لو عرفتموه♥

10💜

✅🌅  لو عرفتموه..  🌅✅

🔅الحلقة 10🔅

يلا بينا صلو على النبى 🙂

✍️ووقفنا سوا المره اللى فاتت مع قوافل التجاره اللى فيها النبى صلى  الله عليه و سلم و الناس فيها  مستغربين جدا أن لأول مره بَحيرَة الراهب يطلع من الدير و يكلمهم! 😳

😮أصل بَحيرَة شاف من الشباك مجموعه ناس جايين من بعيد  (القافله اللى فيها محمد رسول الله صلى الله عليه وسلم) فلقى الناس دي فوقيهم سحابه بتظلل عليهم ! و مكنش الجو اصلا يسمح ان يبقى فيه سحاب ..و مفيش و لا سحابه غيرها فى السما..

😮فبَحيرَة أتخض أوى  وطلع من الدير يجري بسرعه عليهم.. فدخل في القافلة بتاعه أبو طالب وقعد يبص فى  الناس لحد ما وصل للنبي صلى الله عليه و سلم .. محمدﷺ طفل عمره 12 سنه ..
وفجأه  بَحيرَة مسك إيد محمد ﷺ ورفعها لفوق و قال هذا نبي أخر الزماااان ،
هذا رسول رب العاااالمين ، هذا سيد العاااالمين يبعثه الله رحمة للعالمين  :

بَحيرَة منفعل و بيعمل ده قدام الناس و صوته عالى أوى .. وكله مستغرب بَحيرَة.

👈أبو طالب عم محمد ﷺ بص لبَحيرَه وهو مش مصدق اللى بيسمعه وقال : إيه اللى أنت بتقوله ده ؟! فرد الراهب : والله من لحظه ما شفتكم جايين وأنا واقف فى شباك الدير .. و مفيش و لا شجره و حجره إلا سجدت وراه ..ودول مستحيل يسجدوا إلا لنبى..

طبعا محمد ﷺ انهارده اول مرة يسمع كلمة نبى 🙂 ..
فالناس مش مصدقة الراهب ..ففضل الراهب يكرر الكلام ويقول لهم صدقووونى صدقوووونى..لكن محدش صدقه.. فبَحيرَه بدأ يفكر و يخطط أنه يحاول يعطلهم شوية عشان يحاول يعرف أى حاجه عن محمد نبى الله و رسوله.. فقالهم : أنا عازمكوا على أكل ولازم تقعدوا ..

فأبو طالب وهوه مستغرب  قال له : أنت عمرك ما كنت كده ولا عمرك فكرت تعزمنا ؟
فقاله : بس النهارده  أنا عازمكو و لازم تقعدوا .. المهم قعدوا يستنوا الاكل و قعدوا تحت ظل شجره و بَحيرَه بسرعه دخل يجهز الاكل .. فأبو طالب ركب محمد الجمل وقاله : خليك هنا لوحدك ..مش ينفع تقعد معانا ..

فخرج بَحيرَه بيبص.. مش لاقي النبي ﷺ وبعدين لقى النبي ﷺ بعيييد .. فبذكاء فكر يحرج أبو طالب وقاله : يا أبو طالب أنده إبنك ياكل معنا..
فجه النبي من بعيد و بحيرة مركز معاه فلقى حاجه غريبه أوى  .. لقى محمد رسول الله يمشي و فوق راسه سحابه بتظلل عليه 😳 .

والنبي رايح يقعد مع قومه تحت ظل الشجرة  عشان ياكل..  لقى مفيش  مكان 😞
فالنبى أضطر يقعد فى الحته اللى فيها شمس لوحده فحصل شئ عجيب أوي أوي ..
ظل الشجره مال عليه :') ♡..
فصرخ بحيرة وقالهم : انظروا أيها الناس أما تعقلون! ، انظروا إلى ظل الشجرة قد مال عليه
فسأل بَحيرَه : أين والد هذا الولد ؟
فقال أبو طالب : أنا ..فقال :  من أنت؟
قال : أنا أبوه ..قال بَحيرَه : لا لست ابيه .. فقال أبو طالب : أنا عمه
فقال: الآن صدقت...وبعدين بحيرة قال: أين أبوه؟ ..
فقال ابو طالب: بمكة ( ابو طالب مش عايز يقوله أن ابوه ميت)
فبحيرَة قاله: ما ينبغى لأبوه أن يكون حيآ..فسكت أبو طالب وقال : ابوه مات.
فبحيره قال : الآن صدقت ..

👈فأبو طالب قاله : ماذا تريد يا بَحيرَة ؟ فقال : يا أبا طالب صدقني هذا نبي آخر الزمان ، أين تذهب به ؟ قال : إلى الشام.. قال بَحيرَة : أقسمت عليك لا تذهب به إلى الشام فهُناك يهود أخاف إذا رأوه يقتلوه.
فقال ابو طالب : لمَاذا..؟
قال: يعرفونه في كتبهم.. (فعلا ربنا عزوجل أخبرنا عنهم فى القران وقال :
"الَّذِينَ آتَيْنَاهُمُ الْكِتَابَ يَعْرِفُونَهُ كَمَا يَعْرِفُونَ أَبْنَاءَهُمْ وَإِنَّ فَرِيقًا مِّنْهُمْ لَيَكْتُمُونَ الْحَقَّ وَهُمْ يَعْلَمُون *

👈فأبوطالب مش مصدق. فبحيرَة قاله : أقسمت عليك لا تذهب به.. لا تذهب.
طب يا ترى أبو طالب أقتنع؟ يا ترى أثر فيه كلام الراهب  بحيرة ؟

هنعرف سوا الحلقة القادمة ان شاء الله

#لو_عرفتموه