زواجـ مشئوم…
كتابة:زهرة مرزق🌹🍂
الفصل الأول...1
كل بنت في الدنيا حلمها الفستان الأبيض...وفارس أحلام مناسب ليه...وكل بنت ترسم في أحلام وردية ومخططات بخصوص حفلة زفافهاا المنتظرة...ومتناسية شن يلي يستنى فيهاا بعد السعادة والحلم الوردي هذا...و هذا كله رح يكون على حسب نصيب كل وحدة وشن كاتبلها ربي سبحانه وتعالى في علم الغيب….
وفي روايتنا هذي بطلتنا لعب القدر والنصيب لعبته فيهاا بالرغم من صغر سنهاا...إلا إنها شافت وعاشت شيء وااجد...ولولا رحمة ربي بيها ولطفه...لگانت في عالم ثاني!!!
•
•
•
سلسبيل:بنوتة جميلة مواليد 98...طولها وسط وجسمها حلو...بيضاء...عيونها گبار وسود ورموشها طوال...وشعرها طوله وسط ع الأسود…
طبعا هي جت في ظروف صعبة وما گملتش قرايتها إلى ثالثة عدادي ووقفت…
عندها 3 خوات:سندس مواليد 95 متزوجة وعندها ولد واحد...وهذي بالنسبة لبطلتنا الحضن الدافي ومخزن أسرارها
و استبرق مواليد97 مخطوبة…
وعندها أخ واحد مواليد 2000 سعد… وباتها محمد...وأمهاا أم الخير… بالإضافة إلى 4 أخوات من باتهاا…
وطبعا هما من منطقة في جنوب ليبيا اسمها أوباري...وأمهم من منطقة ثانية حتى هي في الجنوب اسمها مرزق…
نبدوا في أحداث روايتنا الواقعية على بركة الله يلي صارت في بداية سنة 2017…
في يوم الجمعة… خشت الأم (أم الخير) على بناويتها في الدار تنوض فيهم بصوت عالي وتفتح في الرواشن
الأم:هي نوضي إنتي وياها ياسركم نوم،،ورانا حوسة و الدنيا مقلوبة
سلسبيل وهي تحط في المخدة على أودانها:الساعة كم توا؟
الأم :الوقت متأخر الـ10 قريب تضرب هياا سقدن أرواحكن
سلسبيل وهي مزال ناعسة:باهي باهي يما...الوقت مزال بدري 10 دقايق بس…
الأم وأعصابها انفلتن من بناتها الراقدات:نووضي إنتي وياها خير من انجي انشلفطكن يلاااا…
تقعدت سلسبيل وهي تنفخ وحالتها حالة...على طلعت الأم من الدار...ناضت من سريرها ومشت لسرير استبرق تخبط فيها باش تنوض…
استبرق:تي خيرگ يا حصلة خلي الناس يرقدوا..أف شن هذا
سلسبيل:نوضي بلا كسل ورانا مشية لحوش جدي ولازم نمشوا بكري لإن اليوم علينا التطييب
استبرق:أففففف...باهي
خشت سلسبيل الحمام(حشاكم)ودوشت وتوضت..وطلعت صلت ونزلت تفطر...وشوي ولحقتهاا استبرق…
لقوا العيلة گلها ملتمة باتهن وخوهن وأمهم فطروا ولموا الحوسة وطيبوا الغدي…
والأم مشت تجهز في الأب والولد لصلاة الجمعة…
في المطبخ عند البنتين…
سليبيل:تعرفي اليوم حلمت بروحي لا بسة قفطان أحمر
استبرق كانت تقطع في الخضرة حطت الموس من يدها وصفنت في أختها بدون گلمة…
سلسبيل عقدت حواجبها :خيرك قلت حاجة غلط؟
وشوي وتنفجر استبرق من الضحك:ههههههههههههههههه
سلسبيل طلرتلها وقعدت تضرب فيها على ظهرها:الحق في يلي دايرك بنادمة ويهدرز معاك...انطقي شن فيه؟
وبعد شهيق وزفير وتخبيط من إستبرق وهي تضحك سكتت وقالتلها: آه يا ربي ههه...قصدك إنتي بتتزوجي وناضت تضحك مرة ثانية..
سلسلبيل وهي مفلوتة خلاص من مهزلة أختها:شن تقولي إنتي..شن دخل الزواج في النص
إستبرق وهي تمسح في دموعها من الضحك:هذا يا ستي يقولوا إن البنت يلي تحلم بالأحمر معناها بتتزوج!والله أعلم…
سلسبيل وهي شبه فرحت وقلبها قعد يرقص:أهااا...زعمة حق ياربي…
وقعدت تدعي إنه يصير حق...وتخبر في أختها شن بتلبس وشن بدير وووو (الحاصل البنت عاشت الدور)...
على خشت أمهن عليهن :هياا كملتن قريب يجوا رااه...وإنتن تضاحگن من بگري…
استبرق:لا خلاص كملنا...مزال السلاطة بس نقطع فيهاا
سلسبيل :ونا سقيت الأكل وصبيته وتو ماشية نصلي
الأم :بااه تماام
وبعد ربع ساعة كانت العيلة كلها ملتمة ع صفرة الأكل...ياكلوا بهدوء وصمت...عدا سلسبيل يلي كانت تحرك في الكاشيك في الصونية و هي سرحانة!
الأب :يا بنتي وين سرحانة من بكري...ماكليتي شي راك...احترمي النعمة يلي قدامك
نطقت استبرق طوول :أكيد في القفطان الأحمر...بعدها حطت يدها على فمها تكتم في ضحكتها…شبحوا لبعضهم كلهم وهما مش فاهمين شيء!
شافتلها استبرق بنظرات تتوعد فيها:لاشيء يا باتي امغير فاطرة موخر والنية مسدودة…
وكملوا أكلهم وغسلوا مواعينهم وخشوا يقيلوا...وطبعا الأم جابت عالة الشاهي وكسدت حدا راجلها…
مدتله طويسة شاهي منعنعة بالبوجة متاعهاا..
خدا منها رشفة وقال:والله يا مرا الولد والبنات كبروا ومسئوليتهم زادت
الأم:ربي يحفظك لينا...والله مامقصر علينا في حويجة...ربي يديمك لينا
الأب:و الله البنات نصيبهن عند ربي ووحدة متزوجة والثانية مخطوبة والأخيرة قسمها عندالله...والولد نفكر نبنيله من تو ونتريح
الأم:غير إنت ما تشغلش روحك وخلي كل شيء على ربي.. وربي تو يسخر الحال إن شاء الله…
الأب : يارب، هي تو بناخذ غفوة ونوضيني ع العصر
•
•
•
وبعد العصر ناضوا كلهم مشوا الأب والولد للجامع...والبنات ناضن صلن وجهزوا أرواحهم باش يمشوا لحوش الجد…
وبعد نص ساعة كانوا غادي….خشوا سلموا … وقعمزوا
طبعا عندهم زوز عماام متزوجين...وزوز عمات وحدة متزوجة والثانية لا … المهم خشن البنات مع البنات وقعدن يهدرزن و يضاحكن ويبصرن...وعمتكم استبرق ماتنبل في فمها فوله
إستبرق : حق يا بنات سلسبييل بتتزوج
البنات انصدمن :شنوو
طبعا سلسبيل اتنزفزت من أختها وسهوكتها
سلسبيل:ياربي...إستبرق تسگري فمگ خيرلك رااه
هند بنت عمها:معقولة يصير وما تخبرينا؟
سلسبيل:تي والله ما في حاجة...امغير البلا هذي تخرط
نهى بنت عمتهم وهي تشبح لإستبرق:قولي شن فيه يا بنت
إستبرق:هذا سلسبيل حلمت بقفطان أحمر...والمعروف إن الأحمر في الحلم زواج
وناااضن البنات يضاحگن ويتخابطن
سلسبيل عصبت ع الآخر وناضت من حداهن… خششت المطبخ...وفي عين كانت تراقب فيها من أول ماجت..أول ماخشت للمطبخ لحقتها وخشت وراها طوول...
سلسبيل شادة طاست مية وتكلم في روحها:آخخ بس كان يطلع حق..ونوريهن الضحك بعدين ع أصوله
وتسمع صووت من وراها...
…:شن هو يلي حق؟
لفت سلسبيل بشهقة وراها مصدومة من يلي سمعها: ش ش شيء...عمتي من أمتى إنتي اهني
العمة:ماعليگ فياا...المهم توا تعالي معااي للدار نبيك في موضوع مهم
سلسبيل:شن فيه...إن شاء الله خير
العمة : تعالي وتو تعرفي كل شيء
ومشن خشن للدار وقفلن الباب وضمنن أرواحهن باش ما يسمعهن حد
سلسبيل :هيا عمتي قوولي ... خلاص راني
العمة:....
واهني سلسبيل وقفت عل طولها من الصدمة وهي حاطة يديها ع فمهاا!!
•
•
•
ياترى شن قالت العمة لبنت خوها...رح نعرفوا بس في الفصل الجااي!
….
رايكن حبيباتي في الحلقة...طبعا هذي مقدمة والحماس بيبدا من الحلقات الجاية…
گتابة:زهرة مرزق🌹🍂
في أمان الله 🖤
•
•
