يوميات شاب ملتزم💮

الحلقة العاشرة

الحلقة العاشرة

تكملة الحوار السابق في شقة هشام..

مصطفي :طب بعد ما سمعنا الشريط ده وفوقنا كده بصراحة حاجة ترعب
إحنا لازم نحدد هدفنا من دلوقتي ونظبط الأمور كويس علشان منتوهش ونقوف ونتعب بعدها لازم نبني نفسنا كويس

محمد: صح يا مصطفي على فكرة يا جماعة ..سعيكم لإنكم تعرفوا الدين دي حاجة كويسة أوى ..بس احنا عاوزين نعرف الدين ده صح وواحدة واحدة.

هشام: ازاي؟؟

محمد: يا جماعة الدين ده متين ..يعني اعتبر انه بحر.. ..انت أول لما بتنزل البحر الميه بتوصلك فين ؟؟

أحمد: يعني..على نص الرجل كده شوية وتبقى عند الركبة..

محمد: لكن لو نزلت في البحر على عمق تلاتة متر مثلا ..ممكن تغرق لا قدر الله..احنا أهالينا زمان كانوا بيخلونا نعوم قدامهم على الشط ..لاننا كنا صغيرين..كنا بنعوم في شبر ميه.. بعد كده بقينا نتعلم السباحة ..وندخل في أماكن أعمق شوية..

عماد: بس خد بالك احنا ممكن بسهولة نغرق في ظاى موجة عالية

محمد: تمام .. يبقى لازم تتعلم السباح و الغوص قبل ما تنزل البحر ..علشان تقدر تواجه الموجة العالية دي .. مظبوط؟؟

أحمد: أنا تعبت .. أنا مش قادر أوفق المذاكرة مع الكلية مع الدين مع الأهل ..الضغوط كتيرة أوي..

مصطفى: أنا عاوز أقوم بواجباتي في الدنيا .. وكمان أرضي ربنا

عماد: وأنا كمان

محمد: طيب ايه رأيكم نتفق على كام حاجة نعملهم الأسبوع ده..الأول مش هنفوت صلاة في وقتها

أحمد: انا بقيت أعمل كده .. بس بصلى الفجر في البيت

مصطفى : لا خلاص الفجر في البيت ده كان زمان ..احنا هنصلي الفجر جماعة في المسجد..ان شاء الله

عماد: وهنضيف على الواجب ده ركعتين قبل ماننام ..بس كده

محمد: اتفقنا

هشام: طيب و الشريط التاني مش هنسمعه

مصطفى: لا احنا الأسبوع ده مش هنسمع غير قرآن وبس

محمد: يعني كل ما تفكر تسمع شريط خطب أو دروس ..قول لأ انا هسمع كلام ربنا..مش علشان الحاجات دي غلط ولا حاجة ..لكن احنا هنعمل هدنة ..نريح القلب شوية من كلام الناس ..من شرايط و خطب و كتب و أفلام ..وحاجات متناقضة..إحنا في أسبوع واحد بس هنحاول نقرأ كلام ربنا كل يوم ..إقرأ بس ربع حزب في اليوم .. واسمع ربع ساعة بس قرآن ..و متزايدش على نفس .. وريح قلبك شوية .. أعصابك هتهدا.. و تعرف تختار بعد كده ..انت عاوز دنيا ..ولا دين ..ولا عاوزايه بالضبط..

مصطفى: ساعتها بقى نقدر نحدد احنا ممكن نقرأ كتب مين.. ونسمع خطب ودروس مين ..وحياتنا كلها تمشي ازاي.

أحمد: يعني هنعمل عملية غسيل قلب

هشام: بس أنا صعبان عليا الشرايط اللى اشتريتها دي ..مش هتسمعوها يعني؟؟

محمد:أوعى تندم على حاجة.. دي أحسن حاجة عملتها..انت لازم تشوف كل وجهات النظر..وبعدين تبتدي تكون رأي..أوعى تخاف تقرأ أو تسمع واحد مخالفك في الرأي ..بالعكس ..

أحمد: يعني باختصار كده كل شيء معروض ومتاح لك دلوقت ..اعرف الأول وبعدين حدد أنت عاوز ايه.

هشام: خلاص اتفقنا