محطات

جبنه الخريف بقلمي ...أمل طارق

جبنة الخريف ☕🔥
بقلم ....أمل طارق
قال ....
عشته حياتي كلها مشاكل وضرب ومناقره ...كحال الاسر البكون فيها تفكك ...
ابوي مطلق امي وحتى ما حصل شفتها ولا بحب زول يجيب سيرتها وحسب ما سمعتو من الناس انو هي عرست وسافرت مع راجلها 💔وجدعتنا انا واختي الصغيرة
معليش ماف زول بختار امو وابوهو ...بس دا كان سبب كافي انو يكون اخلاقي زفت وتصرفاتي ما تعجب الناس ...طبعا ابوي عرس وجاب مرتو الجديده معانا وهي كمان التانيه والده زي ٥اطفال ومجدعاهم في الشوارع ولا شغاله بيهم الشغله تمرق تحوووم وتجينا بالليل ولمن تقعد غير المشاكل ما بتجيب لينا شي
يومي محرشه علينا ابوي ويجي هو بالليل يفش فينا خلقو ويضربنا ضرب خيالي انا واختي 💔
عاملانا انا واختي خدامين ليها ولشفعها ...في الوقت الكانو الاولاد فيهو بلعبو وبتفسحو انا واختي كنا بننضف ونغسل شي هدوم وملابس وغيرو ولو اشتكينا ساي ....واطاتنا اصبحت 💔
عدت السنين ونحنا في هذه الحاله ...بس وين؟ انقضت فترة الطفوله ودخلته على مرحله المراهقه وهنا خلاص بديت اعلن تمردي التام ....بقا الضرب ما بيأثر فيني وكمان جايب نتايج عكسيه لانو بنفس الطريقه الكنته بضرب بيها في الطفوله بمشي بضرب الاولاد في الحي
كل يوم والتاني ولد معوق ووادينو المستشفى ....حتى ابوي غلبو اليسويهو معاي
كم مرة شكوني وودوني قسم الشرطه ويجي ابوي يطلعني بكفاله وتاني تتكرر الحركه 😹💔
يوم كدا ابوي خلا لينا قروش الفطور وقال لينا جيبو بيها فطور واكلو كلكم
مرة ابوي من مرق جات قلعت القروش ما قلنا شي وعملت الفطور اكلت هي واولادها ما قلنا شي ...بس حقارتها وصلت انو لقت اختي لينه بتحضر في التلفزيون جات كوركت وهرجت وشالت سلك التلفزيون ودقتها دق مبرح لمن جسمها رشح دم 💔
الصراحه انا بستحمل اي شي وبستحمل الجوع والذل والضرب بس لينه خط احمر وخلاص اتحمقته مشيت ليها في المطبخ
ومن غير ما اشوف قدامي شلته اظن نص عده المطبخ وبقيت بكسر فيها
اخواتي من ابوي بقو يصرخو وامهم بقت تكورك وضربت لابوي قالت ليهو اولادك عاوزين يقتلوني 🙀...جانا جاري مسكني من قميصي رفعني فوق ورماني ليك في الصالون وقفل الباب وبقا يضرب فيني بجنزير 💔 للان بتزكر الموقف دا كويس كان عمري ١٣سنه ...اي ضربه اي الم حسيت بيهو... للان متزكر مكان اي ضربه 💔ما كلف نفسو يسمع انا عملته كدا ليه؟
ما وقف من الضرب الا لمن يدو وجعتو ...انا تقريبا اتكسر فيني زي تلاته عضام ومن الالم ما كنته حاسي بشي بس رقدته فطيسه وما حسيت بنفسي الا في المستشفى 💔
بعد الحادثه دي بقينا انا واختي نتجنب نحتكا بمرة ابوي وبعيدين منها
الفترة ديك حبوبه ام ابوي مرا طيبه كدا ...قالت عاوزه لينه تجي تقعد معاها في البيت وكدا ...وطبعا مرة ابوي وافقت لانها كان غرضها تتخلص مننا ...اها لينه مشت وبقيت قاعد انا ...طبعا جوا البيت ما بعمل اي شي ...بس بمشي برا البيت بعمل العجب 🙀🔥واتلميت لي على شباب كدا ناس سجاير وصياعه وزدته الطين بله
مرت السنين وانا يوم ورا يوم ببقا اكعب من التاني
لحدي ما وصلته سن ١٧سنه بقيت ثورة مشتعله كدا ...عيون حمر من الترامادول ومشاكل على مستوى الحله والجامعه وكلو
طبعا دخلته الجامعه دفر زاتو وياهو كان اتلميت لي على شله كدا زيي 😹وكان لامي المزز حوليني واغش دي واحنك دي وامرق مع دي 💔
لحدي ما في يوم لقيت واحد قصاني 😹🔥زي ما بقولو كدا وخطف زولتي ...طبعا سن فورة وشباب وكدا اتشكلنا في حوش الجامعه وقطعنا دلاقين بعض 😹
وكشكله شبابيه عاديه...بس انتهت بطريقه كعبه شديد
لاول مرة زول يزكرني بامي وبالعملتو ...على حظو الزفت ..انو دخل امي في كلامو وبالفاظ كعبه هنا انا ما شفته قدامي وما لقيت نفسي الا وقزيت ليهو مطوه في بطنو والدم ملا يدي 🙀💔
الناس دي كلها بقت تكورك ...انا الجامعه دي طارت لي في راسي 💔جريت ما عارف لوين جريت وبس
ادسيت زي اسبوعين كدا وشايف مكالمات من لينه وحبوبه وابوي وارقام غريبه ما رديت
شلته التلفون وجدعتو في اغرب زباله لاقتني 😃
بقيت شغال عتال مع ناس كدا لحدي ما في يوم كنته بعتل فجاه القا ليك بوكسي جا واشرو علي وانا بس وقعته الفي يدي
وفكيت الجريه ...بس وين هههه😹شركو لي وقبضوني
وودوني القسم ...ابوي جا قال لي لا ولدي لا بعرفك وتاني ما تجيني نهائي ما اشوف وشك
ما استغربته لانو متوقع منو اي 💔شي
المهم حولوني المحكمه والقاضي لقاني ناقص من ١٨بشهور عشان كدا ما حكم اعدام وودوني اصلاحيه 😃💔
اول يوم دا للان محفور في زاكرتي اول شي جاني ليك عسكري حلق لي صلعه وحات الله شعيرايه بالغلط ما خلاها 😹
وطبعا ممنوع وممنوع حاجه كدا تكره ...وواصلته مشاكل
بس كنته مصاحب واحد من المسؤولين ...وكان بقول لي انا شايف فيك نفسي لمن كنته صغير
يا رامي انت ما توعدني تبقا كويس وتروق ...وانا بساعدك تمرق وتكمل تعليم كمان
انا عارف طاقتك الزايده دي ممكن تتوظف وين
المهم بقا كل مرة يحاول معاي لحدي ما وثقته فيهو وحكيت ليهو حكايتي
وعدني انو يساعدني اطلع بس حيراقبوني زي تلاته شهور وما اطلع برا الخرطوم ولو ما عملته شي تمام ولو عملته حركات حيرجعوني تاني
المهم عمل طلب للقاضي فيهو استسماح وشنو ووكل لي محامي وبقدرة قادر وافقو وبقيت تحت عينهم
طبعا اول ما مرقته اتوجهته بيت ناس حبوبه ماعندي غيرها زول يستقبلني 💔
فعلا ما خاب ظني واستقبلتني ...اما لينه دي طارت من الفرح وشالتني فوق راسها اليوم كلو دمعتها في عيونها وتقول لي ...بركه الرجعته يا اخوي ياكا انت سندي تاني ما تتهور 😹💔
المهم بقيت ياهو قاعد ساي باكل وبشرب على قروش حبوبه البتجيبهم من بيع الكسرة والداندرمه
بعد كم شهر كدا المسؤول بتاع الاصلاحيه رسل لي اجيهو ...انا خلاص بطني طمت قلته عاوز يرجعني ...ولينه دي بكا شديد
ههه المهم مشيت ليهو
قال لي ...يا رامي انت بدل قعادك ساي دا ما تجيب شهاده الثانوي اقدم ليك في الجيش ياهو انسب مهنه ليك لانك حار ومنو نستثمر طاقتك دي
الفكرة ما بطاله بس اتخوفته كيف اخلي اختي وحبوبه براهم
وما عندهم غيري ؟!
تاني قلته بيني وبين نفسي هو انا اصلا نافع لمن يستفيدو مني ؟ما ياهو قاعد زي عدمي اكل واشرب ساي اخير امشي اشتغل ارسل ليهم قروش وانفع نفسي 🔥
وافقته وكلمتهم بقراري الله لا وراكم كسرة النفس ولاول مرة احس بالوجع لمن شفته دموع حبوبه ولينه ...
اتقبلته في الجيش ورسلو لي ...سافرته وانا شايل هم كبير وماعارف المنتظرني شنو
وصلته معسكر التدريب ...كانت حته تكاد تكون خلا ...ما بتتخيلو الحر الفيها 🙀ولا كميه العقارب والثعابين ...يعني الواحد شده ما اتعود عضه العقرب بقت زي النمله يحكها ويقوم يعمل ليها دوا يمرق السم ولو خلاص حنكوش ودمو حلو يرقد يوم عندو حمى وتاني يوم يتنفض 😹💔
وطبعا الاكل فول عدس ولمن خلااااص نبقا جلابه بناكل شعيريه بالسمسم 😹
ولمن نهرب اكل كنا بنتقبض ونتعاقب عقاب مبرح 🤣💔
اتعلمنا التقشف الجوع والصبر
ومن المهارات كتير ...ضرب السلاح والرمايه وكل انواع الدفاع عن النفس 🤣
طبعا عندي كان زميل كدا ردتو لله زول هادئ على عكسي تماما
وكان صحبي وفردتي اسمو محمد
يلا دا لو اتقبضنا في حاجه بيتقبض معاي وبتعاقب معاي 😹مرة هربنا كبسه وكم حاجه كدا
جرينا ١٥٠متر حفيانين في الشمس الحاره والبوقف بدوهو محطه لمن يأمن 😹🤣💔💔
ايااام ياخ
مرت علي سنه وشويه في الجيش وطبعا بالرغم من راسي الناشف الا انو الضباط الكبار كانو بحترموني 🔥وبشكروني شديد ...وبعتمدو علي في المهمات الصعبه
المهم كان دفعتنا كلها كدا دقت جرس انو ما شافت اهلها ولينا زمن بس بنرسل ليهم مصاريف بس نفسنا نشوفهم
وبعد تعب وافقو لينا نمشي اسبوع بس ونرجع ...وطبعا البشرد بجيبو بجيبو 🤣ماف داعي اوريكم
المهم جهزنا حاجاتنا وقاعدين انا والشباب بالليل في المخيمات نشرب شاي
لقيت ليك محمد دا مبتسم كدا ويعاين للقمرة
...خير يا زول
...ههه ولا شي بس بكرة حنمشي للاهل
...ههه للاهل برضو 😎
...هههه والله انت
...اها احكي دي منو
...والله هي بت حلتنا وهناك في قريتنا البنات ما بقولن اسمهن بس بنقول بت فلان وبت فلان وما بتعرف اسمها الا يوم تعرسها 🤣
...هههه يا زول
وطيب دي تطلع بت منو
....بت فاروق زول كدا قدر وقيمه في الحله وبناتو خط احمر ...يا زوووول ها سمحات سماحه تلخم لكن وين منو البمشي بدربهم والله اعمامن يضبحو
...طيب شنو الوقعك معاهم
...والله ايام كنته مسافر داك مشيت اتمم كم حاجه من البقاله القاها ليك جايه على البقاله انا سحته من السماحه وما قدرته امسك نفسي وسالتها من اسمها وقالت لي بت فاروق وابتسمت لي
....هههههه والله 🤣قصه
....والله بس ياهو بقيت بلاقيها كم مرة كدا وياهو اعجاب متبادل بس ما قادرين نصارح
...نصيحتي ليك امشي لابوها بس ودق بابو بديك ليها لكن لو قبضك كدا ياهو الكتلك وكتلها 🤣
...اي والله وانا شان كدا ماشي يمكن ربنا يلين قلبو ويوافق بي
....هههه ان شاء الله وارجل كدا واعرف اسمها بدل الهبل دا
....هههه اها وانت هبرك شنو مع الجنس اللطيف
....انا اسكت مني ساي اخر مرة بسببو طاعن لي زول واييييك قصه انساني انا ما لي شغله في القصص دي وتبته منها
...هههه يا راجل ..ما على كيفك يوم قلبك حيرف كدا وحتجي زي ما تجي عفوا 😹
....ههههه نشوف