اهلين حبايبي عندي روايه انتمنى انها تعجبكم هذي اول روايه ليا🙈🙈🙈
#عوضني_بيك
الحلقة 1
رهف: كيف اتديرو فيا هكي اني شن درتلكم😭😭
ع احلام: خلاص عمك خدي قراره بلا دموع ودراما قول كلمة يامفتاح خيرك ساكت
ع مفتاح: الله غالب هذا نصيبك رضيتي او لا
رهف: اني راضية نقعد نخدم طول عمري فيكم ومانتكمل ولانتدخل في شي لكن ماتزوجوني ياعمي بالله عليك😭😭
ع احلام: نوضي بلا دلع اغسلي وضمي الحوش عطينه موعد لناس قريب يوصلو توا
نسيت انعرفكم عليا اني رهف مواليدي98 مواصفاتي قصيرة شوي وجسمي حلو وبشرتي بيضة وشعري كستنائي وطويل..
عايشة مع عمي من عمري 10سنين ماريتش يوم حلو في حياتي من يوم مات باتي وخداني جدي من امي وهيا روحت مع هلها وخلتني صغيرة مانعرف من الدنيا شي وجدي مات بعد باتي بسنتين وخلاني مع عمي ومرت عمي يلي دارو فيا الويل..
عمي اسمه مفتاح ومراته اسمها احلام وعندهم ولد وبنتين
بدرية اكبر مني بسنتين وبدور من عمري واحمد 2000
بدرية معاملتها عادية وبدور تكرهني وتغار مني واحمد في حاله
انردو لي روايتنا..
اني: عديت انضم ونغسل ودمعتي في عيني وانتحسب ع خلاني هنا
~~~~
خلونا نمشو لي مكان تاني..
خالد: ياامي قديش مرة قلتلكم مانبيش مانبيييش خيركم انتم هكي
سالمة: واني قتلك بنخطبلك وبنتريح عليك كيفك كيف خوتك راني مريضة ياوليدي ومانندري لامتى قاعدتلك
خالد: بعيد السو عليك ان شاءالله لكن اني ماعنديش جو لي وجيج النسوان اني راجل عايش طول وعرض ومانبي حد ايقيدني
سالمة: غير قول باهي ياوليدي راهي بنيه كويسة وعاقلة وهادية وماعندها ع هالوجيج هاا شن قلت
خالد: خليني انفكر قبل
سالمة: شنو اتفكر اني عاطية موعد اليوم بنمشولهم
خالد: ليش ياامي لييييش كيف هكي ديرووو رايكم وطلعت وخليتها..
انعرفكم عليا اني خالد مواليد86 عندي 3خوت اثنين متزوجين واحد اسمه عيسى اكبر مني مرته ميرال وعنده ولدين وبنت والتاني طارق اصغر مني مرته هناء عنده بنيه واصغر واحد منير مزال طايش وعندي اختين متزوجات رويده وبسمة تو تعرفوهن في الحلقات الجايا مواصفاتي ع الاسود وطويل وعريض ونوعيتي عصبي ومانحبش وجيج النسوان وامي كل يوم نافختلي راسي نخطبلك نخطبلك واليوم فتحتلي نفس الموضوع ع اساس زي كل مرة بنوزعها قلتلها انفكر لقيتها حاسبه حسابها واخده حتي موعد منهم..
~~~~
خالد: اول ماطلعت قعدت انلف بالسيارة والدخان طرف ورا طرف لييييييين دخت ولقيت روحي امدرس قدام حوش نوري صاحبي وخوي يلي يفهم فيا طوووول
نوري: خيرك ياراجل من صوتك عرفتك مش تمام شن في شن صاير
خالد: ياراجل بيزبكوني واني ماعندي راس لي شي امي امكرشة ابنخطبلك ابنخطبلك اهي اليوم ماشية بتكمل
نوري: ياريتها ام كل حبيب😍😍
خالد: والله فاضي حتي اني يلي جاي نشكيلك انزل انزل وخديت طرف دخان ولعته
نوري: انبصرو ياراجل نبيك تفرد هالزومة ولوح هالسم من فمك باهي ليش ماتجرب مرات انت واخد فكرة غلط علي النسوان
خالد: والله النسوان نفس بعضهن اخخخخ اخ حس راسي بيتفترش من الصبح واني بين خدمة وتشحوير وين روحت بنرقد فتحلولي الموضوع طيرو النوم وجفلوني بكل
نوري: تفرج ان شاءالله هيا انزل تريح عندي شوي
خالد: لالا خليني انروح نرقدلي هالساعتين تو انتلاقو في الليل هيا سلام
نوري: سلام
خالد: روحت للحوش لقيته فاااضي شكلهم ماشيين يخطبو في طايحة السعد اففف اف خليني انخش نرقد شوي
~~~~
ع سالمة: شنو يااحلام عصير وشربنا وقهوة وشربنا واني البنت ريتها وعاجبتني موافقين والا تبو وقت بيش اتردو علينا
ع احلام: والله شن بنقولك عمها من اول مادزيتيلي خبرته ونشد عليكم وعلي وليدك والحق شكروكم وماعنده مايقول وان شاءالله ماتطلعو غير انتم راضيين
ع سالمة: الحمدلله ياربي مبروك علينا وعليكم واهو ولدي يضرب عليا شكله برا
ع احلام: غير خيرك مستعجلة
ع سالمة: الجايات اكثر ان شاءالله وشوفو روحكم وردي عليا شن ايصير هيا بالسلامة
ع احلام: ان شاءالله بينا تلفون بالسلامة
رهف: قدمت للمراة وسلمت عليها وخشيت لي داري وكالعادة ناخد صورة باتي ونقعد انهذرز معاه ليش مشيت وخليتني ليش مارفعتني معاك من موتك ماعشت يوم حلو وقفوني من قرايتي وحرموني من كل شي ليش اني من دون البنات مكتوبلي انعيش هكي 😭😭
ع احلام فتحت عليا الباب..
ع احلام: نوضي ضمي حوستك المراة روحت بلا دموع وحطي العشي ع النار عمك واحمد قريب ايجو😏😏
رهف: حاضر... وبناتها طبعا مافيش وحدة اتحرك حاجة والا اتعاون 😔😔
~~~~
روحت ع سالمة فرحاااانه خبرت بناتها وكناينها وشايبها وكلهم فرحو الا شخص واحد هو خالد لما ناض ع دوشتهم وخبروه تعقد وعصب وكلهم ايخافو منه ومن عصبيته خش غير دبشه وطلع من الحوش
خالد: طلعت من الحوش واني امعصب وانتحلف وانتوعد نبقي امكرهاااا في امعيشتها ليييش اتوافق لييييش وانخبط ع الدومان وانعارك لقيت روحي قدام صالة الرياضة خشيت فشيت غلي وطلعت...
كلمني نوري واني امروح
خالد: الوو
نوري: تي وينك ياراجل ع اساس انتلاقو راجيت في القهوة لين عييت
خالد: والله انسيت بكل خلوني بلاعقل في جرت مواضيعهم تو وصلت للحوش بكرا انتلاقو وانهذرزو
نوري: ماشي ماشي هيا سلام
خالد: سلام
وصلت للحوش واني راسم خطة في بالي وواخد قرار امي اكيد اتراجي فيا..
خالد: خير ياامي
ع سالمة: خير ياوليدي وينك خيرك طولت
خالد: كنت مع الشباب انتي شن سهرك لعند توا
ع سالمة: والله انراجي فيك بنخبرك ع خطيبتك و...
خالد: قصيت عليها مانبي نعرف شي مش قتلك ديري رايك خلاص لكن عندي شروط
ع سالمة: قول شنو
خالد: قرايا لا عمل لا ماعنديش راس للوجيج والفرح بعد اسبوعين.. هذا كله انعجز فيها بيش اتغير رايها
ع سالمة: حتي هيا لاتقرا لاتخدم لكن الفرح تو انكلمهم وانقوللهم باهي خيرك انت طول عمرك رافض الفكرة واليوم خطر عليك اتقول بعد اسبوعين
خالد: في عقلي ايه والله نهار مبروك لا تقرا لاتخدم..
والله هذا شرطي قالو باهي فيها البركة قالو لا تفكينا منها الخلطة هيا تصبحي ع خير واني طالع خطر عليا رديت كم عمرها البلي لحرف
ع سالمة: والله ياوليدي قالت مرت عمها 98 مانندري عنها شنو
خالد:ضحكتني امي خشيت لي داري وانفكر هذي خبروها ع عمري والا غير ترفس وخلاص 12سنة بيني وبينها افففف اف الهم الاحرف غيرت وبعد تفكير وصراع خداني النوم.. ~~~~
رهف: درت عشاي وكملت حوستي فتحلي عمي الموضوع وقتله دير رايك وخشيت لي داري رقدت بكيت بكيت وقعدت انفكر كيف بيطلع زعم يطلع كويس وبينسيني الهم يلي عشته والا بيطلع احرف من احلام وقعدت انفكر وانفكر لين خداني النوم..
نضت ع صوت ع احلام
ع احلام: نوضي نوضي كلمتني عزوزك وقاتلي الفرح بعد اسبوعين
رهف: نضت كيف المخلوعه كيف كييف شنو بعد اسبوعين😢😢
بدرية: فرحك ياحنه نوضي ابدي وتي روحك من تو
بدور: شنو بتوتي في اسبوعين هذي تبيلها سنتين بيش ايصير منها😂😂😂
ع احلام: هههههههه المهم انتريحوا
رهف: نضت من حداها وخشيت للحمام حشا القاريين وبكيت لين طاب خاطري بعدها توضيت وطلعت صليت دعيت ربي ايفرج عليا
~~~~
خالد: نضت نسمع في امي اتهذرز طلعت لقيت معاها باتي ومرت خوي وخوي صباح الخير
ع سالمة: صباح الورد ياعريس وتضحك
خالد: عرس شنو بالله ياامي وضحكت
طارق خوي: عرسك بعد اسبوعين وانت راقد لتو نوض اشقى بروحك
خالد: حسستني هما اموافقين انتكلم واني عاقد حواجبي
ع سالمة: كلمتهم الصبح وقالو موافقين وكلمت نساوين خوتك وخواتك توا جايات بنوتوا حاجات العرس
ع سالم: شوف روحك كان نقصك شي قول
خالد: واني من داخل نرحي شن هالعيلة يلي بايعين بنتهم وهيا خيرها املوحه روحها تلويح وطلعت ماقلتش ولا كلمة قربعت الباب وراي حسيته خفف عليا شوي..
ع سالم: خيره ولدك بالك مش راضي ع الجوازه
ع سالمة: والله ياحاج هو يلي قالي نبيه بعد اسبوعين
خالد: بعد طلعت انحس في الدنيا ضايقة بيا قعدت نبرم خلاص بنبكي انشد في روحي بسيف رجولتي ماسمحتش لدموعي ينزلن حتي العمل ماجتش النية نمشيله كلمت نوري قتله انتلاقو في القهوة وسكرت..
****
يتبع
~~~
شن رايكم في الروايه كان عجبتكم انكمل
الكاتبة #جيجي . جيجي
