#احببتك_انت
#جيانا
.
.
رنا :
مرت يومين واني ملتهيه بالجهاز
اطلع و اطب وي مرت عمي نشتري
اخذت كل اللي بخاطري بس بالمعقول
و رزاق ولا قصر وياي أبد
حبيت مداراته الي
لأول مرة احس اكو احد يريد خاطري بس
من كتله يتمم العرس و هو فرحان
يروح الصبح للدوام يرجع العصر
ينام شويه و انوب يطلعنه
اليوم وحدنه طلعنه
كال نروح نختار الغرفه
فترينه شارع المعارض كله بس محبيت وحدة
وكأن كلهن بشعن بعيني ولا وحدة تعجبني
تالي كتله رجعني وتعال اخذ على ذوقك
اني احتار من اشوف هوايه
ضحك عليه و غيرنه الطريق نرجع
سفط على الشارع نزل جاب لفات برغر و كولا
و رحنه على الشط هناك نتعشى
كعدنه بجهه هادئه كلش
بس صوت الحشرات و الهوة و انفاسه
ناكل بهدوء و الصمت سيد الموقف
انتبهت اني مركز عليه و أكل
هو ولا صدلي أبد نظرة كله كدام مركزة
كملنه اكل و اخذ قواطي الكولا ذبهن واجه كعد
و بقه هذا الهدوء قائم قريب عشر دقايق
حسيت عليه ايديه لمست ايدي
وشابك اصابعنه سوة و نظرة ما وجهه الي
عيني بقت بين ملامحه و بين ايدينه
رزاق .«من توفه عمي و مرت عمي و شفتج بوفاتهم ، من وقتها كلت رنا تكون مسؤوله مني
اخذت عهد انه اكون سندج من بعد عمي
بيوم رجعت من الدوام لليت جدي و شفت خالج قاسم ماخذج عندة وي ابنه هنا عقل مبقه براسي
حجيت وعصبت و كتله لابويه اني اريدها
كال وصيه عمك هيج تكول
نقهرت لأن عهدي نكسر ، خذلت نفسي بأول عهد
كبرت و كبرتي ومرت سنين
بيوم شفتج ابيت اخوج و حسيت بمشاعري بعدها طلبتج منه ، و الفاجأني هو ابراهيم كال خبر خالي و اطلبها منهم أول
تمالكت نفسي و رحت ، اسمع منا ومنا عن بطولاتج ماشالله
و بيوم عقد بت خالج طلبتج منهم
محمد كال ابويه و جديتي كون يوافقون
عصبت حيل لان احنه اولى بيج منهم
احنه اهل ابوج وهم مالهم حق يعترضون
تحملت لحد ما ردلي انه موافقين وتعال بس تبقى الموافقه الأخيرة الج ..
تدرين بشنو فكرت رنا؟؟ كلت حت لو ما ترضين
مستعد اجبرج جبر بس مهم تكونين بإسمي »
جان يحجي و نظرة بين الشط و السمه
ولا صدلي ابد بس ايديه تشد على ايدي
رنا .«وهاي انت جبرتني و خليتني باسمك»
رزاق .«صح ، بيوم عقدنه خليتيني اقسي وياج غصب عني ومع هذا فرحتي ما نطيتها لأحد
لأن حصلت البنيه اللي شغلت عقلي 9سنوات
بقتلي خطوة وحدة وبس .. جبتج لهنا حت نصفي كلشي بينه »
دار عليه وتلاقت نظراتنه
لأول مرة اصد عينه و كلبي يخفق سريع
شكد تصدف اباوع بنص عيونه
بس ولا احس بهالشعور ابد
نزلت نظراتي ورجع شد انتباهي من جديد بكلامه الي و نبرته
رزاق .«من يوم اللي ملكتج وأني صاد روحي عنج ، انيمج بحضني و نترادد و نعاند بس ما حاولت افرض شخصيتي عليج من البدايه وانتي كارهتني هالكثر ..
رنا هسه رح يتم الزواج و كلشي يتغير
رح يصير بينه حقوق و واجبات
رح يصير بينه ثقه واجب تنصان مهما يكون
لو نكسرت الثقه بينه ، صدكي لو نعيش بعد مليون سنه يستحيل ترجع تترمم
اتمنى تفهمين كلامي هذا ، عندج شي نتناقشه يلا ننام ، نصفي كلشي
اريد اليوم نرد و باجر نبدي من الصفر
نحب بعضنه و نصون كلامنه لبعضنه
بعدج يمكن ما تعرفيني عدل
اني غيور رنا كلش أغار
احب يصير اهتمامج إلي بدون احد يشاركني
احب ارجع الكاج بالبسمه الحلوة بدون عصبيه
احب احبج براحتي ، وقت اللي اشتاق الكاج
لحد الان اني ممسوي اي شي من اللي يسووه اي مخطوبين او متزوجين بس حت تاخذين وقت ، بس ورة زواجنه هذا كله يتغير لان رح اطمع بحبج»
أنت تقرأ
احببتك انت
Romanceالقصه باللهجه العراقيه تفاصيل بين ثنايا الحب ايهما انت منهم ؟؟ دائما نسمع ، زواج التقليدي مو ناجح لان ماكو تفاهم مثل ما نتزوج عن حب وزواج الحب مو ناجح لان بعد الزواج يموت الحب وهيج الحب اندثر بين هذا و ذاك وشنو اللي رح يصير هنا ، زواج تقليدي ي...
