الـسـلامُ عـلـيكـم 🌻🌼
نوائب الدهر
الكاتبه_العباديه
مشهد آخر من القصه
alabadyia_09
مُتـسـع وعـنـيـد . .
وكُـل جَـرحٍ فـي جسدكَ جدول
تكـبـر الحـقـول على ضـفـتـيـهِ
وإنـنـي هُناكَ أحـرثهـا
لِـتـبـقى . . . .
وإن بـدا ذلك مؤلمـاً
لا أشــكـو ولا أنـدم
وأُوجِـع أوجـاعـي إن لزم الأمـر
كــي تـهـدأ انـتَ فـقـط .
~~~~~~~~~~~~~~~~~~~~~~~~~~~~~~~~
مشغله المكناسه الكهربائيه بوسط الصاله واسحب بالاوساخ وبقايا اللعب المتناثره الي يتركوها خلفهم مثل كل مره .. الصوت عالي ويسطر الراس واني اسحب وبالي يفكر بحياتي البائسه .. سارحه بخيالي وبس عيوني تتجهه للمكان الاريد انظفه مااسمع شي واحمد و غسق خليتهم بالغرفه وانطيتهم ألعاب يتلهون بيهه علما اكمل تنظيف الصاله لان يثبروني .
فززيت من صفنتي على نغزات إيدين ناعمه إنمدت على فخذي توعيني من صفنتي .. التفتت لكيتهه غسق وتبجي ! رأساً كلبي انكمش شبيهه تبجي بس لا صاير شي بإخوهه .. عيونهه حمر باكيه وانفهه مصبوغ وردي ونظرات عيونهه بريئه .
ركضت طفيت المكناسه وسمعت صوت صراخ وبجي .. بسرعه نزلت لمستواهه مرعوبه واسألهه بخوف :- شبي اخوج
أشرتلي بإصبعهه على الغرفه واتجهت مسرعه بخطواتي للغرفه علما وصلت صرفتلي بطلين دم من وره صريخه .. فتحت الباب وركضتله اول ماشافني زاد بالبجي ويأشرلي على اصبعه .. باوعت اصبعه مجروح والدم يسيل منه عبالي شو شبيه انخلست.. هوَ منا ميخاف من الدم وانجرح يبوو اليوم شيصير بينه .
دنگت عليه أخذت اصبعه وجريت الكلنس انشف بيه واهدّأ بيه :-
- ماكو شي ماما شبيك لتبجي ماكو شي ها أها راح الدم
امسح بالدم وگلبي مكسور على شكله وشلون مفرفح .. كلش يخاف من منظر الدم سحبته لحضني وامسح على راسه
- لتبچي حبيبي
نطق من بين شهكاته وصوته الباكي :-
- ماما يوجع
- هسه يطيب حبيبي
عقمت جرحه ولفيته وهوَ تنحس ظل لو يون لو يبجي
- ماما شبيك ماكو شي هاي العوره بااح
مد اصبعه عود هاهياهه موجوده .. غميت گصتي بضجر وشلته اسكت بي النوب زاد بجي .. نزلته بالگاع ومشيته وياي للصاله كعدته ع التخم ولميت الهوسه هوَ مايعرف يكعد ابدد .. كام يفتر وراي وين مااروح يلحكني .. افتر والملم دنكت اشيل المكناسه واستقاميت اثاري هوَ وراي اول ماكمت انضرب بيه من وره ووگع بالكاع باوعلي وصرخ يبجي .. اني طگت روحي عطت بيه بصوت عالي :-
- شبببييك ماامااا شبييككك خبلتنييي
اني عطت بيه لو الأمة انگلبت ظل يرفس بالگاع ويفرفح بجي .. شلته على خاصرتي وظليت افتر بيه .. أربتت على ظهره وأهمهم اعتذر منه واسكته .. هدأ وكام يأشرلي ع الباب مال البيت يريد يطلع .. رفضت بشده .. رجع يبجي .. ذبيته بالگاع وگابلته وظليت ابجي وياه اني جازعه من حياتي وهذا بطران .
