قصة تشرين بقلم Zainab Alnajar

البارت السادس

قصة تشرين
البارت السادس تحت أمر القدر
بقلم #zainab_alnajar

تحت امرك سأكون ياقدري .. ماذا سيحدث أكثر !!

_ اگولك غصباً عليها قبلت تگدر تعارض ..،، سجاد سكران يتمشى هو وصاحب الي قذر مثله ويضحكون ،،
_ اي ادري بيك سبع ليش انت شوية ،، مستمرين يضحكون مشيتهم مو سويه يميلون يمين ويسار الوقت تقريباً نصف الليل هدوء وبشر قليل بالشارع ..  فجأة اثنين ملثمين وبأيد كل واحد عصا ضهروا امامهم
_ اگولك سجاد هاي شنو الشرب خلا عيوني تغوش هذوله منو ،، قبل مايجاوب سجاد بدأ الضرب طبعاً صاحبه اخذ ضربه وحده ونهزم وهم متقصدين سجاد
_ انتو منو ليش تضربوني .. اخ يابه لك عوفوني ،،، مانطقوا ولا حرف واحد منهم رمى العصا وصار يضربه بأيده وبكل قوة وحرگه وانتقام لحد ما فقد
– شسويت امشي نروح لا يموت بأيدك دينزف
_ ياريت يموت واخلّص العالم من شره
_ حرامات ندخل سجن علمود هيج واحد
_ امشي نروح هذا صاحبه هسه بلغ اهله
عرفتوهم اكيد .. اي هم امير واثير .. انتقموا الفاطمة او يمكن انتقموا النفسهم لان عاجزين عن مساعدتها
مشاعرهم اثنينهم خالية من اي عاطفة غير الغيرة والحميه على مظلومة مستضعفه جار الاقربون بيها .. بس بقت كلمات سمعها أمير من كان سجاد يحاجي صاحبه يگوله غصباً عليها قبلت .. ياترى يافاطمة صدگ قبلتي تتزوجين هذا القذر !!
لا فاطمة لا تسويها .. صيري قوية

..
…
مر تقريباً شهر على هذا الكلام .. وهاي فاطمة وامها واگفه بالصالة تباوع على كل ركن وكل زاوية بالبيت الي تربت وعاشت بي هنا ضحكت وهنا تلگت ابوها وهنا زعلت .. شريط حياتها ينعاد گدام عيونها لحد ما وصلت يوم امس وغسق لابسه البدله البيضاء واجه اخذها عباس ودموع غسق وتوسلها بيهم يجون وياها يبتعدون ويبدأون من جديد بس فاطمة جانت متأكده اذا تروح وياها مراح يتركها سجاد وهذا كان شرطها . .. تتنازل عن كلشي وتترك البيت بعد عرس غسق  …  دموعها تنزل تمسح دمعه تنزل عشرة وامها نفس الشيء..  جنطه كل وحده بيهن يمها وكل وحده تودع البيت بطريقتها دخل سجاد بعكازته لان رجله مكسوره وايده رافعها  و اثنين من اضلاعة هم مكسورة بعد الكتله من امير واثير
_ هاي شنو بالجنط . .. گلتلج تطلعون بملابسكم
_ هي هاي بس ملابسنا اذا تحب هم نعوفها عادي تفيدك هم تبيعهن پاله
_ تستهزئين حضرتج ترى بعدها روحج بأيدي
_ روحي بس الخلقني يأخذها . .. شتريد بعد مو تنازلنه عن كلشي مثل ماتريد…  لا تتصور بعد اكو صله تربطني بيك التعهد الي سويته بعدم التعرض ترى اگدر اشتكي عليك واوديك وره الشمس
_ تهددين ولج ، ،، تقرب يضربها ودخل ابوه ،،
_ سجاد .. عوف بت عمك كافي
،، ابتسامة نرسمت على وجها هي وامها يارب صحا ضميره بأخير لحضة ،،
_ عمو عرفت انت راح تنصفنا
_ شأنصفكم عمي انتِ اختاريتي لو قابله تتزوجون ماجان صار كل هذا 😏
_ لعد جيت شتريد .. تتشمت !! اني عرضك عمي هيج عندك عادي تشمرني بالشارع ؟
_ كافي تتفلسفين نعرف مثقفه نطيناج حل وانتي ماقبلتي اما ليش اجيت .. عيني ام فاطمة اريد سويجات السيارات الحمل والصالون . ها وصدگ المرحوم جان عنده مسدس هم اريده
_ الله اكبر عليك .. الله ينتقم منكم .. الله موجود تطلع حوبتنا بيوم حسبي الله ونعم الوكيل حتى ذكرى ماتخلينه منه
_ كافي حجي زايد جيبيهن ويالله من غير مطرود
،، طلعت فاطمة وامها اخذت تكسي ماتعرف وين تروح .. فكرت تروح الخوالها بس بنفس المنطقة وماراح تخلص منه وهم مايگدرون عليه ناس على گدهم .. اجتي على بالها صديقتها بيتهم بمركز المدينة وماعدهم احد بس هي وامهاه وابوها .. راحت وهي خجلانه شتگولها
_ حبيبتي فطوم صدگ تحجين ياريت تبقين ويايه وبلكي تطلع الاقامة مالتنه سوا وامي لوحدها وامج هم يتسلون سوا
_ لا حبي رهومه بس شوفيلي بيت او  مشتمل ايجار يمكم وياريت لو مؤثث
والده رهام صديقتها _ والله قصتكم تبجي الحجر صدك اكو هيج بشر .. تبقون يمنه معززين مكرمين شگد ماتحبون وهذا بيتكم
بقت بيت رهام كم يوم ودورت على بيت صغير ايجار على گدها هي وامها وزين كان مؤثث باعت ذهبها وذهب امها بس هذا طلعت بي لان ما اجه على بال عمها وسجاد برغم مو ذاك المبلغ الكبير بس خلته جوه ايدها للأيام الجاية الحد ما تجي مباشرتها بالمستشفى دكتورة مقيمة وتبدأ تستلم راتب .. بعد تقريبا عشرة ايام بدأت دوام وبداية حياة جديدة وياها .. عاهدت نفسها تكون قوية وكل المر بيها زادها صلابه .. يمكن بعد خسارتها حياتها كلها لأجل حرية فكرت بعد ماكو شي اكثر تخسره .. برغم لحضات ضعف من تكون لوحدها تنزل دموعها و تتذكر ايام دلال والدها وكل ذكرياتها بس من تسمع وتشوف حكايات غيرها تحمد الله لان هي على الاقل عدها شهادتها وامها وياها وتأمل نفسها لابد يجي يوم يرجع الحق لأصحابه…  الوحيد الكانت تتمنى تشوفه هو امير وخصوصاً بعد ما انتقم من سجاد تبتسم وهي تتذكر شكل سجاد وهو متكسر يشفي