انا من الكائنات البيتوتيهه جداً م اتعودته اطلع مكان براي ولا اتعامل مع المجتمع الحوالي زي باقي الناس حتى ابسط طلعاتي كنت بطلعها مع ماما حتى صحباتي هم البجوني في البيت بس انا لا م بعرف ابداً وللسبب دة م بعرف اتعامل مع العالم الخارجي ابداً الحصل معي اليوم كان اسوأ حاجه عدة علي كان اليوم دة،يعني احساس انو زول يتجاوز حدودو معاك ويمد يدو عليك وم تقدر تدافع عن نفسك دة ماف اسوأ منو،المجتمع برة سيئ شديد والناس ابداً نفوسها م نضيفه الخلعه الدخلت فيني حتى وانا في حضن امي م قادرة اتجاوزها،وم قدرت احكي لي ماما شي نسبه لي انو الموضوع حيكبر وبابا لو عرف حاجه زي دي عادي ممكن يحرق الشركه بالفيها💔اخترت اني اتكتم على الموضوع...
...
وانا سايق وم شايف قدامي حتى فجاة جاتني مكالمه رفعته التلفون لقيتها امي،كنصلته المكالمه تاني رجعت اتصلت وبقت مكرراها فتحته الخط وقلته ليها "لحق يستنجد بيك؟قالت لي ماهر في شنو انت م داير تخلي جنك وعصبيتك وتصرفاتك المتهورة دي ي ولد؟متين حتعقل متين؟
قلته ليها انتي بتتكلمي معي انا عن العقل؟طيب م تتكلمي مع الباطل حقك دة عن العقل وخليه يحترم شيبتو دي ويرجل شويه بس،قالت لي مالك في شنو احكي لي الحاصل شنو؟قلته ليها بتسأليني انا عن الحاصل؟اسأليهو هو زي م قدر يتصل عليك خليه يقدر يوريك هو عمل شنو؟هنا في اللحظه دي صدمتني وقالت لي انا م ولدته بني ادم انا ولدتهه ذنوبي تعبتوني وكرهتوني حياتي م قادرة اعيش حياتي صح بسببكم اعمل ليكم شنو يعني انا في الدنيا دي؟نجضتني ي ماهر انت واخوك اريتني لو عقرته وم جبتكم م كفايه علي ابوكم الرملني وانا جاهله في دنيتي دي داير تعمل نفس العملو ابوك انت كمان؟والله اولاد الغريبه بقول لي احسن واحن منكم علي ،واسمع كلامي لو قربته على معتصم دة ولا خدشتو خدشه بس بي ضفرك انا متبريه منك ي ماهر ليوم الدين وم معافيه ليك لا دنيا ولا اخرة يعني الزول الوحيد الوقف فيك وكبرك وعمل ليك الما عملو ليك ابوك دي جزاتو؟والله صحي ربي الغايبه للجايبهه المهم انا بقولها ليك تاني كان قربته منو ضفرك ساي لا ولدي لا بعرفك ونتلاقى يوم الوقف العظيم،انا بسمع في الكلام وم مستوعب في ام بتقول لي جناها كدة؟في ام بتقيف مع راجلها ضد جناها؟قلته ليها لمتين حتفضلي كدة انتي؟لمتين حتفضلي تساومينا بعفوك؟قدمتي لينا شنو انتي وراجلك غير الضرب والعذاب والمعامله السيئه؟انتي حاسبه نفسك معرسه راجل مع الرجال؟قالت لي دة عمك من لحمك ودمك قبل م يكون راجلي،قلته ليها لو لحمي من لحمو اريتني لو اتخلقته كلب واسي ارجعي ليهو كلميهو لو عايز يعيش باقي ايامو الفاضله ليهو دي في الشركه م يخت رجلو وحتى انتي ي امي م بتشفعي ليهو عندي فهمتي م بتشفعي ليهو ابداً...
بعد المكالمه دي بقيت حاسي بنفسي م شايف قدامي ابداً،راسي حيتفجر والشارع قدامي طشاش طشاش،الناس الطبيعين بعيشو حياتهم بالطول والعرض في معاناة بس يد امهم هي اليد البطبطب عليهم وبتكون هينه ولينه عليهم وبتعمل كل شي عشان بتهون عليهم تعب الحياة ومعاناتها الا نحن نصيبنا من الحياة ام كل لحظه تعدي عليك معاها بتخليك تتمنى لو انك جيت يتيم في الدنيا ،نحن اصلاً متيتمين حتى في وجودها م عندها اي تأثير امومه في حياتها بتعاملنا على اساس انو نحن الجانب السيء في حياتها،انا م ضد حياتي انا ضد الواقع السيء الاتفرض علي اعيشو،تخيل تكون في يدك كل شي وعندك صلاحيه تعيش حياتك بالطول والعرض بالطريقه الانت عايشها بس الضلمه الفي حياتك تكون مسيطرهه عليك اكتر من كل شي،في.يدك كل وسائل السعادة وانت م قادر تسعد روحك حتى ،تخيل يكون اقصى طموحاتك يكون بصيص امل بسيط يقول ليك انو دي حياة ممكن تتعاش،تخيل انك تكون لا قادر تتعايش مع وضعك ولا قتدر تتغلب عليه،حتى اخصائين السايكو م نجحو في انهم يحلو ولو جزء من مشكلتك...💔
