قصة تشرين
البارت الرابع ما اقساه تشريني
بقلم #zainab_alnajar
لا اعلم لما اصبحت افتقدك .. أ أُكذب نفسي بأني لا ابحث عنك ؟ .. لا لا لست ابحث عنك !!
اذاً ما بال هذا الساكن في يسار صدري يطلبك ؟
_ شلونج فاطمة
_ اهلا عباس زين اجيت من رخصتك صديقتي راح تبقى واقفه يمي محد يدري انت ابن عمي وماريد احد يجيب اسمي
_ ولو كلامنا عائلي بس على راحتج
_ صديقتي غريبة مو من منطقته اطمأن.. المهم .. عباس احجيلي الصدك
_ شوفي اني اگدر ما اجي واگدر اخذ غسق غصب بس انا مو مثل سجاد وابويه وياريت عندي سلطة عليهم او اگدر اواجهم .. اني من صدگ احبها بس نتزوج اخذها واروح بعيد وما ابقى هنا وماريد شي من املاك ابويه تدرين بيه اشتغل بميناء ام قصر واروح هناك واخلص .. اريدها طلع معدل عالي واقدملها كلية هناك اريد بداية جديدة الي بعيده عن جشعهم
_ لعد اذا انت هيج ليش ما ساعدتنه خليتهم يهينونا وبعدهم مستمرين وياخوفي من الجاي
_ حاولت هواية بس ماگدرت والي براسهم يسوو
_ زين راح اصدگ كلامك هسه بس اثبات الي تشجعها تقرأ وماتلتهي بتلفون وغيرة... ورجاءا سالفه زواجكم اجلها حالياً هسه اخوك يتذكر هو هم واني اريد اكمل هالسنة واتخرج وبعدين اشوف شنو اسوي وياه 😔😔
_ ماشي مايصير الا الي بخاطرج
...
..
رجعت فاطمة من الكلية مرت السيارة قرب بيت امير شافت هوسة بابهم وناس هواية .. حست خوف بداخلها وقشعريرة سرت بجسمها .. يارب خير
_ هلو فاطمة بشري اجه عباس وشگال وشگلتيله
_ ولج على كيفج خلي اگعد
_ احجي عاد فدوه
_ والله انتظر تكملين وبمعدل عالي يالله اقبل
_ عابتلج .. عليج الله مو يختلف عنهم .. حسيتي صادق بكلامة
_ الايام الي تكشف بس اكيد مو مثل هذاك الهمجي اخوه .. الله كريم ربج يسهلها الوكتها بس اكيد مو هسه ،، دخلت امهم ،، ماما شنو السالفة شكو بيت ام امير
_ امير بالواجب داخل بيت وطلع مفخخ
_ لا ماما لا تگوليها 😢😢😢
...
..
،،،،
_ اووووف غير يطلع الدكتور عاد صارله 5 ساعات بغرفة العمليات ،، اگعد عمي ابو امير ان شاءالله خير امير قوي
_ اثير تصبرني لو،تصبر روحك هذا حزام ضهري وليدي الماكسر كلمتي بيوم اضربه ويبوس ايدي منو عندي اني .. اخوه 7 سنين عمره گلت زوجت خواته ارتاحيت من المسؤوليه شوية يگوم القدر يكسرني بي .. كم مره كلتله ماعندي غيرك اگعد واشتغل اي شيء
_ عمي گول يالله اني وين رحت .. هذا دربنا احنه مشينا بي حياتنا بنص الفشگ وبكل لحضة نتوقع الله يأخذ امانته اذا امير يگعد واني اگعد منو يدافع عن ارضنا .. ولو رحنه تبقون طول العمر راسكم مرفوع بينا وامير ان شاءالله عمره طويل وانت تزفه بأيدك .. اي هاي الدكتور طلع ،، ركضوا عليّه ،،
_ بشر دكتور
_ والله سوينه العلينا والباقي على الله راح يبقى بالعناية المركزة .. رئته متأذيه ، شضايا بجسمه .. وعنده كسور بضلعين وايده بلاتين لان عظم متهشم
ننتظر استجابه جسمه يومين ونشوف ..
_ نگدر نشوفه
_ لا حالياً ممنوع بس من خلف الزجاج ممكن تشوفوا من يخلوه بالعناية المركزة .. ادعوله .. من رخصتكم
***
مرت الايام على اهل امير واحبابة هواية صعبة دموع .. دعوات .. وحسرات .. والم .. وفاطمة وحدة منهم .. ماتعرف ليش تمنت تشوفه وتعرف شلونه .. ليش هيج يهمها ؟ ..
هناك احساس يفوق اجمل احساس بالحب هو… . الامان
أنت تقرأ
قصة تشرين بقلم Zainab Alnajar
Short Storyقصة اجتماعية قصيرة تتحدث عن ظلم الحياة لفتاة تناقضات حياتنا كأنت يا تشرين تُرينا الفصول الاربعة في يوم واحد امل تضحية حب حلم عاطفة عرفان غدر قوة محبه
