#البطل_المغمور2 "زهور القمر"
#جمان_فريد
#الجزء_الخامس_والثلاثين "احلام على ارض الواقع"
رمضانكم مبارك
عن سعد بن أبي وقاص رضي الله عنه قال : قال النبي صلى الله عليه وسلم : ( دعوة ذي النون إذ هو في بطن الحوت : "لا إله إلا أنت سبحانك إني كنت من الظالمين" فإنه لم يدع بها مسلم ربه في شيء قط إلا استجاب له ) رواه الترمذي وصححه الألباني
💐💐💐💐💐💐💐💐💐💐💐💐💐💐💐💐💐
الساعه التاسعه والنصف ليلا..
في شركة (KR) العقاريه..
كان مقعمز في مكتب يخدم ورا الاب توب متاعه...
ويراجع بعض ملفات المشاريع اللي تخص الشركه..
فجأه..وبدون مقدمات...
حس بشعور غريب ضايقه هلبه...خلاه مش قادر يركز ولاعنده رغبه يكمل خدمه...
رشيد بضيق؛لاإله إلا الله...
شبح حواليه...بعدين غمض عيونه وقعد يقرا في القرآن...
كان يبي يقرا اية الكرسي..
لقي لسانه يتحرك بسورة لقمان...
قعك يقرا فيها ويقرا ويقرا لين وصل للآية رقم 14
¤ووصينا الإنسان بوالديه حملته امه وهنا على وهن وفصاله في عامين أن اشكر لي ولوالديك إلي المصير○
وإن جاهداك على ان تشرك بي ماليس لك به علم فلاتطعهما وصاحبهما في الدنيا معروفا وأتبع سبيل من أناب إلي ثم إلي مرجعكم فأنبئكم بما كنتم تعملون¤
بعد كملت الاية 15 وقف...
وفهم...فهم الرساله اللي وصلاته...
ولاعجب رشيد من اهل الله وخاصته وقاعد بكل جهده يعمل باللي حفظه من كتاب الله المجيد...رسائل الله ليه توصله ويشوفها بوضوح...
سيب اللي في يده..
وخدي بس هاتفه ومشي طلع من المكتب بعد ماسكره بالمفتاح...
مشي بسرعه طلع من الشركه..
لحظات وجاته السيارة وقفت قدامه...
ركب من الخلف وقال:شارع المحله...
السواق تحرك بيه طول للمكان المقصود..
واول ماوصلوا عادي..نزل رشيد وخش للعمارة بروحه..
ركب الدروج يجري لين وصل في الشقه..
وقف قدام الباب وبدي يدق....
دق مرة...تنين...تلاته...مافيش استجابه..
قلبه حسه ان في شي صاير...
حط يده في جيبه وطلع ميداليه مفاتيح فيها مفتاح الفيلا والشقه هادي..
فتح بمفتاح الشقه الباب وخش...
وقعد ينادي:مرت بوي...بوي....بوي....
جاه صوت آنين خلا قلبه يفز...
مشي بسرعه لدار بوه...لقاها مفتوحه خشلها..
شاف بوه طايح والكرسي فوق..
انفجع...جي للكرسي وحوله وطبس ع بوه هو يقول؛بوي بوي تسمع فيا..
ومجيد يأن وخلاص...
رشيد ودموعه في عيونه؛اصبر شويه اصبر..
وطلع تليفونه من جيب الجاكيت واتصل بالإسعاف..
وحط يده ع ظهر بوه وهو يمسح عليه ويقول...ماتخافش مافي شي...اهو توا بنرفعك للمستشفى...الو...ايوه بالله ابعتوا سيارة اسعاف لشارع المحله في ****** العمارة رقم 6 بسرعه الله........وسكر وشبح لبوه...وهو يمسح ع ظهره ويقول...مافي شي..مافي شي...
جي بين عيون رشيد خوه مجاهد.
اللي كان غالبا اول مايروح من الخدمه زمان يخش يشوف بوه..ولو احتاج شي يقوم ع خدمته برغم انه مروح تاعب...
ومرات كان من عز نومه ينوض يخدمه لو احتاج حاجه..
حتى لما كانت تصير مشاكل بيناتهم ولامرة مجاهد سيب خدمة بوه...
صح...مجيد مش أهل انه يكون أب..ومادار شي لمجاهد يخليه يتفانى في خدمته...
بس مجاهد كان يخدم لله...ويدور في رضاه ويطبق في أمره..
"وصاحبهما في الدنيا معروفا"..
حتى وان تركوا حق الله... حتى وان كانوا كفرة او مشركين ...
🍁ربي يعينا ع هالنفس🍁
ورشيد كان يحاول يغلب نفسه...
كان يصارع فيها...وهو اللي تعلم مصارعتها من صغره...
🍁🍁
وجت سيارة الاسعاف ورفعت مجيد ومعاه رشيد للمستشفى ..
وغادي قالوا الدكاترة ان صارله هبوط ضغط من الخوف...
وكسر في وحده من ايديه لأنه طاح عليها..
وبشكل عام مافيش خطر عليه....
رشيد بعد مااطمن ع بوه بعت من يعرفله شن صاير مع عيلة مقبوله..
وبعد وقت قصير وصلاته المعلومات...
"اعتدوا ع خوها الشيخ عمران اللي قاعد في ****** بالضرب المبرح جابوه لطرابلس وهو توا في وحده من المستشفيات حالته خطيره"
رشيد وهو يتكلم بالتليفون؛تمام...وسكر...بعدين قال...اشبح شن دار في حد من ضحاياه الفاجر هدا...عليه من الله مايستحق...
تنهد بعدين شبح للسواق وقاله:تحرك...
🍁🍁🍁🍁
في شقته كانوا مقعمزين الزوز تقعميزة فضفضه بين الخوت..
خليل؛من جدك انت!؟ بتقعد عمرك هكي!؟
جهاد؛صدقني هكي احسنلي اني مانحسش في روحي ننفع ندير مراة وصغار مانقدرش ع حاجه هادي.
خليل:مش عارف علاش حاس ان في سبب تاني..
ابتسم جهاد وقال؛شن هو؟
خليل شبحله شويه وقال؛كنت تبي وحده زمان وتزوجت ولا..هادي اللي درتلها مشاكل مع راجلها وحتى ولد عمك خش في قصتها..
جهاد قعد ساكت ماباش يعلق..
خليل:خلاص كل شي ولى واضح..لكن ننصحك تنسى ودور بنية حلال وتتزوج مرات ربك يجعل فيها ويخليكم تحبوا بعض..
جهاد:مش قصة حب بس هي...قصة اني مهما حاولت نحط روحي جنب وحده نلقى روحي مانمشيش مع وحده غيرها..
مانركبش ع وحده غيرها..
خليل:المراة متزوجه خلاص حرام عليك تفكر فيها..!
ابتسم بتهكم وقال:تصدق...ترملت وقعدت عامين من غير زواج...
خليل بتعجب؛وباهي مدام تبيها لهالدرجه علاش ماخديتهاش!؟
جهاد بنظرة ألم مع ابتسامه؛ مستحيل..
خليل بإستغراب؛كيف مستحيل!؟
جهاد:خوي قاتل خوها..
بانت ع وجه خليل ملامح الصدمه وهو يشوف لخوه..
وجهاد تنهد بحسرة وع وجهه ابتسامة الم....
🍁🍁🍁🍁
"انت امتى تشعف قولي"
رشيد بهدوء:ارجوك يام من غير انفعال اهدي واسمعيني..
سدينه بحزم؛مانبي نسمع شي...لحوشي الراجل هداكا مش حيخش..
رشيد بقلة حيله؛ماتصعبيهاش عليا يام..
سدينه؛انت اللي تصعب فيها ع نفسك..ياريتك غير محصل منه حاجه ولا راي منه خير...
رشيد؛عارفه ماينفعش وعارف روحي مهما ندير مش حنحصل منه حاجه وعارف لااني وانتي ولاخواتي رينا منه خير لكن يقعد بوي يام...بوي...
هي شافت الاصرار في عيونه وفهمت انه مش حيخلي بوه هالمرة مهما صار..
رفعت حاجبها وقالت؛يقعد في الملحق..
هو قعد ساكت شويه بعدين بإستسلام قال؛حاضر زي ماتبي...
شبحتله بعدم رضا...بعدين مشت وخلاته...
هو غمض عيونه وتنهد بعدين فتحهم وقال:غير كيف تحملت يامجاهد كيف بس!..
🍁ليه من اسمه نصيب مجاهد..
عاش عمره كله وهو يجاهد..في نفسه..وفي مصاعب الحياة وشدائدها لين مات...
وخلا ندبة جرح عميق في كل القلوب اللي حباته..
ومنها قلب سارة اللي قاعده تشوف في صورته ودموعها داروا ع الخدود ع مجرى...
اللي صارلها معاه خلاها عايشة حالة خوف...
عقده من الفقد..
كل حد يكون وجوده في حياتها جميل تفقده...
وهي توا قاعده تصارع في مشاعرها وتبي تنهيها بأي طريقه خوفا من انها ترجع تعيش نفس الحاله مرة تانيه...
ردت الصورة للدرج...وناضت وهي تمسح في دموعها طلعت من دارها قاصده الكوجينه بش دير شراب البابونج تبي تسترخي وترقد..
لما خشت للكوجينه شافت للصاله لقت بوها مقعمز فيها ويشبح جهة الروش ويبان سرحان...
طلعت من الكوجينه ومشت للصاله..
وين خشتلها قالت:بابا..
هو استاقظ من سرحانه وشبحلها وقال؛سارة! شن منوضك لتوا؟!
سارة قعمزت وقالت؛أرق..قلت ندير فليه ونشربها بش نقدر نرقد..
هيثم قعد يشبحلها وهو يفكر في موضوع فاتح ومش عارف كيف بيفتحه معاها..
سارة؛انت شن مسهرك لتوا بابا..
هيثم رفع حواجبه وقال:موضوع صارلي فجأة...
سارة؛نقدر نعرف شن هو؟
هيثم مرر عيونه ع المكان بعدين شبحلها وقال؛تقدري وبالمرة ناخد استشاراتك بش قبلها لازم تعرفي ان الموضوع هدا لازم يقعد سر حتى بينك وبين نفسك ماتعاوديشي..
سارة؛تمام...قول بابا ان شاء الله خير..
هيثم تنهد وقال:إن شاء الله....هذا ياستي اني مروح اليوم من الخدمه واحد......
🍁🍁🍁🍁
"نفتح معاه الموضوع من غير ماترجعلي علاش"
فاتح وهو مبتسم بإستغراب؛ممكن لأنه موضوع يخصني اني بس!
نوال؛فاهمه انه موضوع يخصك بش مفروض خديت شوري..
فاتح؛شن اللي عندك تبي تقوليه ..
نوال تنهدت وقالت؛سارة ماتصلحش بيك..
فاتح؛مايصلحش بيا غيرها..
نوال:انت ماتصلحش بيها..
فاتح؛نعدل من روحي بش نصلح بيها..
نوال؛خايفتها تكسرك..
فاتح بإبتسامه؛ولدك توا مافي شي يكسره بكل مولي مرن ع الآخر مطاط...
نوال بضحكه؛ماعندي مانقول بعد هكي خلاص..ربي يسهل امرك..
فاتح؛ايوه هدا هو انتي ادعي وبس..
نوال بإبتسامه؛ربي يفرحني بيكم انت واسيد..
فاتح؛هداكا متزوج فلوسه...
نوال بضحكه؛صدقت هدا التعبير اللي ينطبق ع اسيد..ربي يهديه ويصلح حاله...
فاتح بإبتسامه:آمين...
🍁
واللي يحكوا عنه موجود في احدي مستشفيات بريطانيا في حجرة استشاري قلب معروف....
يتحاور معاه بلغة اهل البلد..
:حذرتك سابقا وهاأنا احذرك مجددا ياأسيد قلبك لم يعد يحتمل...انت ع وشك الدخول لرابطة مرضى القلب..
اسيد بضحكه؛انتم الأطباء هكذا تبالغون دائما كي تحكموا قبضتكم ع المريض..
ضحك وقاله:عموما...انصحك مرة بأخد فترة راحه...اشبه بالنقاهه واذهب وزر اي من القرى الجميله قليلة البشر كثيرة الخضرة والصفاء..
اسيد متهكم؛الاتملك نصيحة غيرها اكثر اغراءا...مثلا...تزوج...
الدكتور بضحكه:انا طبيب...وظيفتي هي علاجك لاقتلك...
ضحك بعدين قال؛صدقت...
ابتسم الدكتور وقال؛ولكنك تحتاج للحب فعلا تحتاج لما ينسيك عالم المال والاعمال الذي اهلكك..
اسيد بإبتسامه قال بمزح:حسنا موافق..ان كنت تعرف فتاه تستحق ان اعطيها قلبي عرفني بها..
الدكتور:حسنا..اعرف طبيبة جميلة بشوشة الوجه لطيفة جدا وجودها اضفى ع المشفى رونقا فريدا..هي منكم اقصد..ليبيه..
اسيد بتعجب ؛ليبيه..جميله بشوشة الوجه لطيفه..لابل وجدا !لابد انك مخطئ..
الدكتور بضحكه؛لالست مخطئا..عندما.تخرج من هنا حتما ستقابلها محجبه وترتدي دائما ملابس واسعه غامقة اللون..
ضيق اسيد عيونه وهو يفكر في المواصفات..
حس روحه شايفه وحده بهالمواصفات من قبل..
جت بين عيونه نفس البنت..
قال تلقائيا؛مريم.
:نعم مريم...تعرفها!؟
ابتسم ع جنب وقال؛أظن ذلك...
🍁شويه وطلع اسيد من عند الدكتور..
وقعد يمشي في المستشفى وهو يدور عليها..
لين شافها صدفه...
مع طفله صغيرة تبان مريضة سرطان مقعمزة ع كرسي متحرك..
تهدرز عليها والبنيه تضحك..
ركز عليها..
جميله....
بشوشه الابتسامه وكأنها من ملامح وجهها..
ولطيفه جدا وواضح هالشي من اسلوب تعاملها مع المريضه..
شويه وجت دكتورة انجليزيه خدت البنيه ومشت بيها..ومريم تودع فيها بكلام حلو...
بعدين لفت بتمشي..
تفاجئت ع الآخر وين شافتها..
هو ابتسم وقدملها وقال؛مساء الخير.
مريم؛تفضل بشن نقدر نخدمك..
هو بإبتسامه:ماعرفتنيش..
مريم؛لاعرفتك ولد استاذه نوال تفضل كيف نقدر نخدمك..
اسيد؛لاشكرا مانبي منك شي..بس انتي لو ان احتجتي حاجه او صارت معاك اني موجود انتي غير قولي نعرف اسيد الشيباني بس...
مريم بجديه؛شكرا ..
اسيد؛مافيهاش شكر انتي بنت بلادي وفي الغربه ماليناش الا بعض..
مريم هزت راسها وهي ساكته..
وهو قال:فرصه سعيده..سلام...
ولف ومشي وهي تشوفله بعدين تنهدت وقالت؛يارب ابعد عني المشاكل ووجع القلب ماصدقت نسيتهم يارب...
🍁🍁🍁🍁
"للأسف الطفل عنده قصور حاد في وظائف الكليه وممكن يؤدي للفشل"
دنيا ببكي؛ياحليلي ولدي ياحليلي..
ضرار بضيق؛اسكتي..وشن الحل يادكتور؟!
الدكتور؛ولدك محتاج لمتبرع بأسرع وقت...
دنيا:اني نعطيه دكتور اني...
الدكتور:لازم تجيبوا اكثر من متبرع مع العينات ماتطابقش معاه...
دنيا؛اني وبوه...
ضرار؛خل نشوفوك انتي قبل...
دنيا قعدت تشبحله...
والدكتور قال؛تفاهموا مع بعض وشوفوا غيركم ضروري جدا في اسرع وقت..
ومشي وخلاهم..
دنيا ببكي؛قداش ليا نقولك قداش ليا الولد يشكي من جنبه الولد مش مزبوط الولد مريض وانت ولامعدل تقول مش ولدك..
ضرار بغضب؛فمك سكريه بكل مانبيش نسمع حسك...
هي شبحتله بحقد..بعدين مشت بعدت عنه وقعدت تبكي...
وهو قعد واقف يفكر شن بيدير وكيف يتصرف...
🍀🍀🍀🍀🍀
وتمر الايام...
ومجيد جي للفيلا وقعد في الملحق وقعد معاه رشيد اللي دارله ممرض يقوم ع خدمته لما يكون موجود...
والخدمات غادي خمسة نجوم ونسي مقبوله ومايجي منها..
مقبوله اللي قاعده عايشه حالة من الصدمه والعار بعد ماعرفوا اللي داره خوهم وتسببله في اللي هو فيه حاليا..
اعتدائه ع طفل مايفوتش عمره الست سنوات وتسببله في مشكله صحيه...والولد خبر عنه واهله دارو لازم..
وهو توا في حالة حرجه جدا حتى الأطباء فقدوا منه الأمل..
مرته طلبت الطلاق فورا وصغارها قعدوا معاها..
ومش هكي وبس...زوز من خواتها اطلقوا بعد هالفضيحه...
واللي كان ناوي ياخد دانيه معيشته مع مرته كانت سودا
وديما مشاكل ماتخلصش بسببها كانت كل ماتحمل تجهض..
بعد هالفضيحه لقت سبب قوي لطلب الطلاق وروحت لحوش اهلها...
هالفضيحه كانت زي كرة البولينغ طيحت كل شي جي في طريقها...
وهدا كله بوهم مكانش حاس بشي ولايندري ع شي..
وصل لمرحله من الكبر في السن خلاته يفقد ادراكه لأي شي يصير حواليه...
•••مجيد؛خلاص بنطلقها ماعندي ماندير بيها..
رشيد؛زيد فكر يابوي مايجيش تسيبها في ظرف زي هدا مهما كان راهي قعدت سنين تخدم فيك...
مجيد بتهكم؛مسكين ماتعرف شي...هادي تاخد مني في حق خدمتها تحسابها تخدم فيا بلاش لوجه الله..
رشيد بصدمه؛لهالدرجه!
مجيد:واحرف من هكي ياولدي ....
🍁وطلق مجيد مقبوله..وانطوت صفحتها....
ورجع قعد ع قلوب سدينه وصغارها....
☘من جهة تانيه...
دارت دنيا التحاليل اللازمه تتبرع لولدها لكن النتيجه طلعت مش مطابقه وماتقدرش تتبرعله...
ترجت ماليها يساعدوها ويتبرعوا لولدها لكن مافي حد رضي يضحي لولدها..
اما ضرار فكان يدورله في.متبرع ورفض رفض قاطع انه يتبرعله...
••رضوان؛خيره هدا مايحسش معقوله مايبيش يعطي ولده.
خديجه بدموع؛ضرار وتعرفه يارضوان همه رويحته بس..
رضوان قام تليفونه وقال؛تو نكلمه..
خديجه؛شن بتقوله؟
رضوان؛نقوله اني نتبرعله الولد حالته خطيره يراجيه لين يموت معقوله..مش ولده ولاكيف..
واتصل بيه وهو فيسع مارد..
"ايوه رضوان روحت!؟"
رضوان؛ايه..اسمع وين ماانت تعالى نبيك ضروري.
"تم مسافة الطريق"
🍁🍁🍁🍁
"الحاله اللي زي هادي تبي تركيز ع اعراضها منها حتعرفي المرض"
دانيه؛فهمت..بس مرات الاعراض تتشابه دكتور..
الشايبي؛مزبوط لكن حتلقى عرض ولااتنين يميزوا المرض..
دانيه هزت راسها وهي تفكر...وتشوف للمريض اللي قدامها
وهو يشوفلها هي....
بعدين ابتسم وقال...
نحبك"
فتحت عيونها ع وسعهم لما سمعت الكلمه اللي جتها ع غفله من الصدمه..
الشايبي:وبدون مقدمات...ونبيك مرتي وحتى هو من غير مقدمات
ومانبيكش تحطي اعذار بش ترفضي ولاتقولي نفكر لأني بصراحه معاش عندي وقت بش نراجيك تفكري غدوة عيد ميلادي تعرفي كم يولي عمري غدوة....
هي قعدت تشبحله بنفس نظرات الصدمه وكأنها طلعت خارج التغطيه...
الشايبي صفق بصوابعه وقال؛هييه...الو..
هي استاقظت وملامح وجهها تبدلت للحده وقالت؛لا ومانبيش نعرف وياريت تقعد علاقتنا علاقه طالبة ودكتور ومعاش تتجاوز حدودك...ماتجبرنيش ناخد ضدك اجراء...
ولفت ومشت طلعت وهي ترعش من داخلها..
ولما بعدت عن الحجره قالت في نفسها...
"حي عليا شن قلت نهاري..كان مايسقطني ياهمي.."
وقفت والتفتت شبحت للحجره اللي ولت بعيده عنها..
لقاته واقف قدامها يشوفلها بإبتسامه واشرلها بحاجه في يده..
السماعه متاعها..
هي غمضت عيونها وقالت:حيي ع الغباء..
فتحت عيونها ومشتله بسرعه...
لين وصلت فيه..مدلها السماعه وقال؛لازم يكون تركيزك عالي وعقلك حاضر في كل وقت..
خدت.السماعه وهي منحرجه..
الشايبي: احمدي ربي اللي طحتي في دكتور قلبه طيب بس.
دانيه في نفسها"قلبه طيب!" وابتسمت تهكما..
الشايبي بضحكه؛والله طيب لين مفسد..ايه ع سيرة طيب اسمعي هادي...قالك مرة في واحد طيب طيب طيب طيب طيب طيب..
لين تم عليه الغاز..
دانيه غلبتها ضحكتها لفت ومشت وهي تضحك اول مرة تسمعه يقول نكته واسلوبه كان مضحك..
ولقت سبب جديد بش تحبه اكثر من قبل..
تحبه بس خايفه من فكرة الارتباط بيه وماضيه مبهم بالنسبه ليها...
كل اللي تعرفه انه كان يحب وحده بس شن اللي خلاهم يتفارقوا سببه مجهول بالنسبه ليها وهدا اللي مخليها خايفه...
🍁🍁🍁🍁
"هاه شن رايك"
نسيبه بإبتسامة اعجاب؛الله يبارك طالعه عليك من عند غادي..
خليل؛قصدك خلاص نعتمد..
نسيبه؛ايه هي هادي..
خليل؛اللهم لك الحمد والشكر..
نسيبه بضحكه؛برا بدل برا..
هو ضحك وحرك راسه يمين ويسار بعدين خش لحجرة القياس بش يبدل..
وهي تمرر في نظرها ع المحل..
🍁وفي حوش خوها..
"واااو"
جنان؛قولي ماشاء الله..
ريحان بضحكه؛ماشاء الله زيزو تجنن..
زياد بإبتسامه:اكيد..!؟
سارة بإبتسامه؛الله يبارك عليك زيزو كل شي يطلع عليك.
جنان بإبتسامه؛يارب نشوفك عريس..
خواتها؛آمين.
هو ابتسم بإحراج ولف ومشي لداره وخواته يضحكوا عليه...
🍁🍁🍁🍁
وبعد عدى هاليوم...
جي اليوم المرتقب....حفل التخرج.....
قبل ليخشوا للمسرح...
نسيبه وهي تساوي في طاقية خليل؛هكي تمام...بعدت خطوت وقالت..الله يبارك عليك خليلو كاريزما حبيبي ياناس..
خليل عض ع شاربه وهو يضحك..
هي قدمتله وقالت؛مايسمع فيا حد..
خليل بضحكه؛مامخليني ميت فيك هكي غير هبالك..
ضحكت وهي ترمش في عيونها بخجل مصطنع..
🍁من بعيد شويه..
كان زياد واقف ع فاتح يهدرز هو وياه..
وعيون سارة وتهاني معاهم...
تهاني:خوك شايف روحه هلبه ..
سارة بضحكه:هو هكي اصلا مش شايف روحه...
تهاني؛لا هو هكي اصلا شايف روحه..صاحبه مشهور والعيون عليه مادارش ديره..
سارة قعدت تشبحله وهي ساكته ماعلقتش..
التفت زياد شبح لتهاني..وفاتح شاف معاه بس لساره..
وسارة وتهاني مع بعض هربوا بعيونهم عنهم وداروا رواحهم لاهيين في حاجه تانيه..
وكل من زياد وفاتح ارتسمت ع وجهه ابتسامه جانبيه..
شويه وجي واحد من اعضاء هيئة التدريس قال؛ياريت الخريجين يوقفوا صفين جنب بعض..
والخريجين وقفوا جنب بعض صفين..
هو زاد تأكد منهم بعدين قال؛تعالوا وراي...
ومشوا وراه...
خليل وزياد وهما ماشيين...
خطرت عليهم ايام السجن كانوا وين مايطلعوا للساحه ساعة التنفس يطلعوا صفوف مع بعض...وقدامهم حارس من حراس السجن...
ووراهم واحد...
بس توا الوضع غير وشتان شتان..بين الأمس واليوم..
شبحوا لبعض شويه..بعدين ابتسموا لما تأكدوا ان كل واحد فيهم خطرت عليه نفس الذكرى.....
🍁في هالوقت المسرح تعبا بالحضور من اهالي الخريجين..
مع زياد جوا سارة وخواته وهيثم بيلحق بعدين...
ومع خليل جوا اخته وامه ومرته وولده...
الى جانب فاتح صديقهم المشترك....
كانوا يجهزوا للبدء بالاحتفال بمجموعه من الفاعليات.كانت تشبه الروتين المعروف لحفلات التخرج..
لحظات وخشوا الخربجين...وقعمزوا في كراسيهم..
عفاف وهي تشوف لولدها كانت فرحانه لدرجه لاتوصف مش مصدقه انها حضرت يوم زي هدا لولدها الكبير وهي كانت متخيله انها مش حتشوف يوم زي هدا الا مع بنتها الصغيره...
من قلبها وفي قلبها حمدت الله اللي برحمته استجاب دعائها اللي كان بحسابات البشر مستحيل لكن ع الله كل مستحيل هين....
☘☘
الحفل كانت تغطي فيه قنوات تلفزيونيه...
كاميراتها في التصوير كانت مركزة ع زياد وخليل لأن قصتهم كانت معروفه والطالبين الوحيدين فهالدفعه اللي بدوا قرايه في السجن...
شويه وبدوا بتكريم الخريجين...
وبدوا بتخصص التقنية الطبيه هو الأول..
وهما يسموا سارة كانت تلتفت للباب وتشوف كان بوها جي..
بس للأسف تأخر..هي عارفه انه مشغول بس عطي خوها وعد انه يكون موجود...معقوله في يوم زي هدا يغيب!؟
امازياد مادوراش عاذره لو ماجاش لانه يعرف بحجم المسؤوليه اللي حاملها بوه....
🍁فاتح كان يصور في الحفل بث مباشر..
وسارة قعدت تشبحله وتشوف في البنات كيف يشبحوله ومشاعرمزعجه هلبه قاعده تتجمع في صدرها...
🍁برا...
هيثم درس سيارته قدام الكليه ونزل منها..
ومشي بسرعه خش داخل..
وتوجه للمسرح ...
وصل فيه...دخلوه اللي واقفين في الباب ع طول...
هو خش...وهما بدوا يسموا في اسماء الخريجين من كلية الطب البشري...
وصل للصف اللي فيه الكرسي متاعه كان جنب واحد من اولياء الامور..
جنان؛بابا جي..
شبحوله ريحان وسارة بإبتسامه...
وهو كان مركز ع الدكتورة اللي تسمي في الأسماء....
"الخريج زياد هيثم عبدالحكيم الكاتب"..
ابتسم زياد وناض ومشي بش يركب ع الستيج..
وبوه يشوفله بفخر...وخواته فرحانات بيه....
وفاتح يصور وهو يقول؛اسد...
نسيبه بدموع؛الحمد لله جي هاليوم وريناه الحمد لله..
عفاف؛ايه والله الحمد لله...
خدي زياد شهادة التكريم...
والدكتورة تقول؛زياد بدي قرايته من السجن وكلنا عارفين السبب اللي خش ع خاطره السجن وكلنا نتشرفوا اللي واحد زي زياد يكون ابن هذه الكليه..
الحضور كلهم صفقوا...
وزياد مرر نظره عليهم وهو مبتسم جو عيونه ع بوه..
هيثم قعد يصفق بحرارة وهو مبتسم بفخر..
هاللحظه خلت زياد معاش يشوف حد من الحاضرين غير بوه...
بوه اللي كان بالنسبه كل شيء..
بوه اللي من بعد فضل الله بفضله هو وقف في هالمكان..
زياد مش قادر يذكر الايام اللي كانت فيهم علاقته ببوه
سيئة كلها جفاء وبعد...
وكأن هديكا الأيام مش محسوبه من عمره...
معاش قادر يشوف بوه الا كما هو عليه الآن الصديق المقرب والاخ العضيد مش بس أب..
وقفوا تصفيق....وزياد مشي نزل من المسرح لبوه مباشرة..
وصل فيه شد يده وباسها وكب ع راسه..
هيثم؛ربي يحفظك ويفتح عليك..ربي يحفظك..
زياد:ويطول في عمرك....
ومازالت نائبة العميد تسمي في اسماء الخريجين...
لين وصلت للعشرة الأوائل ع الكليه...
طبعا خليل كان عارف انه منهم والعيلة كذلك...
وبدوا يسموا فيهم من العاشر...
وفي كل مرة كانوا يراجو يسمعوا اسمه..
ويعدي العاشر...والثامن ...والسابع...والسادس...
خليل بدي يندهش يعني هو الخمسه!؟
والعيله كذلك بين المندهش والمستغرب..ماعدا شخص واحد..
زياد...
بعد ماسموا الخامس والرابع...والثالث والثاني...
الدكتور قبل لتسمي الاول قالت:طبعا حني اليوم قدام سابقه ماصارتش في بلادنا من قبل..قدام قصة طموح واصرار يقف الجميع امامها احتراما...قدام قصة تحول مذهله بكل ماتعنيه الكلمه من معنى..قصة حتكون ملهمه لهلبه ناس...اني صدقا وبكل صراحة وتجرد جدا متأثرة وسعيده وفخورة بصاحب هالقصه..وفرحانه انه ولد كليتنا هادي....
فجأة اشتغلت مقدمه هادئه لأغنيه خليل يعشقها وكانت بالنسبه ليه محفز كبير وين يسمعها ويرددها يشوف في اليوم هدا بين عيونه...
الدكتورة:الحاصل ع الترتيب الاول الخريج الملهم...خليل خالد جمعه...
خدي نفس عميق وناض...
ومشي طلع من كرسيه وسط اشتعال القاعه بالتصفيق للحار...
نسيبه كانت بعيونها اللي ينهمروا منهم الدموع...
كانت فخورة وفرحانه وقلبها فايض حبا لزوجها الرائع مصدر اعتزازها.....
واخته كانت تبكي بصمت وهي مش مصدقه اللي تسمع فيه وتشوف فيه كأنه حلم...
صحابه كانوا فرحانين بيه...
والزوز كانوا يصوروا فيه وهما يرددوا في كلمات اغنية حمزة نمرة...احلم معايا...
اللي كان خليل وهو ماشي للستيج يسمع فيها...
ويمر قدام عيونه شريط حياته كامل...
كيف انزرع فيه هالحلم وكبر معاه...
كيف انجبر انه يتخلى عنه وينساه..
كيف كان غايص في عالم تجارة المخدرات وبدل مايكون دواء للناس يكون هو الداء..
كيف انتشله الله من الوحل وغير حياته وجابه لطريق التوبه المحفوف بالإختبارات اللي كان هو قدها وتخطاها كلها..
لما خش السجن..وتعاون مع الشرطه وساهم في نهايه منظمه شر كبيرة عمرها عقود....
وكيف كمل سنين طويله في الحبس وهو صابر..
ويعافر ويجاهد بش يوصل لهاللحظه..
الطريق طويله صح.. الصبر كان كبيرة..
بس النهايه كانت حلوة حلوة بالمرة..
سلم ع الدكاترة وجي لنائبة العميد اللي قعدت تشكر فيه استلم منها الشهاده...بعدين عطاته مجسم زي الدرع تسلم فيه كلية الطب للحاصل ع الترتيب الأول...
خداه ومرر نظره قدامه ع الموجودين..ورفع المجسم...
ومن حقه يفتخر بنفسه ويحس بنشوة الانتصار في معركة الحياة....
كل الحضور وقفوله احتراما وهما يصفقوا...
نسيبه وقفت رفعت ولدها بش يشوف بوه ودموعها مابطلوش نزول...
الولد كان يصفق بحرارة..
كلهم كانوا يصفقوا بحرارة...
اخته...صحابه...سارة وخواتها...
وهيثم اللي كان يشوف فيه خوه الصغير وكان فخور بيه جدا...
هو نزل المجسم ومشي حطه هو والشهاده ع الطاوله..
ومشي لتركينه وسجد لله سجود شكر..
وهو اللي وصله اليوم كان بفضل مني غير الله..
اللي غمره حب وتوفيق وفتح عليه فتح عظيم لما علم انه صادق في توبته...
طبعا يحبه.. واللي يحبه ربي تلقاه منصور حتى لوكان مرمي في النار...
ناض خليل من السجود...
والدكتور ناداته وطلبت منه يقول كلمه..
هو وافق ومشي وقف ورا الطاوله اللي عليها المايك...
مرر نظره ع الحضور وكيف جي بيتكلم...
لما حل الهدوء في المكان والناس قعمزت...
عيونه جو ع أمه....
عفاف كانت طول هالوقت غامه وجهها بإيديها وتبكي...
صوت عبراتها بدي واضح بعد هدت القاعه..
كل الموجودين قعدوا يشبحولها..
ونسيبه حاطه يدها ع ظهرها وتمسح عليه بش تهديها ودموعها هي مابوش يوقفوا..
خليل:لحظه...
ومشي نزل من الستيج ومشي لأمه طول..
وصل فيها قعمز ع رووس صوابعه حداه وقال:يام...
وهي تبكي...
هو شد روحه بقوة وخدي ايديها وباسهم...
وهي تشوفله...قربت منه وباست راسه...
ورجع صدح التصفيق وسط القاعه...
حتى الدكاترة اللي واقفين ع المسرح كانوا يصفقوا..
سارة تأثرت بالموقف وقعدت تبكي هلبه..
وفاتح يسمع في صوت بكاها وقلبه يتقطع مش قادر يشبحلها حتى الشبح بعد الوعد اللي عطاه لبوها..
اما زياد فكان منجسم مع اللوحه الفنيه اللي يعشق تأملها..
تهاني وهي تبكي...
بعدت عفاف عن ولدها وقالت؛سامحني وليدي والله من فرحتي بيك...
خليل:عارف والله عارف بس اني معاش نبي نشوفك تبكي..
مسحت دموعها وقالت...حاضر..وابتسمت هي تقول..برا كمل هي خل نملي عيوني واني نتفرج عليك..
ابتسم ووقف ع حيله باس راسها بعدين شبح لنسيبه غمزلها..
وهي ضحكت من بين دموعها ..وشاف لخالد بعتله بوسه..
وخالد ردها...
ضحك..بعدين مشي رجع للمسرح..
ووقف ورا المايك وقال:اول شي الحمد لله الذي بنعمته تتم الصالحات..والصلاة والسلام ع اشرف الأنبياء والمرسلين...
بعدين...مش حنطول في الكلام وحنختصر...اللي مع ربي ربي يكون ديما معاه...واللي ربي يكون معاه يوصل لمواصيل هو نفسه ماكانش يحلم بيها...
صفقوا شويه بعدين هو كمل يقول...
خليل:طبعا في ناس وقفت معاي ودعمتني وكانت سبب في اللي في وقفتي هني اليوم..اولهم امي الله يحفظها بدعائها..بعدين زوجتي..بنت الأصل القدعه اللي كانت وراي ومعاي وقفت ضد كل شي ع خاطري لأنها صدقتني وآمنت بيا وكانت متأكده اني حنوصل هني..
نسيبه انحرجت وهي تضحك..وخوها وصغاره يشبحولها بإبتسامه...
والموجودين يصفقوا....
خليل:وعيلتي كامله...خوتي واختي...وحتى ولدي خالد..
نسيبه باست ولدها...
وحناه قرصت خده...
خليل:وصحابي صحاب الشده اللي عشنا مع بعض اصعب الظروف وكنا فيها سند لبعض...
ابتسموا زياد وفاتح بحب. .
خليل:واخيرا راجل يعتبر هو صاحب الفضل عليا من بعد الله مش حنذكر اسمه لأنه محلفني وع العموم هو عارف روحه...نشكرك من قلبي يابطل قصة خليل..
العيله كلهم شبحوا لهيثم اللي كان يشبح لخليل بإبتسامه عادي وكأن الدوة مش عليه..
وخليل وهو يمرر في نظره ع الجميع بإبتسامه قال؛وفي النهايه نشكركم جميعا والسلام عليكم...
🍁🍁🍁🍁🍁
وفي باحة الكلية كان الاحتفال بطعم مختلف.
وهو جهاد يعدي يوم زي هدا من غير مايجيب النوبه ويفرح بخوه!؟..
زادت النوبه الاجواء جمال والشاب قلبوا معاها الدنيا..
••ريحان:كان جيت ولد راني في وسطهم توا..
جنان:استغفر الله معاش تقوليه كلام زي هدا..
ريحان بضحكه:استغفر الله...لكن والله جوهم يهبل ..
جنان شبحت جيهتهم وابتسمت وهي تقول؛والله حق..
بحداهم سارة وتهاني ونسيبه وعفاف ..
نسيبه؛حي عليا كان مايرفسوا ولدي..
ضحكت سارة..
عفاف بضحكه؛ولدك عند بوه ماعندك علاش تخافي..
ابتمست نسيبه..
سارة:خسارة خالتي ماجده فاتها الجو كله..
نسيبه:تروح اليومين الجايات ان شاء الله..
عفاف:شن حاله راجلها توا..
نسيبه:لا الحمد لله خير من قبل بهلبه..
عفاف:باهي الحمد لله...
ع جية التوأم ريحان قالت؛ملاحظين ان بابا مختفي..
سارة بضحكه:بابا هارب خاف يرقصوه ..
قعدوا يضحكوا...
🌼وختم هالاحتفال الصورة التذكاريه اللي خدوها مع بعض...
وكانت اجملهم ...
صورة لنسيبه وخليل وفي وسطهم خالد لابس طاقية التخرج وشاد بإيديه الزوز الدرع متاع بوه...
🍁🍁🍁🍁🍁
الساعه التاسعه ليلا..
مقعمزين في الصاله يتفرجوا ع التلفزيون ويهدرزوا..
هيثم:الاجراءات تمت خلاص يقدر يبدا التخصص من الاسبوع الجاي في المستشفى..
زياد:تمام...
ريحان وهي تتفرج ع التلفزيون:شوفوا خبر عاجل..
شبحوا كلهم للتلفزيون ....
نفسه الخبر كانت تابع فيه نوال مع فاتح ...
ومش هما بس ليبيا كلها..
تعودوا كيف هالوقت من السنه يشوفوا الخبر هدا..
وهو اختيار رئيس الحكومه الجديده مع تشكيلته الوزاريه...
الخبر كانت تقرا فيه ريحان...
ريحان:صنع الله المقرحي رئيسا للحكومه...
ابتسم هيثم وسارة تشوفله وهي متبسمه..
زياد:شكله من الجنوب..
هيثم:من الجنوب فعلا...
شبح زياد لبوه وقاله:تعرفه؟
هيثم هز راسه بإيجاب..
وبدوا يعرضوا في باقي التشكيله اللي بدت بالنائب متاع رئيس الحكومه...
ومن حقيبة وزارة الخارجيه...اللي لما شافوا سارة وهيثم نن استلمها انصدموا الزوز...
نوال فتحي الأسطى..
••فاتح بصدمه:تشابه اسماء هدا!؟
نوال بضحكه:لا..
قعد يشبحلها فاتح وهو مش مستوعب وقال:جديات!؟
نوال بإبتسامه:وجد الجد...
فاتح ضحك وقال:والله صحة ليك صحة ليك...درتيها امي ووصلتي للي تبيه..
نوال وهي مبتسمه:قول فوق ماكنت نبي..
فجأة رن تليفونها قاماته وشافت المتصل قالت بضحكه:نرجس
••••••••••••
زياد:والله صحة ليها خالتي نوال..
وسارة تشبح لبوها اللي قاعد مصدوم...
غيرت عيونها عنه وخطر عليها ولد نوال...بعديت قامتهم وشافت للوحة امها وقلبها موجوع....
فجأة...
جنان؛حي بابا انت وزير الصحه الجديد..
استاقظ هيثم وشبح للخبر بعدين ضحك..
زياد بضحكه دهشه:من ورانا يابروف ...وجي لبوه وباس راسه وقال..ربي يعينك ..
هيثم:آمين
وجنان وريحان جوهم وحضنوه الزوز وهما يقولوا..
:مبارك بابا..مبارك بابتي..
سارة:ادعوله ربي يعينه..
جنان:ربي يساعدك وتكمل المرة هادي يارب ماما كانت تقول هدا حلم بابا زمان..
ريحان:ايه بابا معاش تسيبه بكل كمل فيه لين تحققه كله..
سارة وزياد ابتسموا..
هيثم ضمهم وهو يقول:ان شاء الله يابابا ان شاء الله...
🍁🍁🍁🍁🍁
"بنمشي نشوف نتيجة التحليل"
دنيا؛ارفعني معاك..
ضرار:لا..
دنيا:علاش تمشي بروحك ولدي راهو..
ضرار:عارفه ولدك ماجبتي شي جديد...وبعدين مش ماشي بروحي معاي رضوان..
هي بصدمه:رضوان!؟
هو فتح الباب وقال:رضوان واحد من اللي يبي يتبرعوله..
وطلع وسكر الباب..
وخلاها جامده في مكانها من الصدمه مش قادرة تتحرك...
بعدين بدت تخبط وهي تقول؛نهارك احرف يادنيا غبارك السودا يادنيا رحتي فيها يادنيا...
ومشت تجري لتليفونها خداته وهي ترعش بش تتصل بيه ع باله انه ماشي يدير في الفحص ماتحسابش ان الفحص اندار وهو توا ماشي يشوف النتيجه..
اتصلت بيه لقت رقمه مقفل...
قعدت تخبط ع وجهها وهي تقول:وووه عليك يادنيا يانهارك الأحرف يادنيا...!
🍁🍁🍁🍁🍁
رضوان:بنمشي نحط هاتفي في الشحن وجايك..
ضرار:تمام..
مشي رضوان...
وضرار واقف يستنى هو وزوز متبرعين حصلهم بالفلوس حيعطوا الكليه متاعهم بمقابل لو تطابقت الفحوصات...
وهما يستنوا..
في دكتورة اسمها حالة تخدم في معمل التحاليل ماتعرف شي عن الحاله بس عطوها نتايج التحاليل تخبر بيهم اهل المريض..
ومن ضمن التحاليل هادي كان تحليل الجين الوراثي..
قرتهم بعدين مشت وين مافي ضرار واللي معاه...
وقفت عليهم وقالت:في عينه مطابقه يقدر صاحبها يتبرع بكليته...عينة الأب..
عينة الاب!!!؟
اب مني!؟...
ضرار مايبيش يتبرع ومادارش فحص...
هو بعدم فهم قال:غالطه دكتورة اني بوه ومادرتش تحاليل..
الدكتورة:لحظه...حضرتك رضوان ***** ولا!؟
تسلسل البرد الشديد لأطرافه لين سيطر ع باقي جسده وخلاه جامد في مكانه...
المتبرعين يشبحوله..
والدكتورة تقول:حضرتك الاخ رضوان ولا هني الفحوصات تقول انك الوحيد اللي تقدر تتبرعله..
تحرك بخطوات ثقيله...
ولف بيمشي وخطواته يبدل فيهم بالسيف...
اللي عرفه ماخلاش يشك انهم غالطين...
لأنه ولا مرة حس اتجاه هالطفل بشعور ابوة كان ديما نافر منه ومش متقبله...
وهو يمشي بالسيف..
وقف لما سمع صوت خوه يقول..
"هاه شن صار طمني!؟"
هو قعد يشبحله...
وشريط يمر قدام عيونه فيه تصرفاته خوه مع مرته اللي كان يشوف فيها عاديه ولم يلقي لها بالا...
هني جي بين عيونه نظره عيون حاده مليانه دموع..
وصوت اشبه السيف وهو يخش لوذانه...
"ربي يردهالك في قعر دارك"
رضوان بإستغراب:ضرار خيرك!
فهاللحظه غمض ضرار عيونه وطاح من ع الأرض....
رضوان بصدمه:ضرار.!
وقعمز ع الارض وبدي ينوض فيه:ضرار...ضرار...
الدكتورة كانت تتفرج وهي ترعش..
واللي معاها مصدومين..
ع جية الشايبي شافاته هاله وقالت:دكتور بالله عليك دكتور الراجل...
الشايبي شاف ضرار طايح وخوه حداه يحاول ينوضه..
مشاله يجري وقعمز جنبه وحط يده مكان النبض..
ورضوان يقول؛خيره دكتور...
الشايبي حط ايديه ع بعض فوق صدر ضرار وقعد يديرله في إنعاش للقلب....
ورضوان يشوفله بخوف ودموعه بدوا يطيحوا...
والشايبي يحط في وذنه ع القلب ويشوف في النبض ويعاود ينعش في القلب...
لين لحقوا المسعفين وقعدوا يساعدوا في الشايبي..
لكن بدون فايده..
وخر الشايبي وشبح لرضوان وقال:مع الأسف توفى...
#احلام_على_ارض_الواقع
#البطل_المغمور2
...يتبع...
