زواجـ مشئوم

زواج مشئوم

زواجـ مشئوم

گتابة :🍂🌺 زබ‏ـرة ρـرزق...🖤👑
الفصل الثانـي...2

سلسبيل: هيا عمتي قولي...خلاص رانـي
العمة:والله يا بنتي عندي صاحبتي جارتهاا...ادور لولدها في عروس...وهو مطلق وعنده ولدين...والمواصفات يبي وحدة بيضاء...وطول جيتي إنتي في خاطري...هم الحق عيلة ماشاء الله وشگرتهم لياا...هاا شن رايگ؟
سلسبيل اتخلطت عليها الحكاية ومشاعرها اضربن خوف وفرح و اللحلم مر  من قدامهاا ومن صدمتهاا وقفت وحطت يديها على فمها وماعرفت شن تقول
العمة واخدت بيد سلسبيل وقعمزتهاا:راهو هذا زواج مش لعب...مسئولية ويبي عقل و تفكير...وأنا مش غاصبتگ على شيء...خودي راحتك وفكري في الموضوع…وأنا لإن راجل مطلق وإنتي مزال صغيرة فـ مانبيش نظلمگ الحق...
سلسبيل وهي متحشمة ومطبسة راسهاا:والله ياعمتي...الراي لبوي شن يقول...وإن شاء الله ربي يقدم يلي فييه الخير
العمة :إن شاء الله يابنتي...المهم إنتي تواا فگري گووويس وردي علياا...وربي يتمملك على خير...الحق عيلة مشكورة ومانبيگش اضيعيها عليك…
سلسبيل  سخنت وحالتها حالة : حاضر يا عمتي …
العمة :هي تو نوضي مع البنات...وردي بالك تجيبي سيرة لين يتم الموضوع

وناضت العمة طلعت ولحقتها سلسبيل...خشت على البنات في الدار وهي وجهها مايتفسرش...محمرة وملخبطة...قعمزت حداهن وقعدن يسألن فيها شن صاير...وهي في عالم ثااني مش معااهن بكل…

تفكر في الموضوع وفي مستقبلهاا المجهول و هل رح يوافق بوها أولا وو غيره من الأفكار...ترفع وتحط… وما اوعتش من الدوامة هذي إلا على صووت أختها إستبرق العالي
إستبرق :سلسبيييييييل...تي تحركي يابنت سااعة نكلم فيك معقولة...غير في شن سرحانة بس…
سلسبيل وهي خاطرها تخنقهاا:هااااه
إستبرق : خيرك شن فيه من لما خشيتي مش عاجبتيني الحق…
سلسبيل وهي نايضة :أففف مافي شيء خليني في حالي..استغفر الله..
وطلعت للمطبخ عشان تحط العشاء مع باقي البنات…
ومر الوقت ع العيلة بسرعة ومشي كله ضحك وهدرزة… إلين جاء وقت العشاء … وصبوا البناويت العشاء...يلي كان من تطييب سلسبيل وطلع بنته تهببل الكل قعد يشكر فييه..وتعشوا وغسلوا المواعين...وهم يغسلوا ومنشغلين...خشت عمتهم وسحبت سلسبيل من يدها لبرا...وكانت متوترة وشادة التلفون في يدها

العمة:تو كلمتني المرا وقالتلي جايين يخطبوك ويشوفوك
سلسبيل باستغراب: وعلاش مستعجلين اللطف!
العمة :مش عارفة...المهم تو عدي البسي عبايتك وأطلعي معااي

خششت سلسبيل بسسرعة قلبت عليها هذيكا العباية السوداء...وزبطت وشاحهاا ونظمت وضعهاا وطلعت بسسرعة تحت تساؤلات البنات وين ماشية مستعجلة؟

مشت مع عمتها للمربوعة وكان خوهاا باللإضافة لأم العريس وخاله في المربوعة…
خشت عليهم سلسبيل وهي مييتة حششمة وخاشة في بعضهاا...يادووب طلع منها السلام بالهمس
سلسبيل:السلام عليكم
ردوا كلهم:وعليكم السلام
سلمت سلسبيل وقعمزت وهي تفرك في يديها من التوتر
أم العريس(زهرة) وهي تشبح لسلسبيل وواضح إنها عجبتها :كيف حالك يا بنتي؟
سلسبيل:الحمدلله بخير… وإنتي؟
أم العريس: سلمها ياربي… الحمدلله
المهم قعدت تسأل فيها عن مواليدها وقرايتهاا وإلى آخره…
وشوي وطلبوا من العريس يخش يشوف البنت!
واهني سلسبيل قلبها قعد يدق قريب يطلع من صدرهاا أول ما حست بيه خش وسلم…
العريس:السلام عليكم
هي متحششمة بكل … لكن الفضول قاتلها تبي تشووفه...يادووب رفعة عيونهاا ولمحاتها وانعجبت بييه طوول يا كبدي...كان طوله وسط ولا بس سروال جينز أسود وقميص حني مخطط بالأسود...أبيض وعيونه عسليات وشعره مع لحيته ع البني...باختصار طرررف…وفوق هذا كله باين عليه صغير...واستغربت سلسبيل أمتى تزوج وطلق وووو...

ماقدرتش تحول عيونها من علييه…
قعمز ،وشافها،ابتسم هديكا الابتسامة
ارتبكت ونزلت راسها لوطة تحشمت من روحها...بدا هو يعرف عن نفسه…
العريس بابتسامة:اسمي علاء مواليد 96...نخدم أعمال حرة وبسيارتي...مطلق وعندي ولدين...ونسگن فوق حوش أهلي …
سلسبيل بصوت يادوب طلع: ب ب بالجودة...وأنا سلسبيل مواليد 98...متخرجة من الإعدادي…
وهگي مشت المقابلة على خير واتفقوا فيما بينهم.على الشروط...وعلى أساس بيستنوا ردهم…
طلعت سليبيل وهي طايرة من الفرح والكل عرف وفرح وبدوا يهنوا فيهاا ويدعوا ربي يكمل على خير...بس في حاجة نغصت...الأب ماكانش موافق على الموضوع بتاتا ومعارض…
اهني سلسبيل نهارت وقعدت تبكي...حست روحها تبيه واتعلقت بيه...ومستعدة تتحمل أي شيء...المهم تكون ليه ويكون ليها…
واستمروا في على هذا الحال يقنعوا في الأب...وتدخلوا حتى أعمامهاا في هذاا…
ومروا أسبوعين …
وفي يوم گانت سلسبيل في دارها...سارحة تخمم في مصيرهاا...مش عارفة روحها علاش هگي تعلقت بيه وتبيه...رغم إنها ماشافاته إلا في المقابلة...وتفكر كيف تقنع بوهاا...تنهدت وحطت يديها على قلبها وهي تدعي (أرح البال يارب...اللهم اختر لي ولا تخيرني)...وناضت توضت وصلت استخارة ودعت...وقرت قرآن...شووي وخش عليها خووها سعد...قعمز جنبها وحط يده على كتفها بحنية
سعد : سلسبيل سادك يلي اديري فيه...خلي كل شيء على ربي
سلسبيل: مافي حد حاس بياا..مافي حدد...على الأقل عطوني سبب مقنع للرفض...علاش هك بس علاش؟
سعد: لا حول ولا قوة إلا بالله...على العموم جاي نقولك بوي يبيك في الصالة لوطة…
استغربت سلسبيل...لإنها من يوم المقابلة ماعاش شافاته إلا مرات بسيطة...كل وقتها في دارها معتكفة

المهم لبست ملاية الصلاة وطلعت...وهي تدعي في سرها...إن شاء الله خير يارب…
خشت على بوها سلمت...وقعمزت جنبه وهي متحشمة وخانقتها العبرة … شافت لملامحه لعلها تعرف شن ردت فعله...لقت ملامحه هاادية ومش باين فيها شيء
الأب : والله يابنتي انا نبي مصلحتك أولا وأخيرا...ولا تعتقدي إني رايدلگ الشر...يا بنتي أنا شن حاجتي في الدنيا هذي غير نشوف السعادة في عيونكم...ومستعد نضحي بكل شيء باش نشوفها...أنا لو عارف إن الحاجة فيها مصلحتك مستحيل نتكاسل عن فعلها...و أنا مانبي نضرك ونتسرع...ومستعد نخليكن تخت جناحي لين نحصل يلي يستاهلكن وماني مفرط فيكن...وأنا طول الفترة يلي فاتت وأنا نسأل ونطمن و نجمع في معلمومات عليه...و…..
طبعا سليبيل كلام باتها أثر فيهاا بكل وحست روحها ظلماته واتسرعت وكانت منهارة وتبكي...بس الجملة الاخيرة يلي قالها باتها خلاها ترفع عيونها فييه وتحضنه بقووة وتبكي بالعبرة
•
•
•
يتبع…
في أمـان الله  🖤
گتابة:🍂🌺 زබ‏ـرة ρـرزق...🖤👑