السادس عشر
تحاول ناريمان يوميا الاتصال علي سليم دون فائدة فهو يتجاهل اتصالاتها ويخاف بشدة من غضب نداء.. فهي تتصل يوميا بسولي وجميلة وتتعمد تجاهله
مر اسبوع استيقظ سليم صباحا علي صوت جميلة توقظه بصوت عالي وحاد
جميلة : قوم يادكتور يامحترم
سليم : خير يا ماما في ايه سولي كويس
جميلة : سولي كويس.. ايه اللي مكتوب عالنت ده صورة حضرتك انت واللي اسمها ناريمان مالية الدنيا وقال ايه حضرتك خطبتها بعد قصة حب كبيرة
سليم : ايه يا امي الكلام الفاضي ده عالصبح
جميلة بحدة : مش كلام فاضي انت السبب ادتلها فرصة تقرب واتسببت في بعد مراتك عنك والمفروض كنت توقفها عند حدها.. تقدر تقولي الكلام ده هتبرره لمراتك ازاي.. وصورك انت وناريمان دي مش حقيقة يعني كنتو بتخرجو مع بعض
سليم : والله يا ماما ما حصل انا خرجت معاها مرة واحدة ووقتها قابلني نديم اخو نداء وشدينا مع بعض بس وقتها انا مهتمتش بالعكس قلت ياريت يقول لنداء علشان تبعد عني وقت ما كنت مفكر اني مريض
جميلة : عمرك ما خيبت ظني فيك يا سليم عمرك ما خذلتني بالشكل ده.. ايه اللي انت وصلتنا ليه ده هتواجه مراتك ازاي بس
خرجت جميلة وتركته يشعر باختناق وضيق قاتل
تجلس ناريمان تضحك بصخب وتتحدث لاحدي صديقاتها
ناريمان : بجد يا منار فكرتك دي هايلة.. حتي لو سليم مش ليا كفاية اني احرق دم نداء دي واعرفها اني مش هسيبها
منار : قلتلك متقلقيش اللي زي الدكتور بتاعك ده شوية شوية هيزهق من كتر الخناق والمشاكل وبكرة هو اللي يجري وراكي.. بس انتي خليكي وراه
ناريمان : ياريت يا منار متتخيليش هو عجبني ازاي هموت عليه وهو مش معايا خالص
افاق سليم من تفكيره علي صوت الهاتف ليجد اتصال من نديم.. هل علمت نداء بما حدث
يجلس مهاب وزينه والتوتر واضح بملامح مهاب
زينه : وبعدين يا مهاب اعتقد المرة دي نداء مش هتسكت انا بصراحه هتجنن تفتكر سليم يعمل كده
مهاب : طبعا لا ناريمان دي عقربة انا اصلا مكنتش برتاح لها نهائي.. دنيا كانت ماشية وراها في كل حاجة
زينة بغيرة : لا والله يعني دنيا كانت ملاك برئ
مهاب : زينة احنا في ايه ولا ايه.. انا هقوم اسافر لسليم لازم افهم منه واشوف هيتصرف ازاي
زينة : اعمل اللي يريحك المهم تشوف حل قبل نداء ما تعرف ده لو كانت لسه معرفتش
نديم : متقلقش يا سليم انا متصل علشان اباركلك عالنونو الجديد.. نداء تعبت باليل ورحنا المستشفي والحمد لله ولدت
سليم : هي كويسه يا نديم
نديم : كويسة والبيبي كويس.. هيكون اسمه ايه بقي
سليم : هي اللي هتختار الاسم احنا متفقين علي كده
نديم : تمام ربنا يباركلكم فيه وفي اخواته
سليم : متشكر يا نديم عقبالك في حد جنبك وانت بتكلمني
نديم : لا انا بالبيت باخد لبس لماما ولنودي
سليم : طيب اسمعني كويس علشان محتاجلك ضروري
في المنيا يجلس صفوت مع شقيقته هدى ويبدو عليه الغضب
صفوت : الواد سليم اتجنن ولا ايه.. مين اللي معاه في الصور دي وازاي يسيب مراته يا هدى
هدى : سليم ميعملش كده ابدا يا صفوت.. دي اشاعات حد غرضه يوقع بينه وبين نداء.. ومهاب بيلبس هدومه ومسافرله
صفوت : ربنا يعديها علي خير.. حسن النهاردة هيروح يشتري الشبكة هخليه يعتذر من اهل العروسة وناجلها
هدي : لا يا ابو حسن احنا اجلنا كتير خليه يفرح ويتهني ولا كأن حاجة حصلت علشان محدش ياخد باله مش عاوزين فضايح عالفاضي.. والله يا صفوت انت طبعك غريب مش كنت عاوز سليم يتجوز علي نداء
صفوت : يا هدى سليم عندي زي حسن وكان نفسي ربنا يكرمه ويرزقه بالخلف الصالح يبقوا عزوته والحمد لله ربنا كرمه ومراته خلفت مرة واثنين ده غير انها حلوة ومؤدبه
أنت تقرأ
وصفولى الصبر 2
Romanceالمقدمة تجبرنا الحياة اغلب الاوقات على اتخاذ قرارات نندم عليها لاحقا ولكن مرات تكون تلك القرارات قاتله للنفس والروح ومن يحب بصدق هو من يستطيع ان يقاوم تلك الظروف حتى وان قهرته في البداية لا يستسلم بل يحارب بكل قوته من أجل من يحب حتى وان أضاع سنين لا...
