ရှေ့သို့နာရီဝက်ခန့် တောလမ်းလေးအတိုင်း ဆက်လျှောက်လာလိုက်တော့ ရေညှိအလိမ်းလိမ်းတက်နေသည့် ဂူကြီးတဂူကိုတွေ့လိုက်ရသည်။ ဂူပေါက်ဝမှာ တိုက်ကပ်နွယ်ပင်အချို့ကြောင့်ရှုတ်ထွေးနေပြီး ဂူတွင်းထဲသို့ပင် မမြင်ရသလောက်ဖြစ်နေပြီ။ လူသူကင်းရှင်းသည်မို့စိတ်ကျေနပ်သွားဟန်ဖြင့် တချက်ပြုံးလိုက်ပြီး ဂူအတွင်းကို ဝင်လိုက်သည်။
" ဂီး....ဂီး...."
" ဖလတ်....ဖလတ်..."
လူဝင်လာသည်မို့ အိပ်စက်နေကြသည့် လင်းနို့တသိုက်က ကြောက်လန့်တကြား မြည်သံပေးကာ အုပ်လိုက်ကြီးထပျံကြသည်။ ဂူတခုလုံးလည်း လင်းနို့အညစ်အကြေးများဖြင့်ပြည့်နှက်နေ၏။ တကူးတက လှည်းကျင်းမဲ့သူမရှိ၍အနံ့အသက်ကလည်းမကောင်း။
" ဟွန်း...ပြောတော့ဒီမှာသရဲရှိတယ်ဆို...အဲ့ဒီသရဲက အလုပ်မလုပ်ဖူးထင်တယ်... ကိုယ်နေတဲ့နေရာကိုတောင် ရှင်းလင်းရကောင်းမှန်းမသိဘူး အသုံးမကျတဲ့ သရဲပဲ "
" နင် ဘာပြောလိုက်တာလဲ ! "
"........"
မိန်းကလေးအသံပီပီသသကြီးက ဂူနံရံတွေမှတဆင့်ကျောချမ်းဖွယ်လွင့်ပျံလာသည်။ လူရိပ်လူခြေကတော့ မြှူမှုန်ပင်မတွေ့ရ။ သာမန်လူဆို ကြောက်စိတ်ကြောင့် ခွေးပြေး ဝက်ပြေး ပြေးနေလောက်ပြီ။ ပင်းရန်တချက်ဟက်ကနဲရယ်လိုက်ပြီး
" သြော်....မထင်ထားမိဘူး....သရဲက မိန်းကလေးဖြစ်နေတာကိုး .... အဲ့ဒါဆိုထင်ထားတာထက်အခြေအနေပိုဆိုးနေတာပဲ ... ဧကန္တ .... ဒီလိုအိမ်တွင်းမှုမနိုင်နင်းပုံမျိုးနဲ့ဆို အိမ်ထောင်မပြုရသေးဘဲသေသွားလို့ မကျွတ်လွတ်နိုင်တဲ့ သရဲပဲဖြစ်ရမယ်..."
".....နင်!... သေဖို့ပြင်စမ်း!..... "
"...... ရွှီး ....ဝှစ်...ဝှစ် ! "
သရဲမ၏ကြိမ်းဝါးသံနှင့်အတူ ဂူမျက်နှာကြက်အထက်မှကျောက်စက်ပန်းဆွဲတချို့ သူ့အပေါ်ကိုပြုတ်ကျလာသည်။ ကိုယ်ကို အသာလေးတိမ်းရှောင်ကာ နံရံဘက်သို့ကပ်လိုက်သည်မို့ ရှရာလေးတောင်ထင်မသွားခဲ့။ ဂူအတွင်းတုန်ခါမှုတချက်ဖြစ်ပေါ်သွားပြီး ကျောက်စိုင်ခဲများက ပင်းရန်ကိုဦးတည်ကာ အရပ်လေးမျက်နှာမှ လွင့်ပျံရိုက်ခတ်လာကြသည်။ ဒီတခါတော့ရှောင်မနေတော့ပဲ ညာလက်ကိုတချက်ဝေ့ယမ်းလိုက်ရုံဖြင့် ထိုကျောက်စိုင်များကိုအစိတ်စိတ်အမွှာမွှာဖြစ်စေလိုက်သည်။
YOU ARE READING
The Owner of Icy Heart
Romanceရေခဲနတ်ဝိညာဥ်ရှောင်ပင်းရန် ကိုအထက်ဘုံကပေးသည့်တာဝန်မှာ လူ့ပြည်သို့ဆင်းကာ ဘုံကိုးခုအနာဂတ်အတွက် ရွှယ်ကွမ်းနတ်စစ်သူကြီးကိုကောင်းကင်ဘုံသို့ပြန်လည်ကြွမြန်းနိုင်ရေးကူညီပေးရန်ဖြစ်၏။သို့ပေမယ့် နှစ်ဦးကြားကံကြမ္မာက... " ရွှယ်ကွမ်း! ခင်ဗျားက ကျနော်သိခဲ့တဲ...
