لو عرفتموه♥

8💜

✅🌅 لو عرفتموه 🌅✅

🔅الحلقة الثامنة 8🔅

يلا صلو على النبى 🙂

ونكمل كلامنا بعد ما خلصت حادثه شق صدر رسول الله ﷺ كل ده حصل وكان مين واقف عمال يتفرج ؟ اخوه من الرضاعه.. فأول ما مشيوا صرخ جامد وقال يا أمى إلحقى .. قتل أخى.. قتل أخى القرشى..
بتقول حليمه فبسرعه جريت  ورايا زوجى.. فلما وصلنا وجدناه صلى الله عليه و سلم  واقف و وشه أصفر اوى ..وبدأ يحكيلها اللى حصل..  فجوزها راح قايلها : يا حليمه خديه و رجعيه لأهله قبل ما يحصله حاجه اكبر من كده .

بتقول حليمه شيلته ورجعت حزينه تانى ..  لحد ما وصلنا لمكه .... مش عايزه أسيبه..😓

وفعلا اخدت آمنه النبىﷺمن حليمه .. وبتقول حليمه رجعت لبنى سعد وفضلت أعيط و أقول يارب أجمعنى بيه يوم من الأيام يارب.. اصلها كانت بتحب محمد ﷺ أوى دلوقتى الرسول ﷺ  رجع بيته معاه أمه آمنه والداده بتاعته أم أيمن.. وكبر النبى ﷺلحد ما بقه عند 6 سنين..

امه قالتله يا محمد أنت كبرت تعال نروح نزور أخوالك فى يثرب "هتتسمى المدينه بعد كده" عشان تعرفهم.. وأخوال النبى ﷺ كانوا فى منطقه عند بنى النجار..وقالت يلا نزورهم و وأحنا راجعين نعدى كمان على قبر أبوك عبد الله ونزوره ♡..

وفعلا راحوا يزوروهم   وهما راجعين عدوا على قبر أبوه عبد الله بن عبد المطلب وقفوا عند القبر وتبكى آمنه ويبكى محمد عليه الصلاه والسلام .. والعلماء قالوا ان أعلى درجات اليتم هو انك تفقد ابوك من قبل حتى  ما تشوفه لانك عمرك ما شفت يعنى إيه أب وعمرك ما جربت تنطق الكلمه دى :')..
فكان الحبيب صلى الله عليه وسلم يتمه من أعلى درجات اليتم..

وفى طريق رجوعهم لمكه..فى نص الطريق عند منطقه اسمها الأبواء ..
تحصل حاجه شديده أوى وصعبه . أم النبى ﷺ تعبت..وبدأت تحس أنها مش قادره تتنفس والألم بيزيد..
وتبدأ تقع على الأرض.. ويبدأ النبى صلى الله عليه وسلم يخاف..مش عارف إيه اللى بيحصل لأمه.. آمنه تحتضر.. وأم أيمن واقفه مش عارفه تعمل إيه.. وبعد دقايق وقف ألم آمنه  ..  آمنه ماتت ..

بقى يتيم الأب والأم .. ...😫

أتولدت يا رسول الله ومشفتش أبوك ومعرفتش معنى وإحساس كلمه أب .. وأمك تموت و عندك ست سنين.. هيفضل المنظر قدام عينيك؟! هتفضل فاكره طول عمرك؟!.. أى طفل لو مر بظروف زى دى ممكن يطلع طفل معقد.. حقود.. عايز ينتقم من الدنيا إلا  النبى صلى الله عليه و سلم إزداد حنان فوق حنانه وطيبه وعطف..وهنشوف ده طول ما أحنا بنحكى سيرته سوا مواقف كتيره مليانه رحمه وإنسانيه..

محمدﷺ دلوقتى مع أم أيمن يتيم الأب وكمان الأم.. مين هيهتم بيه بعد كده؟ مين هيبقى ولى أمره؟

هنعرف سوا بكره إن شاء الله 💗

#لو_عرفتموه
#حياتي_دعوة