الحلقة السادسة والعشرون
استأذن الشباب من مضيفهم الشيخ عبد الجواد حتى يستريح بعد صلاة العصر و لكي تتاح لهم الفرصة للتنزه بين الحقول ..
أحمد : تعالى هنا بأه وقول لنا ..ايه حكاية جدك..و أنت مش عايش هنا ليه؟؟
هشام: أيوة وايه حكاية علي ده..انا طول الوقت وانا عايز أعرف مين علي ده؟؟
محمد:طيب بالراحة عليا..انا هقول لكم ..بس الأول أحب أعرف ايه رأيكم في القعدة مع جدي وايه رأيكم في كلامه..
أحمد: بالصراحة جدك ده راجل طيب أوي..
هشام: وكلامه جميل ..و بيشرح بالراحة و من غير ما يتعصب و لا يتشنج..
عماد : لو لاحظتو يا جماعة أنه كمان متكلمش غير عن الرحمة ..رحمة ربنا ..صحيح احنا اللى سألناه عن الامور دي لكن ..محاولش يدخل سيرة العذاب أو العقاب خالص..
مصطفى: انا رأيي إنك تحبب الناس في ربنا الأول و تشرح لهم رحمته وعفوه ونعمة و مغفرته ..بعد كده انت هتخجل بعد النعم دي كلها إنك تخطيء ..ولو حصل وده طبعا وارد لأننا بشر ..و لأن ده الغرض من حياتنا في الدنيا..على طول هترجع لربك تستغفر و تبكي..أصله كريم معاك..
محمد: هوه كده بالظبط..جدي مش بيحب يتكلم عن العذاب و قدرة الله سبحانه وتعالى في انه يعاقبنا ..لكن بيحب دايما يبدأ كلامه عن رحمة الله ..على فكرة الأسلوب ده مش بينفع مع كل الناس ..فيه ناس العقاب و المصايب و الابتلاءات هيه اللى ممكن تغيرها ..أحيانا بتكون سبب في هدايتهم ..وبرضه بتكون رحمة من ربنا انه رجعهم ..يعني زي شدة الودن كده..علشان تاخد بالك من اعمالك بعد كده..
هشام: توهتنا..ايه حكاية علي..
محمد: يا سيدي جدي راجل أزهري ..و انتم عارفين ان المتعلمين في وقت جدي كانوا مش كتير و خصوصا في الأرياف ..بالإضافة لانه ازهري..الناس كلها كانت بتلجأ له تسأله في أمر من امور الدين..تحكمه في أي مشكلة ..كانوا واثقين فيه..الأهالي زمان بنوا حتة أرض صغيرة و عملوها زاوية للصلاة..شوية شوية ..وجمعوا من بعض و بنوا مسجد..اللي احنا صلينا فيه ده..و جدي كان امام المسجد ده ..بس..جدي بأه ..كان عنده أربع ولاد وبنتين..علمهم كلهم..ومنهم طبعا والدي..و بما إن الريف مفيهوش جامعات فالولاد دول اتعلموا في القاهرة ..كان حل من اتنين..ام انهم يكونوا زي أي قروي ينبهر بأضواء المدينة و يتوه في زحامها..او انهم يتفوقوا جدا في التعليم ..والدي..و أعمامي..عماتي..كانوا من النوع التاني..بس كل واحد انشغل بمشاغل الدنيا و اتجوزوا وخلفونا لكن ميفوتش يوم جمعة إلا لما يتجمعوا هنا..يعني انا هاجي بكرة كمان ان شاء الله..والدي درس في كلية الآداب قسم اللغة الإنجليزية..جدي كان عاوزه يدخل آداب لغة عربية ..لكن والدى رفض..و فعلا تفوق والدي جدا..و اتعين معيد في الكلية وسافر ياخد الدكتوراه من انجلترا..و سافر بلاد تانية كتير ..لف معظم دول أوروبا ..لكن تشوفه لما ييجي البلد تقول ده فلاح ابن فلاح صحيح..يقلع البدلة و الكرافت و يلبس الجلابية البلدي ويبأه عمدة..بس مش عمدة زيك يا عماد...
هشام: مش فاهم حاجة ايه برضة حكاية علي و ايه علاقة علي بجدك بأوروبا بالجلابية البلدي..
محمد (مازحا): مين ده ؟؟ده جاي مع مين؟؟
مصطفى : جاي مع الأسف..
هشام: يا سلام ..شايف يا أحمد ..الدكاترة دول حتى في هزارهم بيكونوا معقمين..ده ايه الخفة اللي انتم فيها دي..
محمد: خلاص يا سيدي..انا أقولك..بما أن جدي من الناس اللي موثوق فيهم في البلد..فحكاية علي دي بدأت لما علي كان عنده خمس سنين و بالمناسبة له اخت عندها دلوقت 8 سنين ..والدهم ووالدتهم توفوا في حادثة..و اهل الأطفال دول ..عندهم اللي مكفيهم من العيال.. و الفلوس عندهم ..اللي جاي على أد اللي رايح..و علشان الولاد دول ما يتشردوش جدي أخدهم ورباهم..فطلعوا ناس طبيعية ..مش حاسيين انهم عالة على اعمامهم ..بالعكس لما بيروحوا يزوروا أهلهم هنا بيكونوا مبسوطين بيهم..و الولاد دول بيعتبروا كل بيوت البلد بيوتهم..واتربوا على ان كل اهل البلد أهلهم..مش قلت لكم على اخلاق القرية..ازاي يطلع من بينهم عاطل ولا منحرف..يتيم يتربى ..و أكفله و أصرف عليه ..يبقى عارف اني مش ابوه ..بس بربيه ..يبقى حاسس ان له أهل ..متلاقيش بأه عقد نفسية .. ولا حاجات من دي..جدي قال لكل أهل القرية ..ان اللي يمسح على رأس اليتيم ..يكون له بقدار كل شعرة حسنة..مش عاوز أقولكم بأه البلد كلها كانت رايحة جاية تمسح على رأس الولاد دول ..وكانوا بيتوددوا لهم ازاي..أصل جدي رسخ في نفوس أهل البلد أن اليتيم ده و الرحمة اللي ربنا نزلها لهم..واذا هما رحموا اليتيم ..ربنا هيرحمهم..ولعل يكون في واحد منهم..اللي الرسول عليه الصلاة و السلام ..ولد صالح يدعو له..أصل الولد الصالح مش بس اللي بتخلفه..لأ ده ممكن يكون ولدد حسست على راسه ولا ضحكته ولا مسحت دمعته في يوم من الأيام..يعني حتى لو مش عندك اولاد ..ممكن يكون لك بعد وفاتك ولد صالح يدعو لك
أنت تقرأ
يوميات شاب ملتزم💮
Aventuraتوبتك المتكرره والتي لم تملَّ منها يومًا وذنوبك التي تستغفر منها وإن كثُرت ذلك ضميرٌ أحياهُ اللهُ في قلبك ليكون طريقك إلى الجنّة لا تتجاهله🌸
