محطات

قلم رصاص 💕💕

محطات
في محطه جديده ....بعنوان قلم رصاص ✏️
بقلم ....أمل طارق

بيحكي ....
كان عمري ٦سنين لمن أبوي فارق الحياه وخلاني انا واخواتي الاربعه وأمي برانا💔
بسن صغيرة لقيت نفسي متحمل المسؤوليه ..بالصباح المدرسه وبالمسا شغل
مرة عتال ....مرة نقلتي ...مره بنضف عربات ...لحدي ما بقيت في سن مراهقه وخلاص بقت عندي رغبات وكمان عاوز ابقا زي الناس الفي عمري 🖤عاوز اشتغل شغله محترمه وما يعايروني بيها وفي نفس الوقت اقدر اصرف على اخواتي وكمان أمي 🖤
مرت السنين عادي بس كان مصاريفنا بتكتر ....بس ما خليت القرايه لا ابدا اجتهدته شديد وكمان كنته بشتغل
جات فترة اشتغلته في مصنع صابون والوقت داك كنته ممتحن شهاده ثانويه ...كنته بموت حرفيا شغل بالصباح وقرايه بالمسا ...حتى انو كنته بتغيب من الايام الكانت ما مهمه وبكتفي بانو اقراها براي ...والمعسكرات وحصص التقويه وغيرو ما كان عندي ليها ميزانيه فاتوكلت واكتفيت ياهو بقرايتي +كان عندي صاحبي الله يديهو العافيه كان جيرانا وبنجي نقرا سوا والفايته ليهو حاجه بشرح للتاني 🔥
امي كم مرة عرضت انو تبيع اخر قويشتين فضلو ليها بس انا اصريت انو نخليهم للزمن خصوصا انو اخواتي على وش عرس وكدا
المهم امتحنته مجازفات حتى بتزكر امتحان الكيمياء جيت متاخر شويه بسبب السهر وياهو 😹جازفتو في باقي الزمن والحمد لله ...طلعت النتيجه وجبته ٩٣.٧وجليت من الازاعه ببوينتات بس ما مشكله 😹
فرحته فرح مبالغه اخيرا ربنا نصرني واخيرا حاقق حلمي
طوالي مشيت قدمته اوراقي
جامعه الخرطوم طب
واتواصلته مع كم زول هناك ووعدوني انو حيعملو كل جهدهم انو اتقبل بالرغم من انو كان ناقصني بوينت واحد 💔
ويا زووول ختيت يديني ورجليني في مويه بارده ....بس كانت الصدمه يوم النتيجه ولقيت نفسي مقبول طب اسنان ما طب 💔صراحه انهرته لانو حلمي ما كان كدا ....مشيت سألتهم قالو انو عملو جهدهم يختوني بس كان في شواغر وملوها ابناء العاملين وكرسيني اخدو زول داخل خاص في اخر لحظات 💔
احساس بالظلم وانكسار وكره ...ليه يا دنيا كدا
مشيت البيت والوالده طبعا منتظرة النتيجه ...
بعد عرفت قالت لي
...يا ولدي ما تتجزع ياهو الطب مجالاتو كتير وربنا كاتب ليك الخير في الاسنان ويمكن الطب مافيهو خير ليك
.....يا امي وين الخير وين الخير الدنيا دي ليه دايما ماشه عكسي
ولاول مرة انكسر وابكي
ما اكضب انو ما كنته ببكي لالا ببكي وفي السر بالليل
لكن اول مرة اوري ناس البيت دموعي 💔
قعدته جمب رجلين امي ودموعي فضحتني
هي سكتت وبقت تطبطب على ضهري
وقالت لي ...
قوم قوم اشكر ربنا وصلي على النعمه في ناس ما لاقينها
قشيت دموعي بس من انكساري ما قدرته اشكر ودا طبعا غلط كبير 💔ممكن تقولو لحظه ضعف
المهم مرت الايام وخلاص بكرة حننزل الجامعه ...وانا والله تلفون ما عندي خلي هدوم
ومهموم يا ربي بكرة امشي بشنو ياهو قميصي البرتقالي وبنطلوني البيجي الكرهته بيهو ناس الحله في اي مرقه لابسو ؟
عاينته لنفسي في المرايه لقيت شعري عاوز حلاقه وانا غير عشرين جنيه في جيبي ما عندي وياهو ماشي اشتري بيهو لبن لبعدين 🖤...اتوكلته شغلي وكنته شغال في سوبر ماركت بنضف وبرتب السلع ....بعد انتهيت جيت البيت لاقتني امي
...يا ولدي اها مستعد للجامعه
...هههه اي يا امي
طلعت ٢٠٠جنيه
...هاك اشتري حاجات ما حلوه تنزل من اول يوم مبشتن
....هههه منو القال ليك انا جهزته حاجات
...يا ولد هوي قبل ما تخش الجامعه خلاص عاوز تكضب علي
امسك القروش اشتري ليك حاجات الجامعه ما قرايه بس وغمزت لي😜
ابتسمته وبسته راسها وجري على صاحبي البراء ياهو زاتو الكنا بنشرح سوا 😅
...يا زول شرا شنو امك واخواتك احق بالقروش دي
بس شيل ليك ١٠٠مشي بيها حالك
للايامات الجايه وانا بديك القمصان شده عندي كم قميص جايبنهم لي من تركيا
....امشي يا مستهبل تلقاك جايبهم من سوق سته 😂
....صدقت ...خليك من دا البسهم وشوف الجكس حيجيك جاري جري
...هههه انت اصلك ما بتتغير