part20الاخير
بيان غارقه بدمها
كمال:بيان بيان افتحي عيونك
بيان فتحت عيونها وشدت عاايده بقوة. وبعدين اغمى عليها
مراد يضحك بهستيريا:قتلك لو ماكانت ليا رح نقتلها وتعيش عمرك بدونها وهرب
كمال تجمعت عليه الناس قام بيان وطلع بيها لأول عياده قابلاته دخلها وانهار كل اللي يتخايل فيه انها تموت ويقعد بدونها
رن هاتفه:نعم
احمد:وينكم نستنو فيكم بالغدا
كمال:انا في عيادة.....بيان مضروبه وسكر عليه
بعد ربع ساعه كانو الكل معاه ويستنو
كمال يدور في الممرات ويديه ولبسه دم
قرب منه عامر:برا غير واغسل من الدم
كمال:اخطاني
عامر:بتقعد هكا
كمال:ايه فوتني
بعد 3ساعات طلع
الدكتور:طلعنا الرصاصات بس المريضه حالتها حرجه وخاصه في وضعها
كمال:وضع شنو
الدكتور:زوجتك حامل هيا او البيبي
كمال تعصب وعيونه بدو حمر:مانبيش اي صغار معاها بس هيا تنوضلي كويسه
الدكتور:ممكن تصيرلها مشاكل ويصعب حملها مرة ثانيه
كمال:دير زي ماقتلك هيا مايعوض وجودها شي 💔
الدكتور:تمام نبو دم فصيلة B+ ومشي
قعمز كمال عالكرسي وحيله انهد نزلت دمعته وسكر عيونه"سامحني يارب بس مانقدرش نعيش في دنيا هيا مش موجودة فيها"
هاجر تبكي واجعتها بيان
اما اسلام فهو بين نارين خايف عليها لانه معتبرها اخته في نفس الوقت يقعد مراد خوه يعني الكل يشوفله انه خو اللي بسببه هيا بين الحياة والموت
عبير عالهاتف:وين انت
ايهاب:قاعد في المحل عيوني
عبير:ماعندكش علم بمرت خوك
ايهاب:منو!!
عبير:بيان اليوم ضربها ولد عمها برصاص
ايهاب:لاحول الله مش عارف على شن ناوي هدا
عبير:مسكينه 😓
ايهاب:تو بنسكر المحل ونمشيلهم بعدين نحكو
عبير:بهي رد بالك على روحك
ايهاب:تمام باي
اسامه قعمز جنبه:ربي يفرج ادعيلها
كمال:حيلي انهد ياصاحبي مش متخيل انها ممكن تموت وندفنها تحت التراب
اسامه:ان شالله تنوض بالسلامه وترجع خير من قبل شد حيلك
كمال:يارب
"حبكم لشخص معين مايبانش اوقات الفرح ولا لما تكونو مع بعض الحب يبان لما تشوفوه يتألم يتوجع ويتعذب وقتها رح تعرفو انكم تحبوه لما كل دقه في قلبكم تطلع متألمه على خاطرة لما نفسكم يثقل لانه مش قادرين تساعدوه لما تكونو مستعدين تاخدو كل وجعه بس هوا يكون كويس وقتها بس تأكدو انكم تحبو بجد "
الساعه 8المغرب
الدكتور طلع:نزلنا الجنين والنزيف وقفناه بس رح تقعد في العنايه وضعها مش مستقر وممكن يرجعلها النزيف ثاني
كمال ساكت
اسلام:هاجر نوضي نروح بيكم
هاجر:لا خلينا هنا مع كمال
اسلام:قعدتكم بلا فايده تشوفي فيه وضع خوك نوضو روحو للحوش واعطيني لبس ليه خلي يغير حتى هنا
شخص:اسلام
تلفتله:عاصم اهلين
عاصم:كيف الحال وين مختفي
اسلام:الحمد لله بخير موجود
عاصم:ان شالله لاباس خيرك
اسلام:بنت عمي مضروبه في العنايه هنا
عاصم:لاحول الله ان شالله ربي يشفيها شن قالولكم
اسلام:الدكتور قال بتقعد في العنايه وضعها مش مستقر
عاصم قام هاتفه:ايوا
ساره:هيا حبيبي اني نازلة شويه بس
عاصم:تعالي قدام العنايه فيه مريضه خشي شوفيها
سارة:تمام اني جايه
نزلت ساره وخشت للعنايه ربع ساعه وطلعت:وين اهل المريضه
كمال وقف:انا راجلها خيرها
ساره:النزيف حاليا واقف بس لازم يفوتو24ساعه باش نتأكدو انه مايرجعش والكليه اليسار مضررة شويه من الرصاصه ان شالله ترجع تشتغل كويس وما توقفش
كمال:ان شالله خير
عاصم:هدا راجلها
اسلام:ايه تعرفه
عاصم ماشي جيهته:كمال
كمال:اهلين عاصم وسلمو على بعض بحرارة
عاصم:ربي يشفيها
كمال:امين
عاصم:اي خدمه تفضل
كمال:تسلم بارك الله فيك
"اللي قاري #وجدتكي_ملجئي اكيد مذكر عاصم وسارة 💛 "
عاصم:هيا
سارة:مني هادو
عاصم:كمال صاحبي متعرف عليا ليا فتره اللي قتلك عليه ضابط وكان مأسر
ساره:اها واسلام
عاصم:هدا خواله اقارب بوي وعندهم اسهم في شركات تركيا
سارة:اممم بهي نتعرف على مرته
عاصم:غدوة تعرفي عليها توا بنروحو تاعب بكل انا
فاتت ليله طويله عالكل بين خوف وتوتر
اما مراد خلاص فاقد الامل من كل شي بعد تأكد انه خاسر وماقدرش يضر كمال باي شي
الصبح الساعه10
وصلت ساره وعاصم للعياده وخشت طول لبيان
عاصم:شن الوضع
كمال:مش عارف الدكتور خشلها قبل شويه
عاصم:ان شالله خير بس ماقتليش كيف انضربت بالرصاص
كمال:قصه طويله تو نحكيهالك
عاصم:تمام وقعدو يستنو
طلعت سارة:الحمد لله عاسلامتها مدامتك فاقت وصحتها تمام النزيف وقف
كمال:الحمد لله
سارة:هيا تبي تشوفك تفضل
كمال:بهي وموضوع البيبي نحكيلها انا ولا
سارة:براحتك لو انت شايف انك تقدر تحكيلها وتتقبل منك عادي ولو عارفها ممكن تتعب فاخلينا احنا نحكولها ونشرحولها وضعها كيف كان هيا حسب ماحكالي الدكتور ماعندهاش علم بالحمل صح
كمال:ايه
سارة:تمام خشلها توا ومبدئيا ماتحكيلها شي لين نطلعوها من العنايه قبل
خشلها كمال:الحمد لله عالسلامه يا قلبي
بيان بضعف:استحشتك انا كنت نحلم بيك حلم حلو
كمال:ارجعيلي كويسه زي قبل ونديرلك كل شي ونحققلك حلمك يا روحي
بيان شدت يده:خليك جنبي
كمال باسها:حاضر
طلع بعد رقدت
عامر:بهي رجعتلك الضحكه كنت تخوف
عاصم يضحك:حتى هيا الكبيده
كمال:ايه اعلقو عليا توا
عاصم:تعالا ننزلو للكافتيريا ناخدو قهوة واحكيلي شن صار
نزلو ومعاهم عامر
حكاله كمال القصه من البدايه
عاصم:فرخ الحرام وتوا وين هرب زعما
كمال:هدا اللي نفكر فيه نبي نجيبه من تحت الارض
عامر:فوته ياراجل مريض هدا
عاصم: عندك رقمه
كمال:ايه
عاصم:نقدرو نلقو موقعه
كمال:تكون خدمتني خدمة العمر
عامر:خيرك انت بتهديه ولا تزيد تعبيله راسه
جاهم اسامه:اووه حتى عاصم هنا كبيرة
عاصم:وينك انت مختفي شن عندك
اسامه:ماعندي شي نخدم على حالي
عاصم:تو بعدين نتحاسبو هيا هات الرقم انت
كمال كتبهوله في ورقه وعطاه هاتف بيان فيه رسايل اللي بعتهملها لما خطف ملاك
ركب عاصم لمكتب سارة:اميرتي
ساره:نعم حبيبي
عاصم:طلعيلي موقع الرقم هدا
ساره:رقم منو
قعمز جنبها:غير طلعيه هيا وفيه حتى رسايل شدي الهاتف
قعدت سارة تبع في موقع الرسايل لين طلعت مكانه:شوف ها
عاصم:اممم منورة يا عسل
سارة:شن تبي فيه انت
عاصم باسها:شي مادوريش بيروح بيك مروان بعدين بهي
سارة:رد بالك على روحك
نزل عاصم يجري:هيا بتمشي ولا لا
كمال:ماسرع
عاصم:صقع عليك
عامر:فكونا الزح
كمال:اسكت انت وخليك هنا
جي ايهاب:معاكم
عاصم:منو هدا!
كمال:خوي هي مشينا
وطلعو مشو لاستراحه تبان مش ساكن فيها حد
نزلو وخشو لقوه راقد
كمال ضربه برجله:صباح الخير
ناض مراد مخلوع:انت شن دير هنا كيف عرفت مكاني
عاصم:طلعنالك من الحلم 😏
كمال:تعرف لولا اني نخاف ربي اقسم بالله لما نشرب من دمك
مراد:بهي طلعت تخاف ربي
ايهاب:لكن مافيش مانع من بعض التخربيشات
كمال:ياعيني
وطاحو فيه ضرب كسروه ياناري "يستاهل الحيوان"
وطلعو
كمال يغسل في ايديه من الدم:ااخ هدا وين فرغت الشحنه
عاصم:ايه والله
ومشو للعياده لقوهم مطلعين بيان لغرفه عاديه
خشلها كمال:احم هي تفضلو برا تم وقت الزياره
هاجر:تحشم شن تلز فينا
كمال:مادخلكش بنقعد مع مرتي بروحنا وقرب منها قطوستي كيف حالك توا
بيان:كويسه وين كنت
كمال:عندنا مشوار انا وايهاب
بيان:ايهاب!!
كمال ضحك:ايه مش تبينا نرجعو
بيان ابتسمت:نحبك
كمال:اسس فكينا
فاتو ايام فيهم بدت بيان تتحسن وطلعت من العياده
ايهاب تصالح مع خواته وخوته ورجع للحوش
هاجر قعدا في حوشهم واسلام معاش كلمها بكل
فتون:عمورتي
عامر شاد هاتفه:هممم
فتون:حبي
عامر:ها قتلك ها
فتون زعلت وناضت بتطلع
عامر:غير تعالي وين ماشيه
فتون بدموع:نحي يدك انت معاش تحبني
عامر:من قال يا همي
فتون:واضح والهاتف اللي شاده من بكري
عامر:والله نبعت في الخدمه لصاحبي ها شوفيه
فتون:نحي عليا
عامر:تعالي بهي قعمزو خيرها بنيتي شن كنتي بتقولي
فتون:اممم اني
عامر:خيرك
فتون قربت منه وهمستله:بيجينا بيبي 🤗
عامر:الله 😍🤤
فتون:ايه
عامر:الله اكبر نبي فرخ رهو
فتون:ماصح وجهك اللي يجي من ربي بهي
عامر:ايه حق خلي نمشي نبشر امي وطلع يجري
عند بيان راقده عاسرير وكمال جنبها
بيان:حبي
كمال:عيونه
بيان:هاجر قعدا هنا
كمال:ايه مش عارف خيرها كل مانقلها روحي تقولي لالا مرات مرتك تحتاج شي
بيان عرفت انه اسلام عرف كل شي بس تمنت ماينتهيش زواجهم لانها اكثر وحدا تعرف قداش يحبها
قربت منه:قلبي سيب الخدمه والهى بيا
كمال:نحي يدك وخليك في جرحك خير
بيان: بهي اني مكسده
كمال:انتي مكسده ودايرة عمليه الزوز معناها اسكتي وخليني في همي
بيان:هههه بهي سكتت
كمال 😒😒
ايهاب:مستاحشك انا
عبير:حتى انا حبيبي
ايهاب:بهي امتى نجي نخطبك
عبير:شنو 😨😨
ايهاب:ايه ولا ماتبينيش
عبير:لا مش هكا بس فاجئتني
ايهاب:فاجئتك كيف يعني شن كنتي متوقعه اني نلعب ولا كيف
عبير:لا مش هكا
ايهاب:لا هكا انا نبيك وناوي الحلال وانتي وراحتك
عبير:خيرك حبيبي
ايهاب:شي
سكتت
ايهاب:انا بنرقد ليلتك سعيده وسكر بدون مايسمع ردها
قعد للصبح مارقدش يفكر انها ممكن ترفضه عاخاطر قصته وندم انه حكالها عاكل شي
الساعه 12 رن هاتفه ماردش
بعتتله رساله"ممكن تركبلي لحوش لوكه نبي نحكي معاك"
تردد يركب بعدين غير لبسه وركب
عبير:كيف حالك
ايهاب:حالي بهي شن تبي تحكي
عبير قربت منه:خيرك معاي 😔
ايهاب:ماخيرنيش شوفي روحك
عبير:بهي نحبك
ابهاب:بهي
عبير:ونبي نتزوجك
ايهاب قعد يشوفلها:بهي علاش حرق الدم
عبير تضحك:عادي نقيس في غلاي
زاد لصقها فيه:وعرفتيه غلاك
عبير:بهي سيبني عيب يركب حد
ايهاب:انتي اللي بديتي
عبير:بهي خلاص حبي بنخش تو نحكو بعدين
ايهاب:نطلقك رضيه واشرلها على خده
باساته وخشت تجري
بيان نازله تتمشى
كمال:شنو ياسر
بيان:نبي نخش لهاجر
كمال بهي بري هي
خشتلها:شن الجو
هاجر:اهلين تعالي قعمزي
بيان: معاش جربتي تحكي معاه
هاجر بدت تبكي:يصد فيا كل مرة قبل تنخطف ملاك كنت جايه خلاص قلي ورقتك تو توصلك
بيان:للدرجه هدي
هاجر:والله نحبه قلبي يوجع فيا ونادمه
بيان:لاحول الله
هاجر: ياريت يعطيني فرصه وحدا بس
بيان:تبي نحكي معاه
هاجر:لالا خليه براحته معاش نبي نضغط عليه
كمال مقعمز يدخن
ايهاب:نبي نقولك شي
كمال:تفضل
ايهاب:انا نبي
كمال:تتزوج
ايهاب:كيف عرفت
كمال:هه قبل ترمش نعرفك شن بتقول
ايهاب:بهي شن تقول انت
كمال:توكل علئ الله دير صيانه للحوش لوطه وانا تو نلغي الدروج متعي ونفتحهم على برا
ايهاب:ميه ميه
كمال: ماتسودش وجهي مع الناس
ايهاب:وجهك ابيض ماتفكرش بكل
احمد:دوم
كمال:وين انت من يوم جابت مرتك معاش شفنا وجهك
احمد:مهو هلبا عليها الصغار
كمال:بكل انت شكلك واكل بسبوسه يا فرخ
ايهاب:طنجرة شكلها مش طاجين 😂
احمد:مافضاني انا جيت جنبكم وركب لحوشه متكنطي 😡
فاتت فتره خطب ايهاب عبير وبعد شهرين تزوجو
بيان عرفت انها اجهضت وحملها بدي صعب اضايقت هلبا بس دعم كمال ليها خلى عندها امل كبير ومشت لدكتورة تعالج
ملاك واحمد قعدين كأنهم عرسان كل يوم حبهم يكبر اكثر وعيلتهم الصغيرة مكونتلهم عالم حلو خاص بيهم
هاجر قعدا في حوشهم اتصلت باسلام فتره وبعدها فقدت الامل وكل يوم تتوقع يطلقها
في يوم مجتمعين الكل عالفطور رن الجرس
كمال:نوض افتح
ايهاب:احمد افتح الباب
هاجر:مابردكم ومشت فتحت تفاجئت بمنظر اسلام وكيف لابس اسود
اسلام:ممكن نخش
هاجر:اكيد تفضل
اسلام:السلام عليكم كيف الحال
كمال:اهلا هي تعالا افطر
اسلام:صحتين
بيان وقفت قدامه:خيرك شن مضايقك
اسلام:مراد
بيان:شن دار ثاني
اسلام:قتل روحه امس
تفاجئو الكل ووجعهم رغم كل شي داره والعذاب اللي عيشهم فيه بس ماحد تمناله نهاية زي هدي انه يموت كافر لا دنيا ولا اخره
بيان:ربي يرحمه ويسامحه
اسلام:عارف انه تعذبتو هلبا بسببه وانا اول واحد ضرني بدون اي احساس بس يقعد خوي ودمنا واحد جايكم في طلب بس سامحوه
كمال:الله يسامحه
الكل:ربي يسامحه
اسلام شاف لهاجر:بنحكي معاك شويه
هاجر:تمام وخشو لدارها
اسلام: انتي عارفه عاصم قريبي من فتره كلمني وقلي انه خوالي ليهم اسهم في شركاته التركيه وحصة امي قعدا معاهم وهوا بيستقر غادي فتره فاعرض عليا نسافر ونخدم معاه وشركات ليبيا بنبيعهم وبعد دفنت خوي اليوم معاش عندي شي يخليني هنا
هاجر حست بقلبها بيوقف:اها تمام
اسلام شافلها:حاولت هلبا نطلقك مرتين نوصل للمحكمه ونرجع فيه شي مزال متمسك بيك ويبيك في حياتي مدلها يده تجي معاي ونبدو من جديد
هاجر بفرحه:اكيد نمشي معاك وين ماتبي
وقف ويقرب منها هيا توخر لين لصقت علحيط
اسلام:خيرك
هاجر:شي بس قطع عليها ببوسه عبرلها فيها على كل شي حسه في بعدها
اسلام:نموت فيك
هاجر:انا اكثر
اسلام:هيا نروحو
هاجر:حاضر
وطلعت روحت معاه
بعد اسبوعين سافرو لتركيا
اما نادين بعتوها عيالها تقرا برا بلكي تنسا كمال وتتحسن حالتها وفعلا تأقلمت مع حياتها وفاتت الكل
مرو سنتين 🌷🥀
بيان في المستشفى فتحت عيونها بتعب
كمال:الحمد لله عالسلامه غزالتي
بيان:الله يسلمك
كمال:جبتيلي بنوتة عسل 😍😍
بيان:الحمد لله
جو العيله كل يهنو ويباركو
ايهاب:شن بتسموها
كمال:"نبض"
ايهاب:من وين طلعت بيه الاسم هدا
كمال: احلى هدية عطاهالي ربي شن بتكون غير نبضي اللي عايش بيه
فتون:تتربى في عزكم ومحجوزة من توا لعليوا
ملاك:لالا بناخدها لاياد
كمال:مانيش عاطيها ارتاحو بتقعد في وجهي بهي
بعد اسبوع طلعو من المستشفى وكمال مش مخليها دقيقه طول الوقت معاها يغيرلها ويهتم بيها ومايبيش حد يمسها
بيان: بالك ياسر وحطها في سريرها
كمال:لا خليها معاي لين ترقد نبضي الحلوة حبيبت بابا اميرته ياعسلي ويلعب فيها 😘😍
بيان:كأنه اسمائي كلها خدتها هيا
كمال:لالا انتم الزوز اميراتي
بيان:بهي 🙄
ثاني يوم
طيب في الغدا طلعت بتناديه لقاته يبوس فيها من فمها
بيان بعياط:كمااال
كمال:خيرك اللطف خلعتيها
بيان:معاش تبوسها 😡😡
كمال:علاش
بيان:تتحسس قعدا صغيره
كمال:وبتتحسس مني يعني انا حتى الدخان مبطله عاخاطرها
بيان:والله خيرك انت ناسيني في جرتها
كمال:انا 😨
بيان:ايه انت معاش شايف. حد غير نبض ديما وانت بنتي وبنتي فددتني
كمال:هدي غيره ولا شنو
بيان:هدا الحق وبرا تغدا
كمال:وانتي
بيان:مانبيش وخشت للدار قربعتها في وجهه بعدين فتحت رضعها انت بهي 😏😏 وسكرتها ثاني 😂
كمال:خيرها امك فصلت غيرانه منك بنوتي العسل سلم عويناتها ياربي
العشيه طلع ورفعها معاه لحوش فتون
عامر:وخيرك جايب بنتك معاك
كمال:امها لزتنا
عامر:اياه غريب قعدا صغيره كيف خلاتك تطلع بيها بروحك
كمال:وين فتون
خشت جايبتلهم القهوة: انستينا انسه نبض
كمال:شدي خليها عندك
فتون:عادي بيان
كمال:بيان غايره منها قتلي معاش شايف حد معاها
فتون:هههه لا حق. انت طول الوقت معاها
كمال:بهي بهي اهو الشنطه متعها فيها كل شي ليها وغدوة تو نروح بيها
فتون:اوك
روح للحوش مالقاهاش اتصل بيها:انزلي
بيان:شن تبي فيا
كمال:انزلي قتلك
بيان:لا خليك انت وبنتك حبيبتك نبيش نزعجكم
كمال:خمسه دقايق تكوني جنبي والا عارفتني شن ندير
ملاك تضحك:نوضي انزلي لراجلك بلا هبال
بيان:اضحكي زيدي مابردك مافيش حد حاس بيا 💔
نزلت وقفت قدامه:شن تبي
جبدها من يدها قعمزها جنبه:تو معقوله زعلانه بجديات
بيان:ايه بجديات لانك تحبها اكثر مني وتقوللها اميرتي وعسلي وغزالتي وحتى قطوستي 😓😢
كمال:بهي اسس ماتبكيش ياعمري مش هدي حلمنا اللي نتمنو فيه من سنين
بيان:ايه
كمال:خلاص حتى انتي تحبيها وتموتي فيها بس غايرة لاني اهتميت بيها اليومين هادو هلبا
بيان:معاش تهتم بيها اكتر مني
كمال:حاضر
بيان:ومعاش تقلها قطوستي وعسلي
كمال:حاضر وشن تاني
بيان:ووينها هيا 😱😱
كمال ضحك:هدا وين تفكرتي
بيان:بحديات وين نبض
كمال:قعدا عند فتون
بيان:شنووو لالا برا جيبها مش رح تقعدلهم
كمال:وعلاش
بيان:شن علاش لانها ماتاخدش في شيشتها كامله وماترقدش الا عاجنب معين وساعتين وبتنوض برا جيبها
كمال:لا خليها عند عمتها هيا تعرف تتصرف
بيان:اووف ياربي 😓
كمال:قبل شويه ماكنتيش تبيها
بيان:بنتي والله 😒
كمال:هههه وانا شن
بيان:انت روحي وقلبي وعيوني وكل كل شي
كمال:ياحليلي بهي امتى بنديرولها اسبوع
بيان:امتى ماتبي
كمال:معناها يوم السبت
بيان:مش قريب
كمال:لالا عادي الصاله تو نحجزها والباقي كله ساهل
فاتو ايام وبدو يجهزو لاسبوع الاميرة نبض
روحو هاجر واسلام بعد اصر عليهم كمال يحضرو الاسبوع
يوم السبت الساعه 7بيان لابسه قفطان ازرق كبير وملبسه لنبض زيه ويستنو في كمال
شويه وخش لابس زبون ازرق زيهم:محلا
بيان:مني 🤨
كمال:مرتي طبعا محلا مرتي 😃😄😅
هاجر:هههه مركزة معاك
قام كمال نبض وخشو على اسماء الله الحسنى
الكل يتفرجو عليهم ومعجبين بيهم وبي كمال اللي هايم في مرته وماقامش عينه من عليها
حط نبض في سرير جنب كرسي بيان
فجأة انطفت كل الاضاءة
بيان شدت في زبون:لا ياربي مش معقولة علاش هكا
كمال:مذكرة شن اليوم
بيان:شن
انفتحت شاشه العرض وطلعت
حضنها كمال:اليوم اللي بديتي فيه على اسمي😍 وكل املاكي
بيان:عيد زواجنا
كمال:واحلى تاريخ في حياتي حبيت نحتفل بي بنتنا في نفس اليوم وكل عام بنحتفلو بعيلتنا في نفس التاريخ
بيان:نحبك
كمال: الحب متلخص فيك 🥰😘
انفتحت اغنيه "من حلاتي"
قعدت بيان ترقص عليها وهيا بتطير من الفرحه انها اخيرا ارتاحت وعايشه مع حبيبها اللي تمناته كل لحظه ودارت العيلة اللي تحلم بيها من صغرها ❤️
The end
الحب عمره ما انقاس بكلمه نحبك ولا بكثرة الاتصالات والمسجات الحب كلمه من حرفين بس معناها كبير انك تحب يعني بتصبر وتتعذب يعني بتجرب الفراق والشوق بتتحمل البعد والمسافات بتنوجع وبتنجرح والصابر هوا اللي يحب 💛
النصيب اكثر كلمه عذبت ناس وكسرت قلوب ناس وكانت السبب في فراق هلبا بس في النهاية ربي اكيد رح يختارلنا النصيب الحلو وما بعتلنا انسان وخلاه نصيبنا الا وهوا عارف انه الخير لينا 💚 و نصيب حد ما ياخده حد
كلنا بشر خلقنا ربي خطائين يعني اللي الغلط مش عيب او حرام. العيب لما ماتتعلمش من غلطك وماديرش الصح بعده ربي يغفر ويسامح من احنا باش مانسامحوش ونغفرو خطأ ناس نحبوهم عادي لما ننسو الي صار ونفتحو صفحه جديدة ونحاولو مانغلطوش نفس الغلط مرة ثانيه تمشي الحياة 🖤
أخيرا انا Lole saad نبي نشكر البنوته اللي نقلتلي القصه هدي وطلبت مني نكتبها وساعدتني في الاحداث واللمسات اللي زدتها للروايه وكان ليها دور كبير في الروايه كل الصور كانو منها وهيا كاتبه مبتدئه ان شالله نشوفك في يوم احلى كاتبه
ونتلاقو في رواية جديدة 😘😘
