورة .. انطيها لابنك متوسطة ماكمل
_ اي مو گلك انطيني معمل العصائر انت شتسوي بالاملاك ترى اول وتالي انت ورث النا
_ تفاول عليه بالموت يا اخوية كل هذا بتعبي شقا عمري تريدون تورثوني بالحيا .. حسبي الله ونعم الوكيل بيكم ما اريد اني رايح اسگي بعد بيه حيل
…
_ بابا وين رايح صدگ تحجي انطي فلوس لعامل يسگيلك ولاتروح شوف شلون تعبان
_ جنت ناوي ادز عامل بس بعد الي سوا اخوية وولده اثبتلهم بعد بيه حيل .. والله لو ادري بيهم امينين على املاكي اسجلهن الهم بس اخاف عليكم منهم ... رايح اني
_ اوووف بابا اذا تروح ترى اجي وياك والله ما اعوفك
صحت من ذكرياتها على صوت اختها غسق
_ صباح الخير خلي نتريگ ونلحگ على دوامنا صار اسبوعين ما مداوين
_ اي ان شاءالله روحي بدلي اني احضر ريوگ محاضرتي بال9
غسق بصف سادس اعدادي ومثل فاطمة يريدها عباس ابن عمها طبعاً مو حباً بيهن لكن طمع ونشوف عباس هم مثل سجاد !!
فاطمة بكلية الطب هاي اخير سنة .. بشرتها حنطية وعيونها خضراء مثل ابوها عدها غمازه بخدها ضحكتها حلوة والحزن مايلوگلها ورشيقة طولها حلو .. شوية انعزالية تحب تحدد علاقاتها بالناس برغم جمالها بالكلية تفرض شخصيتها والكل يحترمها تتجنب اي شيء يأثر على سمعتها او سمعة ابوها
غسق تريگت واجه عليها الخط وراحت للمدرسة .. وهي هم لبست ملابس سوداء وراحت على كليتها
مر اليوم عادي والكل اجه يعزيها بوفاة والدها ..
خلص الدوام ورجعت شافت سيارة سجاد بالباب
_ استغفرك ياربي شلون راح اخلص منه
دخلت شافت امها واختها گاعدات على الكراسي بالصالة ودموعهن تهل وسجاد يفتر يروح ويجي گدامهن
_ ها خاتونة شو مداومة .. منو سمحلج تطلعين اصلا ،،، ويصرخ بصوت عالي ،،
_ محد يمنعني اني واختي نحقق احلامنا وصية بابا لازم نرفع اسمه حتى بعد وفاته
_ طلعة ماكو ودوام ماكو وشهادة ماكو وغصباً عليكم
،، بهذا الحجي ودخل عمها ابو سجاد ،،
_ عمو عفية احجي انت ويه سجاد تقبل هيج يسوي بينا يعني ابويه مات اعتبرنا بناتك
ابتسم عمها _ عمو شنو تسوين بالشهادة المرأة اول وتالي لبيتها وزوجها وشبي سجاد متقبلين بي ترى بعد مو بكيفج
_ ردتك عون ياعمي .. بس اااخ نكسر ضهرنا بعد من راح ابوية شأحجي حسبي الله ونعم الوكيل
_ ولج تدعين علية صدك ماعرف اخوية يربي اجه يضربها وگفت امها بوجه ..
_ شتريدون من عدنا .. گول اامر كلشي اسوي بس بناتي يكملن دراسة
_ اهاا هذا الحجي الزين .. حتى بس يكملن دراسة مصنع العصائر تتنازلون عنه والزواج مايخالف ااجله هم الخاطر حزنكم على عمي مايخالف
_ لا هواية عنده خاطر عمك يمك
اندارت امها عليها _ اسكتي فاطمة .. صار موافقين بس التنازل يصير عند محامي وتكتب تعهد يكملن دراستهم وتعهد يتصدق عد كاتب عدل
_ ماشي هاي سهلة .. يالله يابه نروح .. باجر اجي الصبح اخذكم وتتنازلون يالله اداومن
..
_ ليش ماما هذا تعب ابوية تتنازلين عنه ليش
_ المال يروح ويجي بس شهادتكم سلاحكم يا ماما.. كملوا هسه ويحلها الي ما يترك عبده
_ يارب شأتحمل بعد وشأشوف اكثر
..
..
غيرت ملابسها ونزلت بالحديقة حتى اكل مگدرت تأكل .. تباوع للسما وغيوم تنتشر كأنما حتى السما حزنانه عليها .. دخلت شافت امها واختها نايمين لبست صايتها وحجابها وطلعت .. تمشي ودموعها تنزل ماحست غير رجليها اخذتها گدام باب البستان .. فتحتها وگعدت وين جانت هي وابوها اخير مره تشيل تراب الگع وتشمة دور على ريحته وصارت تبجي بصوت عالي تريد اطلع كل حسره بصدرها رجعت راسها على جذع نخلة قريبه منها وبدأت تحاجي ابوها
ماردت القدر يبعدني عنك يوم
ومـاردت السعــادة تعــوف بيبـــاني
ياليل ألاماااااان الماتمرّه غيوم
وياحظــرة حنين بحظنـه دفّــاني
ياأجمل قصيدة وبالوزن محكوم
وياأروع ندى اعلى أوراق بستاني
يانبع الكرم محتااااجتك هاليوم
مو تدري بغيابك طاحت أركاني
ياأجمل حلم وسط الجفن مرسوم
رحت والصور ظلت فوك حيطاني
الك حنيت يابوية اعلى بختك كوم
عفتني ويتمتني وضــاع عنــواني
أفز من نومي وأسمع صوتك المهموم
وأفكدك وأرجع أغرك ويه أحزاني
صرت أنعاك وأبجي اعليك من دموم
وآنه القلم صــــار اليــوم ينعــــاني
امير جان قريب يتمشى ترك اثير لان جان يتصل بحبيبته وخلاه ياخذ راحته .. سمع صوت بجي من بستان ابو فاطمة واخذه الفضول لهناك ..
بدون كلام گعد شوية بعيد عنها هي بعالم ثاني
_ لاتبچين كافي
_ يابه حتى اتخرج واصير دكتورة يريد المصنع
_ مايخالف خلي يأخذه
_ يابه مو ضلم .. حتى عمي المفروض سند .. يابه ليش ماعندي اخ
_ امر الله لازم تصيرين قوية هذا امتحان
_ امتحان صعب والله ماعاد اتحمل .. يريد يتزوجني سجاد غصب عني يابه جنت توگف بوجهه هسه منو يخلصني منه
_ ربج مايگطع .. اكو من يصيرلج سند .. گومي ارجعي صار المغرب
فزت وتتلفت .. گامت وگفت بسرعة
_ انت من شوكت هنا
_ لا تخافين فاطمة اني امير تتذكريني
_ اي اتذكرك… بس خلي اروح اذا احد شافنه هسه يسوي قصة ومابيه حيل بعد .. بس گولي انت الحاجيتني ؟ ليش حسيتك ابوية .. تركته ومشت قبل لايجاوبها
راح على اثير وصاحبهم علاوي هم موجود .. ما حجالهم اي شيء وخله فاطمة وكلشي يخصها بگلبه
اثير يحب بنية جيرانهم وجان بذلك اليوم امه واخواته رايحين يخطبوها وحيل فرحان .. علاوي صاحبهم خوش ولد بس ما مكمل دراسة مثلهم بس تجمعهم حب منطقتهم .. دائما امير يحس بعلاوي يستحي منه علاقته بأثير غير شكل
امير سلم عليهم ورجع لبيتهم ثاني يوم يلتحق وتقصد يمر قرب بيت فاطمة وشعور غريب بداخله مايعرف شنو شفقة .. وعجز عن مساعدته .. وشئ جديد بگلبه ..
دخل بيتهم خالته وخطيبته موجودين سلم عليهم وراح يسبح ماكو اي مشاعر لبت خالته بداخله مايعرف شيسوي وشلون طاوع امه وحتى هي بارده وياه ..
يارب حلها من عندك
.....يتبع.....
أنت تقرأ
قصة تشرين بقلم Zainab Alnajar
Short Storyقصة اجتماعية قصيرة تتحدث عن ظلم الحياة لفتاة تناقضات حياتنا كأنت يا تشرين تُرينا الفصول الاربعة في يوم واحد امل تضحية حب حلم عاطفة عرفان غدر قوة محبه
