لو عرفتموه♥

31💜

🌸✅ لو عرفتموه ✅🌸

🔅الحلقه 31.🔅
    
يلا صلوا على النبى 😊

و يحصل موقف تانى مع ابو جهل..
مره أبو جهل قال :يا محمد انت عايزينى أشهد لك عند ربك ان رسالتك وصلتنى؟.
يا محمد انا لو اعرف ان كلامك ده صدق كنت اسلمت بس انا عارف انك كذاب يا محمد..

وأول ما مشي النبى ﷺ  ،راح ابو جهل قايل لصاحبه اللى قاعد جنبه : والله اني اعرف ان محمد صادق ولكنا و بني هاشم فرسي رهان(زي فرسين بيتراهنوا) سقوا فسقينا،اطعموا فاطعمنا حتي قالوا منا نبي، فأني لنا بهذه ؟'
(يعنى  قبيله ابو جهل و قبيله بنى هاشم "قبيله النبى" بينهم و بين بعض منافسه و سباق كل ما بنى هاشم تعمل حاجه تقوم التانيه مقلداهم..فأبو جهل بيقول :طب دلوقتى طلع من عندهم نبى..هنقلدهم فيها ازاى دى! فالحل اننا نقول ان محمد كداب عشان متبقاش بنى هاشم سبقتنا و بقت أحسن مننا فى شئ)

كمان موقف  يورينا أن قريش بتحب القرأن ومصدقه النبى ﷺ وان مشكلتهم هيه  الكبر و العند ..

مره "الأخنس بن شُريق" و " أبو جهل بن هشام"، "أبو سُفيان بن حرب"  التلاتة دول  كل واحد فيهم خرج لوحده فى نفس اليوم بليل ..و كل واحد فيهم كان رايح للحرم .. طب ليه؟

عايزين يسمعوا النبى وهو بيصلى و يقرا قرآن .. أصل القرأن عاجبهم 🙂  فكان كل واحد فيهم رايح لوحده ومستخبى عشان محدش يشوفه ولا يحس بيه.. و يسمع النبى فى صلاه قيام الليل وأول ما الفجر يطلع كل واحد يجرى على بيته من غير ما التانى يحس بيه؟ 😊

لكن يشاء ربنا انه يخليهم  يقابلوا بعض 🙂 .. فيبصوا لبعض .. ايه ده ابو سُفيان انت بتعمل ايه ؟! و أنت يا أبو جهل بتعمل ايه ؟؟ أسلمت ؟ لأ  أومال جيت هنا ليه؟؟ بتمشى شويه و مش هكررها تانى 😊 ..يعدى يومين و يروحوا تانى !! ويتقابلوا تانى 🙂 ويتواعدوا انهم مش هييجوا يسمعوا القرأن أبدااا .. لكن برده كانوا بيرجعوا تانى(كانوا بيحبوا يسمعوا القرآن) 🙂

الوضع صعب وقريش بتعند .. وتمشى فى طرقات مكة تسمع صوت الصراخ و آهات الصحابة ..😢و فى وسط الضلمه دى يريد الله  جل جلاله أن شمسين ينوروا سماء الاسلام ، هديتين لرسول الله ﷺ .😀. إسلام حمزة و إسلام عُمر بن الخطاب  😊  نبدأ بحمزة ويبقى مسك الختام عُمر بن الخطاب ❤

《إسلام حمزة بن عبد المطلب》
حمزه هو عم رسول الله ♡..طيب حمزة فين ؟ حمزة من أول السيرة واحنا بنحكى مجبناش سيرته. حمزه موجود بس أصل حمزة ملوش دعوه خالص باللي بيحصل ده، حمزة مش فارقة معاه قريش ولا النبى ﷺ ، حمزة كل اهتماماته ايه ؟ الصيد  .. هو بيحب يصطاد الغزلان، يشويهم ، و بليل يسهر مع صحابه .. حمزه فى دنيا تانية خالص.. بس لما ربنا يريد انه يهدى انسان ، بيهديه رغماً عن أنفه 🙂سبحان الله الهادي

حمزة بقى مرة كان بيصطاد ويشاء ربنا أن فى نفس الوقت ده النبى عليه الصلاه و السلام يكون عند  الكعبة ويجيله أبو جهل ويبدأ يضايق النبى ﷺ فيسبه ويشتمه بافظع الألفاظ والنبي ساكت فيتغاظ ويقوم يقذف النبي بحجر فيسيل الدم الشريف على وجهه..فمين شاف المنظر ده؟ بنت جارية  فتنفعل وبقت عايزة تدافع عن النبى بس مش عارفة ... فتعمل إيه؟؟ راحت طالعه تجرى فى طرقات مكة تدور على حد يساعد النبى ﷺ ..و يشاء  الله أن مين اللى تلاقيه فى طريقها؟ حمزة ♡ ..فحمزة كان مروح وكانت كُنيته" أبو عمارة" .. فالجاريه قالت له: يا أبا عمارة.. يا أبا عمارة ،فيقولها:مالك..ويحكِ؟..

: يا أبا عمارة أيُضرب ابن أخيك ويسبه أبو جهل ويؤذيه وأنت تصطاد !! (رغم ان حمزه مالهوش فى الدوشه دى..بس ده برضه حمزة ، عنده رجولة ما يستحملش ان يعرف ان حد يأذى قريبه و يسكت) فقال ويحكِ ما تقولين ؟

قالت: أجل، آذاه أبو الحكم (ابو جهل) وشتمه و سبه سبآ شديداً و جرح رأسه وأنت هنا تصطاد.. أما تستحى !!..فحمزة متغاظ .. ابن اخوه بيتأذى..
هيعمل إيه حمزه ؟ حيروح وللا حيكمل صيد؟

هنعرف الحلقةالقادمة إن شاء الله ❤

🌏🌏🌏🌏🌏🌏🌏🌏🌏🌏
#لو_عرفتموه