ချန်အန်း မြို့သည်နန်းမြို့တော်ကြီးဖြစ်သည့်အလျောက် စျေးလမ်းမကြီးတခုလုံး ရောင်းသူဝယ်သူတို့ဖြင့် ကြက်ပျံမကျ စည်ကားလျက်ရှိသည်။ စျေးဝယ်ထွက်လာသည့် ချစ်စဖွယ် လှပျိုဖြူလေးများထံမှ မျက်နှာချေ နံ့ နှင့် အမွှေးအိတ်နံ့ တို့ကလည်း လမ်းဘေးဝဲယာရှိ မုန့်ပေါင်းဆိုင် မန်ထိုဆိုင်တို့မှ မုန့်အနံ့တွေနှင့်ရောနှောကာ တမျိုးစားချင်စဖွယ်မွှေးပျံ့ကာအာရုံကိုကလူကျီစယ်နေပြန်သည်။ စျေးနေ့မို့ လှုပ်ရှားနေကျ စျေးဂျပိုး ကလေးတသိုက်ကလည်း ဆိုင်ပိုင်ရှင်များအလစ်ကိုချောင်းကာ ခပ်သွက်သွက်လှုပ်ရှားနေကြသည်။
ထိုသို့အရပ်လေးမျက်နှာတခွင်လုံး လှုပ်လှုပ်ရွရွဖြစ်နေသော်လည်း ကျောက်ရုပ်ကဲ့သို့ငြိမ်သက်နေသည့် လူတယောက်ရှိသည်။ ၎င်းသည် ထီးတချောင်းကို နောက်သို့ခပ်လန်လန်ဆောင်းထားကာရှေ့တူရှုရှိ " ပျော်ပျော်ရွှင်ရွှင် စားသောက်ဆိုင် " ဆိုသည့် ဆိုင်းဘုတ်ကို မမှိတ်မသုန်စိုက်ကြည့်နေသည်။ အတော်ကြာတော့ ဆိုင်ထဲရှိစားပွဲထိုးလေးလည်း ထိုလူကို သတိထားမိဟန်တူသည်။ ခုံသုတ်ဝတ်လေးကို ပုခုံးပေါ်တင်လျက် ဆိုင်ရှေ့သို့အပြေးတပိုင်းထွက်လာသည်။" ဘာများအလိုရှိလို့ပါလဲ ...."
စားပွဲထိုးလေးက စကားမဆက်မီ ထိုလူအခြေအနေကိုတချက်အကဲခတ်လိုက်သည်။
အဖြူနှင့်ကြည်ပြာရောင်ကို ရောယှက်ထားသည့် တန်ဖိုးကြီးပိတ်စအပေါ်မှာမှ ငွေချည်အချို့ကို လည်ပင်းနေရာနှင့် လက်အနားစတို့တွင် သေသပ်ကျနစွာချုပ်လုပ်ထားသည်။ ဆံပင်ကိုနောက်ကနေ ခပ်မြင့်မြင့်စည်းနှောင်ထားသည့်ဆံညှပ်မှာလည်း အလွန်လက်ရာလှပလွန်းသည်။ ချန်အန်းတမြို့လုံးမြေလှန်ရှာရင်တောင် ဒါမျိုးဝတ်ဆင်တတ်သူ တွေ့နိုင်မည်မထင်။ ဆွေကြီးမျိုးကြှီး လူကုံထံအသိုင်းအဝိုင်းက သခင်လေးတယောက်ပဲဖြစ်ရမည်ပေါ့။" အထဲကိုကြွပါ သခင်လေး ... ကျတော်တို့ဆိုင်က ဟင်းတွေကသန့်ရှင်းလတ်ဆတ်အရသာရှိပါတယ်ဗျ ... ချန်အန်းတမြို့လုံးမှာအကောင်းဆုံးဆိုင်ပါပဲ... စားသောက်ရင်းနဲ့လဲ ပုံပြောဆရာ အသံကို နားဆင်နိုင်ပါတယ်"
YOU ARE READING
The Owner of Icy Heart
Romanceရေခဲနတ်ဝိညာဥ်ရှောင်ပင်းရန် ကိုအထက်ဘုံကပေးသည့်တာဝန်မှာ လူ့ပြည်သို့ဆင်းကာ ဘုံကိုးခုအနာဂတ်အတွက် ရွှယ်ကွမ်းနတ်စစ်သူကြီးကိုကောင်းကင်ဘုံသို့ပြန်လည်ကြွမြန်းနိုင်ရေးကူညီပေးရန်ဖြစ်၏။သို့ပေမယ့် နှစ်ဦးကြားကံကြမ္မာက... " ရွှယ်ကွမ်း! ခင်ဗျားက ကျနော်သိခဲ့တဲ...