من كل بيت حكايه

اول

#من_كل_بيت_حكايه
مجموعة قصص قصيره كل جزء يسرد حدث لاحد البيوت الي راح ندخلها
تمنياتي لكم قراءه ممتعه
بقلمي : فردوس عبد اللطيف
   الاول
الوقت : صلاة الفجر
سليمان : كريمه كريمه كعدي اذن الفجر وروحي كعدي البنات والولد يصلون
راح ندخل لبيت حجي سليمان
بنته الكبيره زينه
لؤي الابن الكبير ورهف البنت الوسطى المدلله
امير الصغير
زينه : ماما اليوم عطله ليش تكعدينا نصلي
كريمه : ولج ابوج كالي اكعدكم مو يوميه تكعدون للصلاه
زينه : اليوم جمعه عود من نكعد بعدين نصلي قضاه
كريمه :يبووووو غير ابوج يذبحج
كعدي وكعدي اختج وياج هاي تتنعوص علي دلوعة البابا
زينه : واني حظي المصخم شبعت كفخ منكم
كومي كعدي رهف كومي لايجي ابوج يصيح علينا
كريمه : لؤي كوم يابعد امك كومو الصلاه
لؤي : أي اي كعدنا
وره ماراحت رجعت نمت
اهووو اخاف ابوي يجي خل اطلع صوت ع اساس اني كاعد
*****
الحجي سليمان متسلط كل العائله تخاف منه
ملتزم بالصلاه بأوقاتها ويوم الجمعه يصلي بالجامع
والكل تعرفه رجل خير وانسان ملتزم
يشتغل بالتجاره واستيراد المواد الغذائيه من فواكه وخضار من احد الدول المجاورة للعراق
وبمرور الوقت توسعت تجارته وتغير وظعه المادي
وصار من اكبر التجار بالمحافظه
******
لؤي : بابا عمي واثق اجه ودخلته بالخطار
سليمان : روح سوي جاي وجيبه يم عمك
شلونك اخوي شخباركم
واثق : شحجيلك اخوي وظعي جدا صعب
ابني كمال وكع من الدرج ومجاي يكدر يتحرك بسبب ظهره
وكال الطبيب اذا مايسوي عمليه ينشل
ساعدني خوي اريد اودي للهند وماعندي فلوس
سليمان : خطيه كمال هذا نصيبه وبعدين شدعوه هالوكاحه
واثق : خوي ماكو وكت اني محتاج ٥٠٠٠دولار للعمليه
سليمان : ياريت عندي تدري فلوسي بالشغل
وماعندي سيوله اعذرني
هاك هاي (100) مئة الف مشي حالك

واثق : والدمعه بعينه
اشكرك اخوي خليهن خاف تحتاجهن
سليمان : وين رايح اكعد اشرب جايك
واثق : واصل خوي مع السلامه
سليمان : الله وياك
*******
سليمان : كريمه صبي غده اني جوعان
كريمه : اركض شوف ابوك شبي عصبي
لؤي : ها بابا دا يصبون الغده
*****
زينه : شبيج رهف ليش صافنه ومجاي تدرسين ؟
رهف : اريد ابطل من المدرسه
زينه : شنو شنو ماسمعتج هو كوله انت بالثاني متوسط وتردين تبطلين ؟
رهف : تبجي ومتكدر تحجي
زينه : اذا ماتحجين راح اكول لماما
رهف : لا عفيه
ست رشا مدرسه الإنكليزي
زينه : شبيها ؟
رهف : شاده وياي اي حركه او تصرف اتصرفه ترزلني
غير درجاتي بالانكليزي كوله رسوب ودكولي حجزيلج رحله
لان انت مراح تنجحين
زينه : زين بس وياج لو ويه كل الطالبات هيج
رهف : هي متقصدتني اني تكرهني
زينه : باعي باجر اجي للمدرسه واحاول احجي وياها
كومي بدلي وروحي
رهف :لا عفيه ماروح
زينه : انت تخبلتي كومي لا امج دكول لابوج
رهف : بابا سافر لايران من البارحه
زينه : وانت فرحانه
رهف : لا حبيبي بابا بس كعدة صلاة الفجر تطير نومتي
بس اتوضى تطير نومتي ومن اروح للدوام منعسه
زينه : كومي حبيبتي روحي للمدرسه ولاتعاندين
******
ست رشا : وين دفترج رهف شو بس انت مجايبته المحاضره السابقه بلغتكم تجيبون دفاتركم
رهف : ست اني مخليته بالجنطه ماعرف منو مطلعه
ست رشا : ليش هي بس اليوم انت من بداية السنه هامله دروسج وجايه للمدرسه للونسه
رهف : ست انت شاده وياي شتردين مني
ست رشا : لج لاتعلين صوتج عديمة التربيه
طلعي بره ماريد اشوفج بالصف ومن تجيبين اهلج عود ادخلج للصف
******
زينه : مرحبا ست اني اخت رهف !!!
ممكن اعرف شبيها رهف ؟
ست رشا : ماما اختج مهمله لاتدرس لاتهتم ولا عدهه حرص على تحضير واجباتها
يبدو ان اختج مدلله بالبيت ومحد شاكمها وهذه الطريقه الغلط
بالتربيه
زينه : شنو قصدج ست
اهلي ماعرفو يربون رهف ؟
ست رشا : عيني راقبو بنتكم ليش دازيهه للمدرسه
غير حتى تدرس لو بس دازيها للعب
جيتج مراح تغير شي من وظعها واني اكولج من اليوم اذا اختج ماتقرى مراح تنجح
*****
زينه : ماما شوفو حل لبنتج هاي مدرسه الإنكليزي شايله منها ودكول ماتنجح اذا ماتدرس
وبنتج كارهه الدرس من وره المدرسه
كريمه : اليوم يجي ابوج من السفر واحجيله
لؤي : ليش ماحجيتولي اني اروح عالمدرسه
زينه : ميفيد هذه المدرسه كويه وميفيد وياها الحجي خل ابوك 
هو يتصرف
*****
احمد : وينج زوزو شكد اتصلت عليج
زينه : مخليته صامت وبالغرفه واني تحت يم ماما
احمد : لج مشتاقلج اليوم ماحجينا
زينه : شخبار اخوك كمال ؟
احمد : ابوي باع سيارته وكمل الاوراق وفد يومين يسافرون للهند يسووله عمليه
زينه : الله يشفي
احمد : حبي اذا تخرجت من الكليه العسكريه وتعينت واجي اخطبج
وابوج حايوافق لو يرفضني لان احنا فقراء وانتو اغنياء
زينه : شنو هالكلام احمد انت ابن عمي واني مراح اقبل بغيرك بعدين وراي دوام كليه ولازم اكمل كليتي ونفكر بالزواج
احمد : حبيبتي انت الي تحجين هيج بس ابوج الي مارحم اخوه ماعتقد راح يرحمنا ويرحم حبنا
بس مانريد نسبق الاحداث
******
رهف : تعالي زوزو بابا يريدج لان حجيتله على ست رشا
زينه : هلو بابا الحمد لله ع سلامتك
سليمان : احجيلي بالتفصيل زوزو
وشنو وظعها هالمدرسه وين بيتهم ومتزوجه لو بعدهه
زينه : بابا الست متزوجه مدرس وعدهه طفلين
والي سمعته مسويه بيتها مدرسه كل الطالبات يرحون يدرسون عدهه خصوصي حتى تنجحهم وزوجهه نفس الشي يفتر على بيوت الطلاب يدرس
سليمان : عال مسوين مهنتهم تجاره
هذا الفساد بالمجتمع لما كولشي يتحول الى تجاره
لما الطبيب يتاجر بصحه المرضى ولما الموظفين تراجعهم يستغلوك ويتحججون عليك حتى تدفع
اما التعليم فهذه حكايه كبيره
لان اساس البلد هو التربيه والتعليم
روحي بنتي شوفي دروسج ودزيلي لؤي
لؤي : الحمد لله ع سلامتك بابا
سليمان : تعال ابني اريدك تروح للمشتل تشتريلي ورد جوري اريده تازه واتفق وياه لمدة اسبوع يحضرلنا
يوميه ثلاث وردات
لؤي : زين تريدهم بسندانه
سليمان : لا خل يسويها شده يربطهن سويه
******
اليوم الثاني الصبح
سليمان : رهف تعالي بابا اليوم اريدج تاخذين هاي الوردات
توديهم للست رشا وتعتذرين منها ودكوليلهه اني مستعده
اتغير لخاطرج واذا سألتج منين هذا الورد كوليلهه من حديقتنا
رهف : بابا الست تريدني اسجل عدهه خصوصي
سليمان : اعرف بنتي المهم فهميها بالامتحانات حاتسجلين عدهه وتاخذين دروس عدهه
رهف : بابا وكرامتي هي هانتني كدام الطالبات
سليمان : كرامتج محفوظه وانت بس نفذي كلامي وراح ترجعلج كرامتج وانطيني بوسه قبل ماترحين
*****
رهف : صباح الخير ست
اني اعتذر عن كل تصرفاتي وهذا الورد الج وأرجو ان تقبلي
ست رشا : اشو خل اشوفهن هاي ريحتهم حلوه منين جايبتهم
رهف : ست من حديقتنا
ست رشا : اكول ريحتهم طيبه ومبينه تازه
******
سليمان : تعالي رهوفه احجيلي شصار اليوم
رهف : انت اجمل بابا بالدنيا انت انسان حكيم
اول مانطيتها الورد جانت بالبدايه معصبه
وراها اشتمت الورد
تغيرت كل تعابير وجهه وبس تضحك وتسولف ويه البنات وتتشاقى
الكل استغربوا من تصرفها
اليوم المدرسه كولهم يكولون اشبيها ست رشا فرحانه
سليمان : باجر هم تاخذيلهه ربطه ورد
المهم تعاملهه وياج تغير ؟
رهف : اكيد كلسع تضحك وتباوعلي ومن تحجي نكته تباوعلي ودكولي مو رهوفه
سليمان : مو تنسين باجر الورد راح اخليهم هنا عالميز
بس ديري بالج لا تشتمينها
رهف : حاضر بابا
*****
اليوم الثاني
تكررت نفس الحاله رهف قدمت الورد للست رشا
والست تشتم الورد ومزاجها يتغير وتبتسم وتضحك وتتشاقى ويه الطالبات
استمر تقديم الورد للست مده اسبوع

رهف : بابا شنو اليوم ماكو ورد للست ؟
سليمان : لا بابا لهنا وكافي
رهف : بابا الست تنتظرني اوديلهه الورد وصارت صديقتي
شلون اليوم اروحلهه بدون ورد
سليمان : انت روحي وهي راح تتصرف
*****
ست رشا : رهف حبيبتي وين الورد اني انتظرج من الصبح
رهف : اسفه ست مابقى بالحديقه ورد خلص
ست رشا : لا ماما اريد ورد دبريلي باي طريقه اليوم اروح وياج لبيتكم وادور بلكي نحصل ورده مفتحه
رهف : ميخالف ست
شو هاي شبيها الست تصرفاتها مو طبيعيه جسمها كوله يرجف
*****
ست رشا : رهف تعالي نروح لبيتكم
رهف : ست بعد عدنا درس
ست رشا : اخذتلج اجازه من مدرسه الفيزيا ء امشي بسرعه
رهف : اخذت الست لبيتنا ياربي شسوي شلون راح أواجهه لما تشوف الحديقه مابيها هالنوع من الورد
لما دخلت للبيت لكيت بابا بالحديقه كاعد واستقبل الست
سليمان : روحي بابا رهف جيبيلنا كهوه للست رشا خل تشربها تهدئ اعصابها
اما الست رشا فهي بعالم آخر
تفتر بالحديقه تبحث عن شتله الورد الجوري
سليمان : بيده ورده من نفس النوعيه
تدورين على هالورده ست ؟
ست رشا : إي اي
سحب ايده سليمان
لا مو بهالبساطه
صارلي اسبوع اخليلج البودرة بالورد حتى تستنشقيهه
كلفتيني هواي هالمره مو ببلاش
ست رشا : تفضل اخذ من شنطتي اخذ الي تريده وايدهه ترجف ابوس ايدك انطيني الورد ه
اخذيها
بعد ما اشمتها
ست رشا : ماغير شي لا هاي مو من نفس الورد الي تجيبه رهف
وينج رهف تعالي حبيبتي جيبيلي ورده وحده فدوه اروحلج
ابوس ايدج
سليمان : شفتي بنتي رهف خليتها تبوس ايدج وتنذل مثل ما ذلتج وهانتج
رهف : بقت صافنه ودموعها نزلت من شافت ست رشا الجبروت والي كانت مسببتلهه عقده
سليمان : بنتي خل الكهوه هنا وروحي
ست رشا : ابو رهف ارحمني راح اموت راسي راح ينفجر
سليمان : استريحي ست
تفضلي هذا شريط حبوب من نفس مفعول البودرة الي اخذتي منها
تاخذين كل يوم حبايه
هذه هديه مني ومن تكمل تتصلين بهذا الشخص يجيبلج الحبوب لبيتج للمدرسه وين ماتحبين وبالسعر الي حايطلبه منج انت بس كوليله من طرفي
اخذي الحبه وشربي كهوتج وطلعي بره ماريد اشوفج بيتي مره ثانيه
ها وهذه كرصة اذن الج لان اذيتي بنتي
واذا سمعت مره ثانيه اشتكت منج
العقوبه تكون اقسى اذا تردين حياتج وحياة عائلتج فتهمتي
سمعيني صوتج مو تهزين راسج
ست رشا : حاضر حاضر مثل ماتحب
*****
من يومها انتهى مستقبل ست رشا بسبب ادمان المخدرات
والي انتقم منها حجي سليمان من خلال البودرة الي رشها على الورد
اما رهف زادت بتصرفاتها الرعنه ومحد يكدر يوكف بوجها
كمال نجحت عمليته ورجع يمشي على رجليه
وتغيرت ظروفهم بعد ماتعين احمد
سليمان استمر بإدخال المخدرات للبلد
احمد تقدم لخطبه زينه وسليمان رفضه
وبقت زينه ترفض اي عريس يتقدملهه
لؤي توفى بحادث سياره
وانطفت الفرحه بالبيت وتحولت الى حزن دائمي
*****
السايق : الو حجي سليمان
الحكني
سليمان : خير شكو ؟
السايق : حجي كادر الكمرك متغيرين ولزموا البضاعه بالسياره ونزلوا كل البضاعه
سليمان : شنو ؟
السايق : الوووووو
حجي جاوبني
كريمه : حجي حجي
توفى الحجي سليمان بعد الصدمه لان السياره محمله بضاعه بملايين الدولارات
توفى وما اخذ معاه غير الخامه البيضا
وترك لأولاده وبناته صدمه كبيره
بعد ماكان ابوهم المثل الأعلى والقدوه
صار عار عليهم ويخجلون من ذكر اسمه
بعد كل هذه الاحداث تقدم احمد لخطبه زينه وتزوجو بعد كل هالمعاناة
رهف تركت المدرسه وبقت بالبيت مع امها واخوهه امير الصغير
انتهت القصه اتمنى عجبتكم
ترقبو البارت الثاني بقصة اخرى من بيت اخر

******بقلمي فردوس عبد اللطيف******