نوائب الدهر ||عبرات العباديه||

1

الــســلامُ عـلـيـكـم 🌻🌼

نوائــــب الدهــر
الكاتبــه العباديه

الــبــارت_1_
                            alabadyia_09

قُـل للمليحةِ بالقميص الأبيض . .
مطـرٌ وبردٌ يا حلوتي لا تمرضي . .
هل تسمحي لي أن أعيرك معطفي؟‏
والـرأي رأيـكِ ، إنـمــا لا تــرفـضـي .

~~~~~~~~~~~~~~~~~~~~~~~~~~~~~~~~

بـــغـداد – حــي الــقــاهــرة

سمانة...  نزلت من الدرج بملابسي مال المدرسه المتكونه من تلبيسه رصاصي وقميص أبيض وشال أبيض .. لگيت اهلي مجتمعين بالصاله على شكل دائره ويتريكون ابويه يسولف عن ايام زمان مثل عادته كل يوم . . وامي تصب الچاي المهيل بالأستكاين وتوزع على إخواني حتى نتوجه للمدرسه .. سوتلي مكان يمهه وصاحتني مستعجله :-

- يله سمانه تعالي تريگي تأخرتي ع المدرسه راح البنات يجوج وانتي لهسه ممتريگه

- اي غير منتظره تسوولّي مجال

- ديله تعالي هنا يم حيدر

كعدت يم حيدر .. اخويه الاصغر مني بالسادس ابتدائي  .. وإبراهيم بالرابع ابتدائي وعندي اخت وحدة . أمنيات . اكبر مني بالكليه مرحلة ثانيه قسم تربية انكليزي .

تريگت وظليت آكل براحتي وأمي تلح عليه تريدني استعجل .. امي من النوع عصبيه بس گلبها كلش حنين .. صوت عالي وگلب خالي .

بعدني اتريگ واندگ الباب اجن البنات الأروح وياهن .. صديقاتي اثنين وبنت عمي غدير

امي التفتتلي بضجر :-

- كتلج اكلي بسرعه هسه ترروحين جوعانه اووف منج تعالي اسويلج لفه

- لا ماما مااريد رايحه شبعت

- دتعالي خاف تجوعين

حطت لفة جبن بجنطتي وودعتني .. طلعت لصديقاتي ينتظروني صبحت عليهن ومشينه للدوام .

ظلينه نسولف ع التحاضير والواجبات لما وصلنه للفرع اليوكف بي سكتت وبلعت ريكي بتوتر. گلبي ظل يدگ بسرعه ورجفت دنگت راسي ومشيت سريع مهروله .. صديقاتي ظلن يهمسن بإسمي يريدني انتظرهن .. اني بس اريد يخلص هذا الفرع وامر منه بسلام مااريد اسمع غزله وكلماته اليشمرهن عليه مثل كل يوم .

وگفت من شفت المكان اليوكَف بي فارغ .. ايييي همزين ماموجود ارتاحيت نوعاً ما .. انتظرت صديقاتي لما وصلن يمي وكملنا مشي .. ظلن يعاتبن بيه لان طلعت عنهن لفيت السالفه وكتلهن انتن تمشن بطيء وتأخرنا ع المدرسة .

امشي براحه واصغي إلهن شيسولفن كلش ارتاحيت لان مشفته بالفرع يمكن بيت اهله هنا لان هوَ يوميه يوكف السياره بنفس المكان ويشغلهه علما تحمه ومن نعبر من يمه لازم يتغزل نزار قباني .. كملنا مشي لفنه بالفرع الثاني ولمحت سيارته من بعيد .. يمه گلبي رجف ورجليه بادت .. شلون بيه يرربي شأسوي حيخبلني حتى بالمرگه يطلعلي شلون سالفه هاي !