زواجـ مشئوم

زواج مشئوم

ممنوع  🚫ممنوع🚫ممنوع🚫
نقل أو نسخ الرواية باسمي أو بدون اسمي
وحسبي الله ونعم الوكيل في يلي تخالف ☝
زواجـ مشئوم

الفصل الرابع...4
كتابة : 🍂🌺 زබ‏ـرة ρـرزق...🖤👑

طلعت المزينة تشوف مصدر الصوت…ومعاها سلسبيل
لقاته عمها.. انصدمت واستغربت
عمها وهو دهشان ويا دوب ياخد في النفس: امشي معاي اليوم عندك امتحانات الشهادة وإلا نسيتي.؟
سلسبيل شهقت وحطت يدها على فمها: والله نسيت. .لهيت في العرس ونسيت موضوعي بكل..
طبعا هي مسجلة في المنازل!

المزينة واقفة بيناتهم ومش فاهمة شيء...كيف وحدة يوم عرسها ماشية تمتحن ولا بتمشي بي فيلوهاا!ْ!!
لبست سلسبيل الكاب والطرحة ومشت مع عمهاا للمدرسة
أول ما خشت الكل انصدم فيها أساتذة وطلبة من هذي يلي خاشة بالفيلو وللمدرسة...عجب وخلاص…
قعدوا البنات يلي يعرفوها يسألوا فيها ٱنتي سلسبيل وهي ترد لا أنا العروسة
فهم عمها الإدارة يلي صاير وخلوها تمتحن في فصل بروحها
وهي في الفصل قبل لا تستلم ورقة الامتحان خش عليها ولد
الولد وهو مرتبك ومصدوم: إ إ إنتي سلسبيل؟
سلسبيل رفعت الطرحة باش تشوفه وزبطاته إن الولد يلي كان معجب بيها قبل و يبيها فـ حبت تتجكتر عليه:لا أنا العروسة سلسبيل
مسكين انكسر قلبه وطلع طوول وخلاها..
خشت عليها لجنة الامتحانات وسلمتها الورقة وبيني وبينكم مشى كله غش في غش من الأساتذة وسلمت ورقتها وطلعت…
مشت للمزين مع عمها
خشت والمزينة مصدومة ومزال مش مستوعبة: شن صار معاك
سلسبيل:درت امتحاني وجيت
إستبرق:عليه موقف يسجل في تاريخ البشرية
وتموا يضحكوا مع بعض…
المزينة كملت مكياج سلسبيل وعدلتها وزبطتها وطلعت ملكة...باسم الله ما شاء الله روعة في روعة…
حطتلها التاج ع راسها والطرحة والكاب...وامشوا في بيابات للفرح…بعد وصل موكب العريس...حلقوا ع البلاد كلها بالبيابات
خشت مع خوهاا على صوت الزفة...وهي تمشي بهدوء وبخطوات بطيئة...وتسمع في هرجة الناس وهتافاتهم...وصلت للكوشة وقعمزت…قعدن صاحباتها وقريباتها يجن ويباركلها والكل فرحان ومبسوط…
وشووي سمعوا صوت البيابات...موكب العريس وصل…
خشوا أهل العريس والعريس…
أول ما وصل العريس وقفت سلسبيل...قاملها الطرحة وباسها على جبهتها وخدودها وقعمزوا...شووي وناضوا يرقصوا مع بعض على أغنية كلل العمر ع حسابك كلي أنا ع حسابك…
وداروا جوو أهل العريس ورقصوا معاهم…
وطبعا العريس كان يرقص ومبسوط ع الآخر…
وهمس في وذن سلسبيل:والله حاس بفرحة...گأني أول مرة نعرس
واهني سلسبيل طاااااااارت من الفرحة باللي سمعاته وابتسمتله بخجل…
وهگي مشت الحفلة على خير...وفي الليل جاء وقت الحنة
نحت سلسبيل الفيلو ولبسة خفيف وفوقه الردي…
وجت الحناية وحنتها وظفرتلها شعرها ومشى اليوم على خير…
وجاء ثاني يوم الصبح وامشت للمزينة واصدرت … وخشت للخيمة … وبعد تغدوا الناس...العشية طلعوها للخيمة وغنوا عليها..  وثالث يوم كان آخر يوم المرواح أو يوم الدموع العالمي طول الوقت وسلسبيل وأمها وخواتها يتباكن
الأم:صعب علياا فراقك يا بنتي.. إن شاء الله ربي يسعدك ويهنيك
إستبرق شادةة تركينتها وتبكي وحاضنة روحهاا
سندس خانقتها العبرة بس صابرة وتساوي في سلسبيل
جهزتها وحطتلها ملابسها و أشيائها يلي تحتاجهن وسلمت عليهاا
...وبعدها كان عشاء في الليل للناس وبعدها جااهاا موگب العريس ورفعوها وزفوها لجرمة طوول...حطوها في السيارة وجنبها العريس علاء...والسواق شخص ثاني.. طبعا طول الطريق حاول ينابشها ويفتح معاها موضوع بس لا إجابة مستحية ومنكمشة في روحها… وأخيرا وصلوا لحوش العريس يلي كان فوق حوش أهله…
أول ماخشوا البلاد…
علاء: آنستينا ونورتينا في بلادك الثانية حبيبتي
ولا كلمة من سلسبيل من الحشمة
زفوها طوول لفوق… وكان الضي هارب عليهم بس أول ماوصل الموكب جاء الضي وتفائلوا بسلسبيل وقالوا وجه خير علينا .
..وأخيرا اتسكر الباب على علاء وسلسبيل
علاء وقف قدام سلسبيل ورفعلها طرحتها وباس على جبينها
علاء: وأخيرا نورتي مملگتگ يا ملكة ومبارك علينا
سلسبيل طبعا في عالم الحشمة و محمرة وبهمس :نورك...الله يبارك فيك…
المهم صلوا صلاتهم وتعشوا ومشت الليلة على خير گأي عرسان
•
•
•

في الصباح ناضوا العرسان على صوت ضرب في الباب وكانت ام علاء جايبة سفرة فطور العرسان...دخلتها وخشت
أم علاء:صباحية مباركة يا عرسان
علاء وسلسبيل:الله يبارك فيك
أم علاء:باش تنزلي بعدين لإن الناس بيجوا يبارگولگ
سلسبيل:إن شاء الله يا عمتي
ونزلت عمتهم وخلتهم…
طبعا هم فطروا وسلسبيل لمت السفرة وخشت المطبخ… وعلاء ع التلفزيون...شووي وجت سلسبيل وقمزت جنبه وقعدت تهدرز عليه باش يتعرفوا على أرواحهم أكثر…واهني سلسبيل زلت في سؤالها
سلسبيل:...
يتبع….

حبيباتي تعليقاتكم وتوقعاتكم عشان نستمر💕

كتابة: 🍂🌺 زබ‏ـرة ρـرزق...🖤👑
في أمان الله  🖤