حكايه روان ( نوفيلا )

الحلقه ٨

#حكاية_روان

#الحلقة8

واصل محمد سردو

_  لمن لقيتكم مشيتو ، ركبت عربيتي بسرعه وانا افتش فيكم

وعشان شفت العربيه الجايين فيها امشي واسأل المحلات لو في عربيه بالمواصفات دي لحدي مرت بجنبهم

  ودا السبب الخلاني اتأخر فتشت مكانك وشفت الاولاد ديل وهم شايلنك ودخلوك الاوضه شلت حديده وضربت الاول الكان برا الاوضه ،  اما التاني لمن مرق قعدنا نتصارع انا و هو

قاطعتو

_ في الوقت داك اضربت في يدك كدا

_ فعلا بس بسيطه ما في شئ خطير وبعدها الشرطه جات  ، ما بتجي الا بعد ما خلص اي شئ مسلسل هندي بس
رفعوا الرجال في البكسي وجبناكي المستشفى

شلت الارقام من الورقه حقت ابو جلحات ديك تتذكريها
وجو المستشفى وقالو لامك وابوك انو عملتي حادث عربيه بسيط ودا كلو الحصل

نزلت راسي 

_ شكرا ليك كتير

_ اي واحد في مكاني كان عمل كدا ما تشكريني تاني بقيني واحد من شلتك دي
هسي لو ديل شلتك كان شكرتيهم كدا

ابتسمت تاني وقلت ليه شكرا ليه

_ الظاهر الا البس طرحه عشان ابقا زي صحباتك يعني

لا أنجدوا الزول دا عاديناه  ، المهم وصلنا البيت وعدو الايامات الاوائل دي زي السم وكل لحظه اتذكر الموقف المر بي دا

ابوي نصحني

_  يا بتي استغفري وشوفي الله بترتاحي

عملت القالو لي وصحباتي ما مقصرين كل يوم معاي لحدي ما عملو لي وجع وش

طبعا بعد اسبوعين كدا نزلنا الجامعه وبقى محمد دا كل يوم يجي يقعد حبه معانا ويمشي ويدينا نصائح حسيت بيه ابوي  التاني عديل

مره 3شهر

بالطريقه دي ومش معاه رقمي ما حصل دق لي وقال لي بقيتي كيف زاتو

صحباتي الشليقات ديل دخلوه في قروبنا حق (شله واو ) دي وبقينا نتواصل معاه وبقا يدخل لي الخاص ونتونس بصراحه بعد مرات بحس بيه الاخو الكبير لي واقول  عوضني الله
وبصراحه كنت خايفه من الحب لكن والله ما بارادتي والله ، قلبي هو ما انا يا جماعة عشان ما تفهموني غلط بس 

بصراحه حبيتو من جوا جوا قلبي  اعمق من مصعب  زاتو

مصعب دا اكتشفت انو  اعجاب بس ما اكتر   عشان اول مره زول يقول لي كلام حلو والبتالى حسيت اني بحبو لكن لا

في يوم كنت مع صحباتي في الجامعه محمد جا قعد معانا  ..

محمد  سلم

_السلام عليكم ....اخباركم شنو؟ وروان انتي كيف؟

ردينا ليه السلام

لين : بخير انحنا والحمد لله بس اشمعنا روان هي اليسلمو عليها باسمها وانحنا لا؟

رزان ومنى ضحكوت

انا بقيت احمر ليها وخجلانه من كلامهم ، ضحك ورد ليهم

_لا ما كدا. ..طيب رزان ومنى ولين كيفكم؟ 
منى:بعد شنو لكن؟ 

رزان : ما مشكله انحنا راضين

هم يعاينوا  لي بابتسام ويتكلموا ...

وقبل ما يتم ونستو معانا جاه اتصال ضروري  ، إعتذر مننا ومشى

لمن مشا عاينت ليهم

_دا شنو يا بنات ؟

لين :مالك قلنا الحق ..

منى بضحكة

_ شايفين العيون ما بتزح منك ...

رزان بغمزة

_ الحب في العيون بان يا بت خلاص

قلت ليهم

_والله ما عندكم موضوع لا حب ولا حاجه ، تاني انا احب مستحيل

لين بانفعال

_انتي دايره تقارني لي الحيوان داك بمحمد انتي نصيحه

رديت

_حتى ولو كان ما كدا وافترضو اني حبيتو ، يعاين لي انا

منى:  طيب يعاين لمنو لو ما ليك ...يا بت طول  قعادوا الفتره الفاتت معقوله ما لاحظتي ليه ، والله عيونو منك ما بتنزل

_ما عارفه انا متلخبطه

رزان ببهجة

_معناها حبيتيه. 

لين : يا ريت لو بعرف ازغرت ...

منى : الحمد لله ...روان انتي ما ممكن تظلمي زول بموقف زول تاني ...
محمد دا راجل يا بت وفاهم من زي المنحرف داك ...
انتي بس ما تحبسي شعورك لو كان موجود ولو جا وقت الجد استخيري فيه. 

اليوم التاني كان الجمعه جوني كلهم في البيت .. ومعاهم كيك وبارد وشكولاته

لين :جبت المسجل انا

رزان : والحاجات جهزناها ...فضل الرقص

قلت ليهم :في شنو يا بنات

منى :عايزين نحتفل بيك انتي مالك ..

قلت ليهم مستغربه :تحتفلوا  بي لشنو؟ 

قاطعو كلامي وفتحوا المسجل وبدو يرقصو وفي الاخير جروني معاهم.

المهم اليوم داك طلعت كل جنوني وشقبي  ، وانا لسا ما عارفه هم عملوا كدا لشنو  .