شهد انا م متحرك من محلي دهه مالم تطلعي انا ضروري محتاج اتكلم معاك اسي وفي اللحظه دي ي شهد،بقيت اعاين لي امي وانا ساكته م قادرة اتكلم
سكتت مسااافه حتى قلته ليهو صعبه شديد والله ماف طريقهه يلا تصبح على خير وقفلتهه الخط بسرعهه،امي قالت لي بي لهفهه كدة خير مالو كويس؟قولته ليها كويس،بقت تعاين لي بإستفهام كدة،قلته ليها م عندو موضوع ساي بسأل عن البدلهه اذا في طريقه تتوفر منها لي اصحابو بكرة تكون على نفس الديزاين وكدة،قالت لي قطع قلبي عليك الله دة زمن بتصلو فيهو عشان يسأل سؤال زي دة الولد المجنون دهه،انا قُلت الا كان حاصلهه ليهو مصيبه من مصايب الدنيا ديل الله يحفظو ويغطي عليهو،قامت ماشه رجعت قالت لي وانتي البدله وديتيها ليهو متين مش المغرب دة كانت قاعدالبيت؟ طبعاً بقيت بفتش لي جواب بعد مسافه قلته ليها طلبته بتاع توصيل جاني بعد اذا العشاء قدام البيت هنا اديتها ليهو يوصلها،
قالت لي شنووو؟اديتيها لبتاع توصيل؟كان شالها ومشى انتي الضمنك شنو؟
طبعاً انا عايزة ابكي وم قادرة فجأة دموعي جات جاريه مسحتها بسرعه ولفيت وشي على الحيطه،
امي انتبهت لي اني ببكي،قالت لي ي بت مالك بتبكي؟
سكتت
قعدت جمبي في السرير السرير قالت لي ي بت شهد بتكلم معاك انا ،عايزة اغطي وشي مسكت مني الغطى قالت لي من متين بتدسي مني شي؟متشاكله مع ماهر ولا شنو؟
هزيت ليها راسي بمعنى لا،
قالت لي اكيد متشاكله معاهو اصلو إتصالو زي الزمن دة م ساي مالك معاهو الولد العريس ي بتي،قلته ليها ي امي قلته ليك ماف شي والله،
قالت لي سمح بتبكي مالك؟
قلته ليها مُصدعهه بس،
قالت لي دة م بكى صُداع تحكي لي ولا ارجع لي ماهر اخليهو يحكي لي؟
بقيت اعاين ليها،عايزة تشيل التلفون فجأة سمعنا صوت حركه برة في البيت،بقينا نعاين لبعض احساس في خوفه وكدة،
امي مشت على باب الغرفه طلعت راسها وقالت:مُنذر؟!
قال ليها نعم ي امي
قالت ليهو انت ي ولد انا مش قُلته ليك تجي داخل البيت بدري؟انا والله تاني اقفل منك البيت دة الا كان تنوم في الشارع عشان قله ادبك دي،
ضحك وجا وقف جمب الغرفه وضحك قال ليها حكومهه يااا عارفك بتعمليها بس اهون عليك انوم مع الكلاب برة؟قالت ليهو انت زاتك م كلب زيهم الكلاب زاتها بتتلمى على بيوتها مع البرد دة،
جا داخل الغرفه قال ليها خلاص ي حكومه اخر مرهه،
قالت ليهو اخر مرهه دي من كُتر م قلتها قربت تفقع مرارتي انت ي ولد م ناوي تبطل تباري الفارغهه دي؟اصحاب السجم المباريهم ديل بغطسو حجرك بالمصايب البشربوها ديك،
قال ليها ي حجهه مصايب شنو حمانا الله ياخ والله السجاير زاتو الواحد بشربها مرة مرة،وبعدين مالكم مساهرين للزمن دة انتو الليله؟منتظرني يعني ولا شنو؟
شهد عندك حجات جبتها ليك دخلتها التلاجه و..
سكت وبقى يعاين لي،قال لي مالك؟
م رديت عليهو،
قال لي امي دي مالها بتبكي؟
قالت ليهو انا زاتي صاحيه للزمن دة عشان اعرف إجابه السؤال دهه؟!
جا قعد جمبي قال لي مالك في شنو ؟هزيت ليهو راسي وقلته ليهو ماف شي،قال لي عايني م تقولي لي ماف شي بي وشكك دة،في زول زعلك؟اتشاكلتي او اتناقشتي مع امي؟
امي قالت ليهو بري يطرشني كان اتكلمته معاها كلمه،
غطيت وشي بي يدي وبقيت ابكي ،امي ومنذر بقو يعاينو لبعض،منذر قال لي انا بتكلم معاك حاول ينزل يدي من وشي زحيتهم منو،جراني وضماني عليهو وقال لي بصوت ملهوف في شنو ي زولهه انا مش اخوك احكي لي المضايقك شنو؟الحيوان دة تاني رجع يعمل حركات و يضايقكك؟لو رجع يضايقك كلميني عشان اتصرف معاهو،فضلتهه ببكي مسافهه وهو بطبطب علي،قال لي اتكلمي ي شهد قولي لي في شنو رجع تاني لي أمورو ديك ولا زول من اهلو حاول يضايقك؟رفع راسي من كتفو ومسك يدي وبقى يعاين لي،قلته ليهو ماف شي ي منذر انا بس مصدعهه،امي قالت لي من متين بتبكى للصداع كدة ي بت؟
منذر قال لي وتاني؟واضح انو م بكى صداع!؟
بعد مسافه قلته ليهو ومشتاقهه لي بابا،مشتاقهه ليهو شديد ،كان بجيني في الحلم وبتكلم معي واسي ،رغم إني قاعدة أصلي وبدعي ليهو كتير بس بقى م بجيني في الحلم نهائي 😭💔
امي قعدت في السرير التاني وبقت خاته يدها في وشها💔
منذر رجع ضماني عليهو وهو ساكت وانا بقيت ببكي شديد كل البكى الجواي رغم اختلاف اسبابو بكيتو اللحظه ديك،امي زاتها بقت تبكي ومنذر كمان،بعد اكتر من 10 دقايق رفع لي راسي وقال لي كفى حاولي نومي بعد كدة تمام؟يلا ي أمي انتي زاتك السهر م كويس معاك يلا،رقدتهه وإتغطيت وهم طلعو شويه كدة باب غرفتي فتح وسمعت منذر بقول لي شهد!؟
رفعته راسي لقيتو جايب لي مويه في كُبايهه وحبوب في يدو،قال لي هاك ابلعي الحبه و اشربي،مسكته الكبايه شربه بسيط منها وبلعته الحبه،سكتت مسافه حتى قال لي كلنا م اتجاوزنا وفاة ابوي ولا حنقدر نتجاوزها ي شهد ابداً وفاة ابوي كسرت ضهرنا كلنا حتى نحن الرجال م انتي بس لكن ي شهد كمان نحن قدامنا في امي م عايزين نخسرها هي كمان انتي عارفه عانت قدر شنو بعد وفاة ابوي وعارفه صحتها شويه م تمام ف عشان امي بس نحن لازم نتماسك صح؟هزيت ليهو راسي بمعنى ايوة،قال لي نحن اخوانك كلنا قاعدين صح يمكن م نملى فراغ ابوي بس بنعمل كل البطلع بيدنا عشان م نحسسكك بالفراغ دة،قلته ليهو عارفه كدة ي مُنذر،😭💛قال لي طيب اطلعي من دور الدراما كوين الانتي داخله فيهو دة وعندي بنطلون وقميص عليك الله بكرة لو صحيتي بدري اكويهم لي معاك،بقيت اعاين ليهو بغيييظ،
ضحك قال لي مالك؟والله جبته ليك شاورما زاااااابطهه شديد ولا فاضيه لشاورما انس زاتو اعتبريها رشوة وجازفي لي المكوة دي😂💔قلته ليهو انقلع من وشي ياخ والله اكورك لي امي😭💔ضربني في راسي وضحك وقال لي اصحى اللقاهم جاهزين بالله🌚
اليوم دة اصلي م نمت وفضلته صاحيه وبفكر في ماهر كان عايزني لشنو بعد الحصل دة؟وحيقول لي شنو يعني كان؟مستحيل يتعامل مع الموضوع بطريقهه طبيعيهه ابداً كدة ماهر وانا بعرفو 😭💔
