لم ارتكب ذنباً

5

‏إنَّ عِزَّةَ النَّفْسِ تُضَاهي جَاهَ المُلُوك ... !

#لم ارتكب ذنباً
.......................
الكاتبة ام ليان
.......................
بعد طول الطريق وصلنة تقريبا بـ8 بليل دخلت امشي بصف بيبي لازمتها من ايدها ونمشي وعمي ورانه هو وياسر
دخلنا كعدنا بالهول وكلهم يباوعون وعلامة استفهام بوجهم?!
كعدتت ومدنكة راسي عمي كعد ومرت عمي ام ياسر كاعدة والبنات اجوي كلهم اجتمعوا يباوعون شكو انطونا مي شربت بيبي وحجت

كالت.. اسمعوا زين هاي قبس اشرت علية راح يعقد عليها ياسر كلمة زايدة او اعتراض ما اريد
حجت هيج مرت عمي ام ياسر صاحت ...لو تموت هاي الكح**ة ما ياخذها ياسر
عمي صاح ... سميرررةةةة سدي حلكج
ام ياسر...و الله ولا اسكت شنو ازوجهة وحدة بايعة روحها
اني يحجون ومدنكة راسي ودموعي تنزل تمنيت كاتليني ولا هالذلة!
بقوا صياح وهوسة
اخر شي ياسر كال لامة...يمة اني قابل بيها اني راح ازوجهة مو انتي الي تزوجيها لا تدخلين !
سكتتوا بيبي كالتلهة عفية وليدي هيج ربيتك
عمي صاح كافي هسه صبوا عشا ما حاطين لكمة بحلكنا منهد الغدا بيبي كالتلي كومي غسلي وتعاي
رحت فتت للمطبخ اول مادخلت حسيت واحد كرصني حيل بزندي وهمست يم اذني وكالت.. لاعبالج اجيتي اخذتي ياسر تصيرين مرتة لا حبيبتي غلطانة انتي اخذج يستر عليج كح *ة واجيتي خدامة لهلبيت باوعت ام ياسر عافتني وراحت تخوزر بية واني افرك بزندي من الوجع كبل طلعت من المطبخ حتـﻰ ما غسلت رحت للهول كاعدين بية
بيبي كالت.. تعاي كوميني اخذيني لغرفتي تعبت من الطريق
لزمت ايدها ومشيتها للغرفة كعدت على السرير
كعدت اني هم بالكاع
كالت انزعي جبتج وروحي تعشي
قبس.... لا بيبي ما اريد ما اشتهي
كمت نزعت الصاية بقيت بالبنطرون والقميص
بيبي.... لبسي كلابية ترة هالبس ميقبلوا هنا
قبس... هسه راح اجيب جنطتي
طلعت باوعت اسمع صوتهم بالهول يتعشون طلعت من باب المطبخ عالكراج لان الجنطة برة توني وصلت اريد اخذ الجنطة سمعت صوت فززني درت وجهي باوعت ياسر
ياسر .... شعندج طالعة بهالبس
قبس. .. ا ا ااا مو اريد اخذ الجنطة ملابسي بيها
ياسر. .. دخلي واني هسه اجيبها
عفتة ودخلت عالسريع يم بيبي
اجة طب وحط الجنطة بالباب واجه يم بيبي
ياسر. ..ها بيبي ليش متعشيتي
بيبي. .. ما اريد بس اريد ارتاح الطريق تعبني رجلية يوجعني
اني يحجون رحت للجنطة فتحتها طلعت دشداشة
اسمع بيبي تكول لياسر ... باجر جيب سيد خلي يعقدلكم
عفتهم وطلعت باوعت رحت للحمام بدلت لبست الدشداشة وبقيت الشال على راسي وطلعت رحت لغرفة بيبي وية دخولي طلع من الغرفة دنكت وعبرت من عندة وصلت البيبي لكيتها تشرب دواها رفعت راسها باوعتلي اشرتلي اكعد يمها اجيت كعدت يمها
باوعت بوجهي وكالت: شوفي بيبي ادري بيج مظلومة والصار مو بيدج بس حملوج الغلط وهنا غير عيشه عن بغداد تحملي وسمعي كلمة رجلج ولا تعاندينة اكسبي تره والله ياسر ورده واني خليته يعقد اليج لان مايلكة مثلج وطيعي رجلج ...خوش بنيتي
هزيت راسي بأي
بيبي: هسة تعبانة من الطريق كومي اخذيلج فراش ونامي
رحت اخذتلي فراش وفرشت ومددت وبيبي هم نامت بسرعة لان تعبت من الطريق
واني تعال الي يجيب النوم لعيوني
رجعت ليوم الحادثة والمستشفى وخزرت ابوي وضربة بسام الية وخوف امي ااااةةةة يمةةة الله شيعلم بحالج
بقيت اتكلب واسمع اصواتهم بره بس مطلعت حتى ما اعرفهم يعني صحيح بيت عمي بس بعيدين ما اروحلهم اخر مره صادف رحتلهم قبل 5 سنوات بعرس ياسر هه وهسه اني راح اصير زوجتة
رجعت لذكرياتي اتمنى يرجع بية الزمن ومصار هيج
كلشي راح
امي
جامعتي
ومحمد! !!!
اخر شخص اتوقع من عندة الطعنة جان يموت ع التراب الامشي علية ودائما يتغزل بعيوني ويكلي( عيونج الزرك سحلني)
وهسه يكلي جنتي بحضن غيري تمنيت ميتة بذاك اليوم ولا سامعة هالكلام
وهسه كلشي راااااااحححح
اتذكر ودموعي تصب
كمت ابجي
ليش يربي؟ مماذية بشر ..لا مجذبة ولا مسوية شي حرام
ليش هيج صار بية
لييش يربيي جامعتي الي حاربت الدنيا علمودها وهسه راحت
اخخ راسي موتني وجع وكمت اشهك بصوت ناصي خاف بيبي تسمعني
بقيت اتكلب وما نمت
صار هدوء
رفعت راسي اباوع ع الساعة بــ 12 الا ربع
كمت اغسل وجهي واحس روحي اختنكت
طلعت رحت للحمام فتحت المي البارد صحيح الجو جان بارد بس غسلت اريد الخنكة تروح ماكو
كمت اتنفس عالسريع كعدت ع الصبة بالحمام
بقيت تقريبا ربع ساعة يلا شوي كدرت امشي واتنفس طبيعي
كمت فتحت الباب صار بوجهي ياسر
يابة غير كمزني كمزة
خاف جنت مختنكة وبالكوة كمت لا هسه من الخوفة والهبطة اختنكت اكثر
حطيت ايدي ع صدري ورجعت ورا وكمت اتنفس سريع
باوع مستغرب حالتي
كال: شكو شبيج؟
اني ما كدرت ارد بسرعة عبرت من عندة ورجعت للغرفة وسديت الباب
بيبي حجت: منو
كتلها: اني بيبي
كعدت كالت شبيج وشبي وجهج اصفر
كتلها: راسي يوجعني
كالت شغلي الضوة وجيبي علاكت دواي بالجرار
شغلت الضوة ورحت جبت العلاكة وكعدت طلعتلي دوا وشربت ورجعت نمت بس جذب اذا تسمة نومة انام وارجع افز صوت ضحكهم من اغتصبوني لهسه باذني اريد يروح انسا ماكو كمت اقرا ايات وادعية قبل امي كالتلي عليهم ونمت ...يتبع💔💔