#مآساتي 😔 الحلقه 3 تفاعلو او نوقف 💔 المهم بعد تمت خطوبتي وانتشر الخبر في العيله كلها ان ندى خطبها عادل ولد عمتها والكل فرحان ويباركلي وانا في عالم تاني حزن كبير في قلبي 💔 وفي يوم جمعه كانت العيله كلها ملتمه خوتي و خواتي كنت مقعمزه مع خواتي وفجاءه يخش محمد خويا و يقولي عادل برا يبيك انا نصدمت اول مره حانشوفه زعما كيف يكون شكله ماعمريش شفته مع ان قريبي بس ما شفته المهم نضت ولبست وشاحي بدون ماندير اي شي علي وجهي ولا نلبس اي شي يبهرا قاعده بتوته طلعت القيته واقف برا سلم عليا ومدلي كيس في تليفون وشفره لانه سأل عليا ان عندي تليفون قالوله ما عندها ...لو تذكرو خدوه مني علي شان استاذ احمد ....
وعادل من اول ما شافني كانت الضحكه والفرحه في عيونه واضحه بس انا كان وجهي شاحب حتى ماضحكتله خديت منه الكيس وهو قالي انه مستعجل طلع وخلاني وانا ماحسيت بي اي شعور تجاها خشيت لخواتي في دار وانا شارده ونفكر معقوله حنتزوج هدا يلي باين عليه جاهل او مش عارفه بس هكي ما ارتحتله من اول نضره مع انه هو راجل كويس فجاءه وانا شارده ألتفتت علي خواتي يلي لقيتهن فتحات الكيس ويشوفن في تليفوني الجديد وشفره وأنا فرحت ان حايكون عندي تليفون جديد ...
فتحته وحسيت بفرحه كبيره وبعد مرور تلات ايام علي خطوبتي فكرت انه هو عليش لاعند توا ما كلمني بيه ؟
ومع ساعه 12 في الليل خديت نفس وقلت يلا يا ندى انتي اتصلي وحاولي تتأقلمي معاه مرات يطلع راجل كويس بس ندمت علي اتصالي 💔💔 بعدها
وأنا قللبي يدق اتصلت اول مره ماردش و بعدها رد انا بصوت يرجف
ندى...الو اهلين
عادل... خير كيف حالك
ندى...انا...الحمد لله ... وهو كان صوته عالي وكأنه يكلم في راجل مش انثى
عادل... ها خير رانه في الوقت هضا غريبه مش راقده انتي ...
ندى...انا ا نصدمت كيف يحكي معايا هكي واول مكالمه بينا
فقلت : لا شي كنت نبي نشكرك علي تليفون وقطعني .. !
عادل... لا عادي ولا يهمك غير توا سكري عندي مسلسل نحضر فيه
ندى... وانا بصدمه من كلامه 😲 قلت ... اااا تمام سلام وسكرت ومن هنا
عرفت ان هو انسان جاف ومايفهم في جو البنات سبيت روحي ولعنت اني كلمته واستمريت علي الوضع هضا وفي يوم مكسده ومضايقه فقررت أن نفتح نت فافتحت نت وأنا مانفهم فيه شي اول ما فتحت هدوو عليا طلبات صداقه واجد وانا نقبل وخلاص وتعودت علي النت وعجبني الجو وكنت نحكي مع شباب واجد دردشه عاديه و ارتحت وحبيت الجو في نت كان الانترنت الشي الوحيد يلي ينسي فيا في همومي وعيشتي يلي عايشتها قعدت ماسكه تليفوني 24 ساعه وخوتي شكو أن فاتحه نت وهددوني
منير... لو نلقاك فاتحه نت نقتلك
بس أنا كالعاده ماعدلت عليهم اما خطيبي مع الوقت اكتشفت انه هو فعلا راجل جاف وجاهل للاسف مبطل لقرايا من الابتدائي ومع أن مايشتغل يحصل في شغل يشتغل فتره ويسيب وهدا الشي خلاني نزيد نكرهه يكلمني يوم وعشره لا ولما يكلنمي
اهلا كيف حالك
وحال اهلك هي تبي شي هي سلام... وبس هذي معاملته معايا وبعد خشيت في معهد تعرفت علي بنتين وحده نجوى اسمها والتانيه احلام كانو اكتر من خوات بالنسبه ليا ديما مع بعضنا 24 ساعه المهم في يوم مكسده علي النت فجأه حد ضافني في غرفه علي الخاص قعدت نشوف كيف يهدرزو وفي الليل نفتح نخش للغرفه نلقي واحد بس فاتح او اتنين بديت نهدرزو الغرفه كانت مخلطه اولاد وبنات حبيت الجو وانا عادتا نفتح في الليل بس نخش انا
الووو وينكم
ويرد عليا واحد بس قعد يحكي معايا
عبدو... اهلين ياحلوو عرفينا عليك
ندى...انا ندى وانت
عبدو...اسمي عبدو
وقعدنا نهدرزو و كان جوا يهبل يضحك ودمه خفيف واستمرينه كل يوم نفتحو في الليل نهدرزو في القروب عجبني جوا في الصبح
نتلاقه مع نجوة واحلام في معهد وكل وحده تحكي قصة حبها للتانيه وانا كنت ما نحكي إلا علي عبدو وجوا وكل ماندكره نبتسم
احلام ...بحتت فيا ندوش 😜
ندى.... هااا
احلام...حي يا فرخه كان ما تطلعي تحبيه هضا عبدو
.ندى...ااا لالا مستحيل بس هكي نحب جوا والهدرزه معاه
نجوى...ندوش ماتنسي انك مخطوبه راه...
ندى... بالله فكيني ماتزيديني
و انتن عارفات ان النت الشي الوحيد يلي منسيني همي والواقع يلي عايشته وقاهرني ومش متحمله روحي وبنات قدرن يلي صاير فياا وغيرنا السيره
والمهم في يوم كنت كالعاده مكسده نقلب في الفيس شفت في الأشخاص قد تعرفهم.... ومن ضمنهم ايميل عبدو قلبي قعد يدق وترددت وبيني وبين نفسي .... يلا ابعتيله اضافه بتردد بعتت اضافه وهو علي طول قبله و انا فرحت بس مادورت عادي واستمرينه علي الوضع هضا هذرزه وزاد تعلقي بي عبدو كنت نحب نحكي معاه هو الوحيد يلي يضحك فيا كنت كل يوم نتلاقه انا واحلام ونجوى نقعد نحكي بلهفه وفرحه علي عبدو مش عارفه شنو صار معايا هكي بس يلي نعرفه أني تريحت واجد معاه ....و كنت بحاجه لحد يغير جوي وفي يوم اختفاه عبدو من الفيس فتحت النت في الليل مسكر من الصبح وانا استغربت وينه وقعدت الليل كله ساهره نستني فيه يفتح بس للاسف مافتح نضت الصبح لبست ومشيت للمعهد وانا وجهي شاحب
احلام... كنك ندوشي
ندى...😔😔 عبدو امس مافتح نت زعما وينه زعماا ؟
نجوى...اكيد مش فاضي او عنده ظرف
.ندى...مش عارفه 😔
وفي انتهاء الدوام
انا روحت من المعهد وانا علي طول فتحت تليفوني ألقيته مزال مسكر حسيت بحزن كبير داخلي مش عارفه عليش
و قعدت طول اليوم فاتحه نت انراقب فيه مافتحش بعتت رسائل واجد علي الخاص كنت مضايقه بلاه مرو عليا يوم و يومين وتلاثه وايام .... مافتحش تالت يوم وانا في المعهد عقلي شارد ونفكر زعما وين اختفاه وأحلام ونجوى يغيرو في جوي بس أنا مضايقه بعد روحت من المعهد دوشت ومسكت تليفوني... فتحت نت لقيته نشط فرحت مش مصدقه ألقيته فاتح ياربي وكأنه ردت فيا الروح 😭😭 اول ما قرا الرسائل رد عليا
عبدو... اهلين ندوش
ندى...ااا عبدو وين ليك تلات ايام مسكر نت
عبدو... معليش كنت مضايق وجوي مش تمام
ندى...كنك شنو صاير معاك احكيلي عادي مش عارفه شن احساس يلي صارلي بس حسيت بلهفه
عبدو... توا ماعندي نيه نحكي
ندى...وأنا بلهفه كنك احكيلي عبدو شنو مضايقك انا مانعرفك هكي انت ديما تضحك
عبدو... ماردش عليا
انا مش عارفه كيف
ألقيت روحي باعته رقمي وقلت عادي إتصل بيا امتى ماتبي واحكي معايا فضفضلي وفجاءه وعيت علي روحي
حييي أنا شنو درت تو يفهمني غلط😮
عبدو... اول ما شاف رقمي
قالي تمام الليل مع 11 نكلمك
وأنا ... قلت تمام ونطيت من الفرحه حي واخيرا حا يكلمني وقعدت نستنا في الليل امتا يجي ومع الساعه 11 فعلا اتصل بيا قلبي يدق ونرعش مع بعضي خديت نفس ورديت الوو عبدو
عبدو.... هلا شن جو
ندى...اول ما سمعت صوته حسيت بشعور غريب بس شعور كله راحه وحكينا مع بعضنا 🌹🌹
( محلاه صوته محلاها ضحكته صوته رجولي مع إن مانعرف عليه شي غير اسمه )
كان يحكي معايا
وهو في السياره وقعدنا نحكو لعند وصل حوشهم قال : سكري نخش جوا ونكلمك
ندى... تمنيت ان ماصكر الخط
قتله تمام فعلا سكر ربع ساعه رد عليا كملنا هدرزه وتعرفنه علي بعض اكتر ( اسمه عبدو عنده محل يشتغل فيه من المنطقه الغربيه مواليد 93 )
وانا بإعجاب ربي يحفظك يا عبدو وبعدين قال : توا بنطر نسكر تاعب من الشغل
وأنا بصوت حزين 😔 يعني بتسكر وتخليني ساهره بروحي
..عبدو .... اها شنو نبي في وجهك 😂 يلا انخمدي حتى انتي عندك معهد في الصبح
وانا ... 😅 باهي يا مشفشف يلا سلام سكرنا وانا نضحك والفرحه مش سايعتني 😂🔥 و رقدت وزاد تعلقي بيه اكتر واكتر بعبدو وفي يوم كنت نهدرز انا واحلام ونجوى
احلام..ندوش
ندى....نعم
احلام....انتي قلتي لعبدو انك مخطوبه
ندى...لا 💔
نجوى... احكيله علي شان مايتعلق فيك هكي
احلام...اها كلامها صح احكيله ندوش احسن هكي راه
ندى... تنهدت بحزن 😔💔
تمام توا نحكيله
روحت دوشت وفتحت نت ألقيته فاتح نت قعدنا نهدرزو قال :
عبدو... دوشي احكيلي عليك أنا لاعند توا مانعرف عليك شي حتى وجهك يلي حتى هو مانعرفه شين ولا سمح 😜
ندى.... ههههه به توا نعرفك بنفسي
(وحكيتله كل شي عليا حتى اني مخطوبه وكيف بابا غصبني علي ولد عمتي .. ارتحت لما حكيتله)
عبدو ....امممم به ربي يحفظك
وكملنا هدرزه مع بعضنا
(وهدا كله في 2017)
وفي يوم 31\12\2017
كنت زي العاده نهدرز انا وعبدو
قال : دوشي الليل نهدرزو صوت
ندى... تمام عبوود
و سكرت نت وفي الليل فتحت نت قعدنا نهدرزو وقعد يحكي معايا وقالي قصة حياته وقصة حبه 💔💔 يلي قبل وكيف انفصل من البنت وانا مش عارفه عصبت وحسيت بالغيره وفجأه قال
عبدو.... سكري نت نبي نتصل بيك
قبل ما نخشو سنة الجديده
🔥 2018 🔥
ندى...اا به اتصل بيا تليفون
(محلاه صوته وصوته كان دافي بالنسبه ليا)
عبدو...دوشي 😊
ندى...نعم عبدو
عبدو... نبي نقولك حاجه قبل ما نخشو في السنه الجديده
ندى...شنو هي ؟
عبدو... انا نحبك ♥️
( انا قلبي بيطلع من مكانه نرعش من الفرحه)
تنهدت وجت ساعه 12:00
قلت : ششنو
عبدو ... ( قالي بصوت حنون نحبك نحبك نحبك نحبك )
وقعد يكرر فيها في كل مره كنت بنطير من الفرحه وذايبه معاه قلت أنا
( نمووت فيك♥️)
ومشت ليله رومانسيه وكلها حب
...
( وأنا نسيت اني مخطوبه نسيت هلي نسيت صاحباتي معاه نسيت حتى روحي)
واستمرت علاقتنا كلها حب وبسس
............يتبع
وصاحبة القصه بعتت لاعند
هنا احكو رأيكم فيها وتوا نقوللها تشوف تعليقاتكم وان تكمل قصتها او لا هي قالت حاتوقف لاعند هناا ☝ بس انا قلت كمليها بنات يبوهاا ورأيكم ........
.......
#قصه_واقعيه
#مآساتي
#سلطانه_كوكي
