نجوم الحب

6

.
.
.
.

سلمن علينه ويباوعن بتركيز على ماما وهي رحبت بيهن بهلا ومرحبا ومبتسمة بوجهن وعادي مرت عمو ندمجت ويانه بسرعه وصارت تسولف وتضحك

رحنه لبيت ام شيماء واستقبلتنه وطلعت سارة لابسه فستان كريمي ومكياج خفيف قدمت الضيافه و اني اضحك عليها وصلتلي وهمست ..اليوم تخدميني شوو هههههه
ابتسمتلي ساكته ماتگدر ترد هسة بس ادري بيها ماتنساها الي هههههه

فتحت الموضوع عمتي ..احنه جايين نطلب هالحلوة تصير بنيتنه اعتقد بسام انتم شايفينه وتعرفو ما امدحه لان ابن اخوي بس والله بسام رجال سبع ماكو مثله وام نجمة بالشهود تعرفه هي وتحجيلكم
هبة..لا بسام وردة مشهودله كلنه نعرفه وكفاته حلوة وسارة تستاهل رجال مثله اضمنلج تعيش براحه وياه

ام شيماء..والله ماكو داعي توصفونه الي ليش مامجربته اني شايفته و انطي لبسام و اني مغمضه بس اسمحولي اسأل ابوها وعمامها ويصير خير

بقينه منتظرين ردهم بعدها بأيام بدأ دوامنه كعدت الصبح لبست بنطرون اسود وقميص وردي وجاكيت اسود طويل وشال وردي ماما مجهزة الريوگ مع انه الصبح مااشتهي بس تجبرني گوة ، اكلت بسرعه لأن متأخرة ولاول مرة اجتي سارة جاهزة قبلي باوعت عليها من فوك لجوة جانت لابسه تنورة كلوش زيتوني تصير فوگ القميص وحزام عريض عليها والقميص ابيض والشال زيتوني طالعه تجنن ،عاابت شهالجمال ؟

..هههههههه انتي الاجمل قلبي، مگلتيلي شلون نعرفه السايق
..اوووي ،بسام گال هو يعرف بيتنه جاي مرة لهنا ويه بسام
سمعنه صوت هورن وطلعنه نركض ماما تصيح شويه شويه عييب ولجن خففنه مشي وطلعنه

جانت سيارة ستاريكس صعدت سارة و اني وراهة سلمت وكعدت بدون ما اباوع سارة وراي كاعدة لذلك دايرة وجهي الها ونسولف لمن وصلنه و نزلنه مستعجلين ..ياا اكلج شلون نعرف السايق اني ماشفت شكله
سارة..دمشي اني شفته

..دخلنه للجامعه نباوع مبهورين احنه منغلقين ع العالم لذلك كانت علامات الذهول بوجهنا اللبس والمكياج اوڤر وسارة تگلي..هاا شفتي حتى بعد ماتقلدين علية

..لا عمي ستر الله عليج انتي ملايه قليل بحقج، افترقنا كلمن لقسمها و اني انخبصت خوف وتوتر گعدت بالقاعه ع الاستيج وشغلت نفسي اشخبط، حسيت صوت بنات يمي يحجن وياي درت وجهي عليهن
..هلوو صار ساعه صافنه ههههههه بعدنه بسم الله

نجمة..ههههه لا متوترة شوي تعرفن اول يوم وكذا
..اي والله حقج اني بطني توجعني من اجيت ولسة، اني منار
..و اني حلا
..اهلا تشرفنا اني نجمة

حلا..وااو فدوة اسمج يجنن عاشت الاسامي
..تسلمين انتي الحلا كله
،تقريبا انسجمت وياهن شويه شويه وخففن عني التوتر بدو الاساتذة محاظرات اول يوم بس تعارف وحجي ياترى سارة شوضعها اففف افتقدتج مااعرف اداوم بدونج خنگتي العبره مدري ليش بس حسيت اشتاقيتلها.
منار..ها خير شبيج ضجتي