#مآساتي 🔥 الحلقه 11 و 12 والآخيره 🔥🔥 عن قصه واقعيه اسفه تأخرت عليها من ايام لان ندى مفصول عليها نت وعاودت 11 👌 لانكم نسيتو احداث 🔥
انا طلعت مني ضحكه من وسط قلبي
عبدو..ايوا هكي خليك يالحب
ندى.. به به
عبدو.. افتحي نت نبي نشوفك فيديو ❤
انا.. به حاضر فتحت نت وعلي طول اتصل فيديو كنا مرايفين علي بعضنا لدرجة أنه ماحكينا بس اكتفينه بنظر قعدنا ربع ساعه نشوفو بعضنا وعيونا تحكي وجع وحب و سكرنا......
و يومي مر عادي جدا في حوش اختي حنان ونضت الصبح فطرنا وحكينه شويه و بعدين محمد طلب مني إن نخش معاه للدار ويقرأ عليا للمره الاخيره تضايقت بس مش منه ضايقت علي الفكره يلي واخدينها عيلتي عليا استغفرت ربي ونضت عديت الدار يلي يعالج فيها قعمزنا وقعد يحكي معايا
محمد... ندى بنسألك عادي
انا..اكيد
محمد...انتي مقصره في صلاتك صح
انا.. تبي الحق اي تجيني فتره نقصر في صلاتي بس بعدين نردلها
محمد.. به انتي في شي مضايقك صح
انا..نزلت راسي بحزن اها
محمد... عارفه وانا فاهم وعارف انك مش مريضه بالسحر زي مايفكرو اهلك
انا .. نزلو دمووعي ونبكي بالعبره
محمد قرب مني و قالي انتي زي بنتي وحاس بيك انتي بس ديري يلي يريحك بس حكاه معايا وريحني كلامه الحق بعدين قراه عليا شويه قراءن وهديت سبحان الله ومن يومها تقربت لربي وبعدها مشي اليوم عادي وفي الليل طلعنا دهورنا وروحنا كل واحد رقد وانا اتصلت بعبدو ماردش كالعاده
تنهدت و خداني النوم نضت الصبح صليت الصبح ولبست وعديت لحوشنا واول ما خشيت لقيت بابا سلمت عليه حكينا مع بعضنا وخشيت
لقيت امي وخوتي
امي..هااا إن شاء الله
غير هداك الله
و محمد خويا ... هههه يا مجنونه تبي السدسيي يقرأ عليها هدي
منير..لا والله تبي تربايه من جديد توا تمشي امورها
واكتر 💔💔 و انا ماحكيت حتى حرف شفتلهم بنضرة برود وخشيت للدار طحت علي سرير وقعدت نبكي بشهقه كيف ياربي انا غير شن دايره تزيدني هم فوق همي بس مسحت دموعي اتصلت بعبدو ما ردش كالعاده اتصلت مره واثنين مافيش رد عشت هكي في اكتئاب وخلاص فتحت فيس وقعدت علي النت لاعند الصبح والغريب نشوف في عبدو نشط وبعتله بس مايبيش يرد ولا يحكي معايا قعدت واعيه للصبح ماجاني نوم نضت صليت ولبست وطلعت علي بابا وفطرني بيده وطلعنا عشان يوصلني للمعهد هدرزنا طول الطريق غيرلي جوي الحق وبعد قريب نوصلو طلبت من بابا زي العاده ان يوقف السياره ونكمل باقي الطريق بروحي بعد شفت صاحبتي احلام تمشي علي كرعيها علي الطريق و بابا وقف حداه صاحبتي وانا نزلت وقعدت نمشي انا واحلام وكان قريب المعهد ونحنا ماشين كان في محل مقابل المعهد كان صاحب المحل يبحت فيا بنضرات غريبه بس مادورتش لعند خطمنا عليه
احلام..صباح الخير
علي صاحب المحل....صباح النور
انا.. ماتكلمتش مشيت وفجأه نسمع ان ينادي علي اسمي
علي.. ندى ندى
انا.. التفتت نعم
علي.. عادي نكلمك نبيك
انا .. انصدمت اكيد لا ومشيت وخليته (طبعا علي هذا معروف في المنطقه سمعته وسمعت عيلته صفر ربي يستر علينا وعليهم وكان واضح انه كبير في العمر يعني في حدود 42 سنه كان يشرب ومن قبل يضايق في البنات المعهد
لأنه صايع وحقير )
المهم خشينا المعهد وقرينا وغيرت جوي مع البنات تمنيت نهايه الدوام
مايكمل مع احلام ونجوى
نجوى.. بنات
احلام..هاا
نجوى.. عصا قولي نعم😒
انا..ههههههه كنك شنو فيه
نجوى.. بنقوللكن علي حاجه🤭
انا.. قولي بلا دلع فرخات
احلام..ههههه شنو ؟
نجوى.. امس احمد حبيبي جا وخطبني
انا واحلام شهقنا بصدمه حي يا حماره وما تقوللينا غير توا وهجمنا عليها ضرب و ضحكنا وفرحتلها واجد لنجوى لانه خطبها من يحبها سرحت وقعدت نفكر
( اخ بس 😔 شنو فيها ياربي كان حتى انا خديت من نحب شنو فيها يارب كان حسيت بالشعور الحلو زي ما رزقته لصاحبتي) ونزلت مني دمعه شافتلي احلام وكانت حاسه بيا وعارفه في شنو نفكر مسحت دموعي وغيرتلي جوي روحت المعهد علي طوول لتليفوني اتصلت بعبدو رد عليا
انا..هلا
فرج..قبل لا تغلطي ولا تقولي اي
حاجه انا فرج مش عبدو
انا..هههههههه وين صاحبك
فرج.. والله وأخيرا وافق يشتغل معايا وتوا يشتغل وحاط تليفونه جنبي علي مكتب
انا... اوو باهي كويس ربي يعاونكم و
حكينا شويه وسكرت ..
#يتبع
......
#مآساتي 🔥 الحلقه 12 👌
فرج.. والله وأخيرا وافق يشتغل معايا وتوا يشتغل وحاط تليفونه جنبي علي مكتبي
انا... اووو باهي كويس ربي يعاونكم
حكينا انا و فرج شويه وسكرنا مرو عليا ايامات عادي ونفس الروتين كلام اهلي عليا يلي زي سم وخطيبي ومعاملته الجافه معايا خلاني كل يوم نزيد نكرهه اكتر واكتر اكتر من مره حاولت إني نفسخ ونسيب خطيبي بس الشي يلي كان مخليني نتحمل هوا التليفون لأنه هو الشي الوحيد يلي يوصل فيا لعبدو يعني لو أنا سيبت خطيبي اهلي بياخدو مني التليفون وبننحبس وهك يقعد بالي كله مشغول عليه وقعدت نفكر في مية حل وحل لي مشاكلي بس وين ما نمشي مسكره في وجهي ماليا غير البكاء والصبر وبس... واما عبدو من لما اشتغل في طرابلس ونساني خفوو اتصالتنا واجد نتصل بيه اكتر من مره مايردش حسيت بنقص في حياتي
(صعب جدا حين نتعود علي اشياء وتختفي فجأه إلينا )
كنت نلوم فيه ونعذره نلومه لأنه مقصرر معايا هلبا ونعذره لانه في النهايه هوا شاب ومن حقه إنه يشتغل ويصرف علي روحه واهله كنت حايره بكل تعبت واجد نفسيتي تعبت نفكر لليل نهار النوم طار من عيني فقدت شهيتي علي الاكل اكتر شي حبيته وارتحتله هيا (العزله) حبيت ننعزل علي كل شي من اهلي ومن صحباتي من كل شي مافي شي في بالي غير التفكير في الماضي والمستقبل كل ليله تمر مآساة حياتي قدام عيوني
.. جفو دموعي من البكاه
نضت الصبح وكان عندي امتحانات لبست ومشيت للمعهد وانا خاشه للمعهد تناديني بنت
البنت..ندي ندي
انا التفتت نعم
البنت..صباح الخير
انا...صباح الورد
البنت.. من الاخير جايتك في حاجه
انا بأستغراب..تفضلي
البنت... تعرفي علي يلي يخدم
ف المحل يلي مقابل المعهد؟؟
انا... اها كنه
البنت.... يبيك ويبي رقمك من الاخير الراجل يحبك
أنا...نتكلم ومصدومه انتي عارفه إني مخطوبه وبعدين مستحيل نكلم حد غيره
البنت... والله انا مادخلنيش المهم هو قال عندي رقمها بس بنعطيها فرصه أنها تحكي معايا
انا ...حي عليا كيف عنده رقمي
البنت.. والله هل الوقت اسهل حاجه الرقم
انا تنهدت قلتلها صكري ع موضوع ومستحيل نكلمه وانا اصلا مخطوبه البنت... تمام وعدت
وانا جتني أحلام تجري
احلام.. كنها هذي المزيته شن تبي فيك
انا...ههههه تعالي نحكليلك
و...حكيتلها
روحت من المعهد وانا مضايقه من كتر اني مرايفه لعبدو له أسبوع ما حكاش معايا وكل ما نتصل مافيش رد سيبت امري لربي ورقدت نضت العصر علي صوت تليفوني يرن أنا بصوت ناعس
الوو
علي.. هلا
انا..من معايا
علي.. علي
نطيت مفجوعه سكرت التلفون وحطيته ف الحظر استغفرت ربي وصليت العصر ومشيت يومي عادي وفي الليل اتصلت
بعبدو رد
عبدو..الوو
انا...حبييييبي
عبدو..شن الجو و
انا.. قاطعته رايفت عليك ❤
عبدو..امممم حتى انا
انا ...معقوله هكي معش تحكي معايا و وينك معش ترد عليا 😔
عبدو.. الله غالب ضروف
انا..تنهدت بحزن به حبيبي ربي يعاون
عبدو..اممم افتحي نت نبي نشوفك
انا..نقدرش نكلمك فيديو توا
عبدو..دبري توا نبي نشوفك مرايف عليك مووت حتى صوره عادي
انا ... ههههه باهي تو تبعتلك صوره
سكرنا وفتحت نت و طول بعتت صوري لعبدو ❤❤
(طبعا في بنات بتقول كيف بعتت صورها لحبيبها انا عبدو واثقه فيه ونعرفه مستحيل يدير اي شي غلط لانه مجربته قبل هالمره ويغار عليا من اي حد يشوفني وهدا الشي مطمني ويخليني نبعت صورتي له وانا متريحه ويكفي إني نحبه)
بعتت مجموعه صور صورتهم اخر مره طلعت فيها في عرس بنت عمي شافهم وعجبنه 😍😍❤❤ حكينا مع بعضنا وجوي عادي وفجأه عييط عليا سكرررري انا نصدمت وسكرت من الخوف قعدت متوترة أن شاء الله خير بس بعد ربع ساعه اتصل بيا يعيط
عبدو... انتي عاطيه باسودر ايميلك لحد
انا..نتكلم وبخوووف لا ليش
عبدو...باه من هدا الفرخ علي 😠
انا..انشل لساني ما عرفت شنو نحكي
عبدو يعيط عليا تي من هذا ال......
انا..هذا واحد يشتغل في محل مقابل معهدنا و يضايق فيا وامبدري
اتصل بيا و حطيته في الحظر
عبدو تنهد..إنتي عارفه الكلب
هذا شن داير
انا ...شنو
عبدو...الكلب هذا مخترق ايميلك وشايف هدرزتنا انا وانتي وتوا شاف صورك يلي بعتيهم ليا
انا ... قعدت نعيط كيف مستحيل وانهرت بالبكاء 😭😭
عبدو ... اول ما اسمعني نعيط قعد
يهدي فيا
انا...كيف كيف هكي وكيف كلمك
عبدو.. خشلي علي الخاص وبعتلي صورك بدا يقلل في ادبه معايا اشويه بعتت له رقمي وقتله كلمني وهو إتصل بيا تعاركت معاه وسكر مني
انا .. زدت نبكي حي عليااا
شن نديرر قولي
عبدو..ما تخافي حبيبي انا معاك هذا عيل مايقدر يديرلك شي
حاول يهديني عبدو وصكر مني
نضت غسلت وجهي ودموعي ماوقفوو قعمزت في داري رن تليفوني وكان رقم غريب في الاول ما رديت وتانيه رديت
علي..خير
انا.. شن تبي حسبي الله ونعم الوكيل فيك
علي.. مزال ما شفتي مني شي
سكرت عليه ونهرت بالبكاء نبكي بشهقه الساعه واحد في الليل اتصل بيا فتحي ولد عمي
انا..بصوت تاعب الو
فتحي..شنو واعيه يا دعوه
انا..اها كنك
فتحي.. كنك يابنت خير صوتك
انا... نهرت بالبكاء
فتحي... انصدم باهي اسكتى
وافتحيلي الباب جايك
سكرت غسلت وجهي وفتحت الباب الخلفي بشويه قبل لايحسو اهلي وفتحت لقيته مصبي مشيت نجري حضنته وانا نبكي فتحي هذا مش بس ولد عمي هدا خويا وصاحبي ومتعلقين ببعضنا
فتحي.. قعمزي واحكيلي
انا ...قعمزت وحكيتله كل شي
فتحي... صبا وهوا معصب وانتي حماره غبيه ديري هكي
انا...اها يعني يلي تحب وتنجن بحبيبها تقعد حماره وغبيه
فتحي...خلاص خلاص انا حاس بيك ونعرفك انتي شنو
انا..باه والحل توا
فتحي..خلاص معش تفكري بشي توا نمشيله ونريبه الكلب
انا.. ارتحت شويه
باه تمام
فتحي...انعنشكلك دايره هالدموع كلهن علي خاطر شي مايستاهل 😈
انا.. هههه باهي باه
انت غريبه متصل بيا في نص الليل ها مش من عوايدك
فتحي..كنت نبي نقولك جيعان ديريلي حاجه ناكلها 😂
انا... هههه بارد اصبر نديرو سفرا وناكلو
خشيت طيبت خفيف علي السريع وطلعت حكينا شويه و روح فتحي خشيت ع طول رقدت الصبح اتصلت
ب عبدو ماردش وبعدها عديت للمعهد لقيته علي مصبي قدام باب المعهد
بحتت فيه بحقد ومشيت للبنات نهاية الدوام روحت اتصلت بعبدو رد
عبدو..الو
انا..هلا
عبدو..شنو جوو
انا..تمام
عبدو.. ها شن صار
انا...حكيتله علي فتحي وانه بيحلها
عبدو... اممم به أن شاء الله خير
وانتي سكريه ايميلك الليل نفتحلك واحد تاني
انا ..تمام
عدا فتحي لعلي واعطاه طريحه مسحت كبدي وكبودكم 😂😌 👌🔥
ومن يومها معش ضايقني
اما عبدو اختفاه يكلمني يوم وعشره لا درت إمتحاناتي نهائية وعطلنا
مرر الوقت هذا كله وحياتي تعيسه وعايشه علي اعصابي
في يوم كانت معانا اختي حنان في الحوش يوم جمعه وانا من اول ما نضت الصبح جاني وجع رهيب في بطني بس تحملت وقعدت يزيد الوجع بشكل وانا نتحمل لعند الليل زاد بيا الوجع خشيت لداري وقعدت مره نعيط مره نحبس عيطتي من كتر الألم خشت عليا امي انصدمت في حالتي شافت وجهي الاحمر من الوجع وكيف نلوي طلعت ومشت ل بابا حكتله وناض يجري
بابا..كنك يابنتي نوضي
نشيلوك العياده هيا
نوضتني حنان ولبستني بصعوبه مشيت انا وامي وبابا خشيت للعياده فحصتني دكتوره وطلع هدا كله اعصاب معده وركبت تغديه وخديت علاج مع المحافضه وروحنا والغريب هدا كله وامي جنبي روحت خشيت رقدت خشت عليا حنان تهدرز معايا
حنان...انتي ما شفتي امك يلي تقولي ما تحبك امبدري كيف خافت عليك
بعد مرضتي
انا..هههه لالا عادي
حنان..اي اي تصدقي اصلا اول مره نشوف امك خايفه عليك هكي
انا...حنون بالله ما تزيدها عليا ياريتني حتى متت بالك ارتحت
حنان تنهدت وطلعت
حطيت راسي علي مخدتي وبكيت بعبره اتصلت بعبدو مافيش رد
مروو ايامات وعشت نفس
الروتين عبدو قعد شبه معدوم في حياتي اختفاه وتعودت علي غيابه خطيبي قعدت نفكر كل يوم كيف بنفسخ ونسيبه اهلي قاعدين نفس المعامله ونفس النضره يلي من سنين يبحتو فيها ليا وطلعت
نتيجتي ونجحت ❤😍
فتح المعهد خشيت سنه تالته وهدي اخر سنه التخرج مرت حياتي تعيسه وعادي صديقتي نجوى تزوجت وفرحتلها من قلبي واحلام سيبت حبيبها يلي ضايقها بغيرته وشكه الزايد لها وانا قعدت نفس ما انا جت نهايه السنه وقعدت نحضر مشروع تخرجي اما عبدو اكتر تواصلنا قعد علي النت دردشه فقط كأنه قعد يحاول انه يبعد عني رغم أنه متأكده انه يحبني بس ماعرفتش
عليش هو هكي يبعد عني عليش
كنت مقعمزه علي لابتوب ولابسه نضارتي الطبيه ونشتغل علي المشروع جتني مكالمه ماسنجر من عبدو رديت
عبدو..هلوو
انا..اهلين
عبدو..ووينك معش تسألي
انا.. ههه اي واضح
عبدو.. اي حق
انا.. كيف به
عبدو..قبل كنت تتصلي بيا 24 ساعه ماتسكري مني وتوا ترني مره مرتين في اليوم وتسكري
انا...ماهو قلت عليش نتصل وعارفتك مش حاترد عليا
حكينا وعاتبنه بعضنا وسكرنا
مرو ايامات للمشروع وانا خايفه ومتوتره قعد معايا عبدو اول بي أول وساعدني في مشروع شويه خفف عني شويه من الخوف نضت الصبح صليت ودعيت ربي يوفقني و لبست وطلعت للمعهد لأنه اليوم المناشقه وانا كلي خووف لقيت البنات حتى هنا متوترات ناضن عليا اعصاب المعده ووجع في بطني رهييب كنت محتاجه لعبدو هوا الوحيد يخفف عليا كل هالضغوطات اتصل ورد حكينا وهداني نادوني البنات وقت سكرت منه وخشيت للمناقشه كنت خايفه بس في لحضه راح الخوف و زادت ثقتي بي نفسي طلعت من المناقشه وراضيه بكل جهوداتي ارتحت روحنا ونفكرو في نتيجه وأن شآء الله ننجحو ونتخرجو روحت اتصلت عبدو ماردش غاب عليا اسبوع ما كلمني كرهت تصرفااته معايا ومن يومها قررت معش نكلمه ولا نبعتله حتى
مسج لو يبي هوا يكلمني
في هالفتره تغيرت قعدت نفكر في طموحاتي وبس نفكر كيف نجدد نفسي ونخلي كل شي مضايقني علي ربي وبس♥️ كنت نشوف في بابا كيف متوتر ويفكر في نتيجتي اكتر مني
نشوف فيه في كل صلاة يدعيلي بالنجاح نزلو دموعي ونا ندعي يارب ماتخيب ظن بابا فيا يارب نجحني مش علي خاطري علي خاطر بابا يفرح بيا وبس قعد كل يوم بابا يمشي ويسأل علي نتيجتي وفي يوم جمعه نضت الصبح جن خواتي
وخوتي التمو وانا في
عالم تاني فجأه نسمع صوت
بابا ينادي فيا يا ندى ندى
انا طلعت نجري وهو حضني بابا مبروك يا بنتي نجحتي انا حضنته ونبكي الحمد الله يارب جبرت بخاطري وخاطر بابا
بديت نفكر في طموحاتي نفكر في مستقبلي وبس مكالماتي مع عبدو شبه معدومه مع إني نحبه بس علاقتنا بردت للاسف حاليا نفكر إني نكون روحي ونعتمد علي نفسي وبعدها نفسخ الخطوبه ونتريح حاولت نكسب رضا بابا وندعي يحن قلب امي عليا المهم مروو شهور وكسدت من قعدت
حوش سمعت انه فاتحين دورة تمريض و بدو تسجيل قررت إنه نسجل فيها ونكسب خبره احسن من قعدت الحوش خشيت في دورة التمريض وقريت فيها تلات شهور وتخرجت منها وحاليا انا نخدم ممرضه في عياده خاصه وماشيه أموري والحمد الله
رضيت بحكم ربي وكل شي
كاتبه ربي يصير
من ندى 👇
#نصيحه
خلي كل شي علي ربي و أرضى بكل شي كتبه ربي ليك وحتعيشي مرتاحه
🙂 وما تنسي إنه مابعد الضيق إلا الفرج..
أنا ثقتي بي ربي كبيره وان شاء الله ربي حا يعوضني علي كل دمعه ظلم وقهر .. وهادي هيا 💔 مأساتي 💔
ادعولي ربي يفرجها عليا وعليكم وأن شآء الله تاخدو عبره من قصتي وشكرا لكل من تفاعل مع القصه ♥️ وحيكون فيها جزء تاني
..............
🔥 عن قصه واقعيه 🔥
🔥 سلطانه كوكي 🔥
