''Recueil De Nouvelles'' (Nouvelles Terminées)

12 janvye 2010

* Nouvelle #2: 12 janvye 2010*

Synopsis: Yon dram, yon sikatris ki make chak ayisyen nan yon fason ou yon lòt.

Yon ti panse pou tout viktim...

Li te ka nan 4 è konsa, Melani te chita sou yon ti chèz pay nan lakou lakay li ak ti sèl la kap etidye. Li t'ap gade fèy korosol yo ak kokoye ki t'ap balanse sou yon bon ti van.

Gran sèl la Adelin, te ale gade feyton kay vwazin nan, manmanl ki te fèk sot vann nan mache t'ap fè yon ti degage nan kwizin nan.

Se te yon jou tankou tout lòt e tout bagay te sanble byen kalm. Melani, t'ap reflechi ak avni li. Ou te ka tande plenn li yo chak detanzantan.

"Eske yo pap voyel tounen demen lekòl la? Lèl fini ak ki mwayen li pral etidye? Ohhhh si sèlman m te tankou tout lòt yo ki fèt nan yon fanmi rich e papam te la!!!!"

Kòm toujou menm panse yo tap toumente lespril. Li t'ap panse ak ti koze li te genyen ak manmanl avan yè swa. Li sonje sa manmanl te dil sou lavi a pandan li t'ap plenyen.

Manmanl te dil ke nan lavi tout tan tèt pa koupe fòw espere wap mete chapo, se viv ki konte. Gen moun vre ki gran zouzoun men ki ale ak tristès. Richès pa fè bonè!

Li te sèlman souke tèt li pou di manmanl gen rezon, men nan fon kèl sa pat sifi pou ankourajel.

Melani tap balanse kòl epi li pran fredone yon chante Lik Mèvil:" renmen ayiti".

Eske li renmen Ayiti? non. Ak ki kè poul pran pòz patriyòt nan yon lavi di nan pòtoprens. Li te konnen se inite ki manke ak yon ti konsyans, men pyès moun pat deside fè premye pa a. Rich ap vinn pi rich, pòv ap vin pi pòv! Eske l'ap fè tankou gran sèl la ki finn lekòl men rete chita lakay?

Nan reflechi konsa, li santi ke kòl ap tranble, pyebwa yo pran souke pi fò e fèy tòl yo anvi dekole. Ti sèl la ki pa konn anyen kouri ale jwenn manmanl nan kwizin nan. Li t'ap mande sak genyen e anvan li jwenn yon repons toutbagay te pran tonbe e li wè kwizan nan kraze ak tout manmanl ak ti sèl la. Dekonb te kouvri yo.

Anmweyyyyyyy!!sekou!

Te sa se li te jwenn pou di men se te twò ta, pa gen moun ki te tandel. Li pa konn kòman li kouri soti deyò men sonje apre aksyon saa kay li a te tonbe nèt.

Li tap gade alentou, tout moun te sanble pèdi tèt yo, kay t'ap kraze, moun ap kouri.

Sa sa ye??? Tout moun te mele! Kit rich, pòv, timoun, granmoun. Tout te nan menm sak. Melani tap kriye mande moun li kwaze sou wout li pou yo edel ale sove manmanl mennn podyabb!!

Dlo nan jel tap koule menm jan moun ap mouri! Li te pèdi nosyon tan an e tout bagay te sanble ak tonbe devanl tankou sab nan lanmè.

Lè tè a finn souke, li te eseye tounen lakay li men li pat menm te ka lokalize espas la. Moun yo te an boulevès, e li pat ka jwenn gran sèl la.

Nan demen, tout moun te anba dekonb, sak viv yo menm te sanble gaga. Tout te gen menm pèn ravaje pa menm aksidan. Tris inite!!

Se te yon trambleman de tè, e li te ale ak tout sa li te jwenn sou wout li, kòmanse sou bèl kay ak moun. Li te ale ak fanmi li tou!

Wi 12 janvye 2010 se yon dat ki ap toujou make lavil e sikatris yo ap toujou la pou raple li sa....

Yon ti panse pou tout moun ki te make nan yon fason ou yon lòt pa dram saaa...

Fin***