نجوم الحب

1

.
.
.
.
.

يمه فدوة مااريد اتزوج اريد اداوم بالجامعه فدوة حاجيهم
..يمه انا بيدي اخوانج وابوج قررو وخلص والمتقدملج ابن صديق ابوج ومايگدر يرفضه ويزعله
..يمه ودوامييي
..ولج يمه هبة يادوام انتي تدرين ماعدنه بنات يدرسن اخواتج الاكبر منج تلاثتهن خلصن ابتدائية وكعدن وتزوجن الا انتي خلوج تكملين الاعداديه لأن الصغيرة والمدلله احمدي ربج واشكري والولد المتقدملج خوش رجال لايسمعون ابوج واخوانج هالحجي ويموتوج والله انتي تدرين عندج اخوان اثنين واكفينلج عظم بالبلعوم گوة متحملين دراستج لو لا ابوج
..سكتت مأيسة من كلام امي شبيدي اسوي على دراستي وماسويته شگد متنمنيه ادخل جامعه بعد مانجحت من السادس بس ماادري منين طلعلي هذا، مرت يومين واجو خالته للرجال وعمته واخته الجبيرة العرفته امه متوفيه طلعتلهم بعدما رتبت نفسي ...
تمت خطوبتنه بدون منشوف بعض العرفته اسمه عباس يشتغل عند ابو بسوبر ماركت ،بديت اتحمس لحياتي الجديدة اتخيل حياتي بوجود زوج واطفال وبيتي وحياة هادئة شكد حلوو، لگيت نفسي اتجهز بحماس وامي شافتني هيج هم كعدت تنصحني اصبر على زوجي واتحمله حتى اكون مرتاحه، عقدنه وتسجلت بأسمه شفته اخيرا رجال عادي متميز بضخامته الاستغربته ابد مباوع عليه ولا حاول يحاجيني رغم شكد جنت حابه نحجي ونتعرف على بعض، تقرر زواجنه بعد اسبوعين ركض ركض تم كلشي وتزوجنا جنت مثل أي عروس متوترة وفرحانه وخايفه .....
تم زواجنا بأسرع مايكون، جنت واكفه بالحمام ببالي افكار هوايه شنو الصار أشو ماحسيت مثل احساس البنات بهذي الليله دائما اسمع صديقاتي يضحكن ويگولن تنسين نفسج لساعات وتغيبين عن الدنيا تراودج اجمل احاسيس بيها، بس اني ماحسيت بأي شي مجرد ما اخذني وابتعد حسيته بااارد خالي من المشاعر، طردت كل فكرة من ببالي ولبست ..اووه هذي اول ليله اكيد لسه ممتعود الطريق طويل وراح يحبني بمرور الايام
الصبح اجوي اهلي واهلة يباركولنه واخيرا شفته مبتسم وياهم ويسولف اي لان ماسمعت صوته
يومين مرت وتفاجأت بيه بدل الصبح وطلع حتى مگال وين بقيت وحدي محتارة وين راح،
للغدة رجع واتلگيته بشوك ..ا هلا ا الله يساعدك
قابلني كالمعتاد ببرود..هلا، عافني وراح سبح وكعد بالصاله رحت حظرت الغده وتغدينه وهو ساكت، ارتاح ساعتين وطلع هم هالمرة گال راجع للشغل وراح..يعني الصبح جان بالشغل هم مو المفروض ياخذ عطلة زواج كم يوم، يلا ميخالف يمكن هو مايحب گعدة البيت
استمر الوضع بينه هيج. يطلع للشغل ويرجع لتلفونه اربعه وعشرين ساعه ملتهي بتلفونه مر اسبوع وصار يبات يومين برا البيت ويرجع هنا يوم مع الوقت متغير شي بيه بروود ميحجي شي بس جيبي هذا سوي ذاك ملابسي اكلي يتقربلي وكت ميعجبه تأدية واجب زين ليش هو بارد هيج ليش احسه مطايقني، والعكس صار اني اتعلقت بيه لان مااشوف احد غيره بالبيت ودائما اصفن افكر بيه ومن هالطريق حبيته حييل، اول شهر بعد زواجنه وصار عندي اعراض الحمل فرحت بداخلي وادعي كون حامل رحتله متوترة جان مدنگ بتلفونه
..احمم اا بس محتاجه اروح للمستشفى عادي تاخذني؟
جاوبني وهو مدنگ..اممم شتسوين
..اا تحليل
توقفت ايده وبعده مدنگ جاوبني..حامل؟
..شاكه
رجع التهى بتلفونه وهز راسه ..باجر الصبح اوديج
ثاني يوم رحنه حللت وطلعت حامل طرت من الفرحه بنفس الوقت خايفه ومتوترة شلون يصير عندي طفل شلون راح اربيه بس لالا اخليه بعيوني يممه حبيبي فدوة تروحلك امك،جان اسعد خبر بحياااتي كلها من گد الفرحه بجيت شعور الام حلو تحسين نفسج ملكتي الدنيا، الي ضوجني ردة فعل عباس وجهة خالي من المشاعر همس مبروك ويلا امشينه وبسسس...
اول العرفو بحملي عمي ابو عباس وجان عكس ابنه جانت فرحته لاتوصف يحمد ربه وسوة غده وعزم اهلي عليه ..
مرت ايامي وزدت حب وهيام لعباس ماعرف ليش حبيته واني اصلا ماشفت شي منه جنت اروح لأهلي واكعد ويه اخواتي يشكن من ازواجهن الي تكول عصبي ومايتحاجه وبس يغلط ويصيح والي تگول يضربني ويموتني بس رغم هذا جانن يرجعن يحجن بمشاعرهم المتبادلة لمن سألني جاوبتهن لا ابد ميمد ايده ولايصيح ولايغلط ابد هااادئ اسمع منهن عبارات الحسد شكد حلوو ..نيالج عليه..متنطينياه فد يومين،،،،،وغيرهاا اسكت موعارفه ارد اخجل اكول من يوم الي تزوجنا واحنه عايشين غرباء عن بعض
اشهر مرت والوضع نفسه ولدت بنوته جانت من اجمل ماتراه عيني ناعمه حييل وحمممره لو شنو اوصف لشعوري من شلتها اول مرة مينوصف تخيلت راح اشوفه فرحان بيها حاله حال باقي الاباء بأعتبار اول طفل اله بس الصدمني باسها وخلاها بحضني وابتعد يسولف ويه امي، ردت اسميها وگلت خاف هو يريد يسميها سألته ..شنو رأيك نسميها سوة؟
..باوعلي وگال اختاري الاسم انتي! بلحضتها دگ تلفونه وطلع عافني مذهولة هذا ليش هيج يعاملنه، معليه بيه المهم بنتي ماريد شي منه شنو يعني واذا ماسماها!! ابتسمت بوجه بنتي حبيلتي ياروح امج اسمج نجمة يا احلى نجمة بسماي،ماما شگد شكيتلها من معاملته جانت تگلي اصبري واكيد مهموم من شي انتي صيري نادرة وشاركي همومة!!!
مرت اشهر على ولادتي