مذاق الحرمان

الحلقة 7

#مذاق_الحرمان

للكاتبه #لبنى_الموسوي

بعد ما حچيت ويا عمار گدرت ارجع اوگف على رجلي بس مو هذيچ عسل القديمه
صرت اروح للدوام وارجع احبس نفسي بغرفتي اقره لحد ميجي الليل وانام وهيچ مرت الايام

فد مره العصر چنت گاعده بغرفتي اختنگت كلش صارلي قريب الـ ١٠ ايام مسامعه صوته ولا اعرف شلونه وشديسوي بغيابي وحتى مچنت اتجرأ اسأل خيال عنه حتى لا احن بس النتيجه اضحك على نفسي لأن بكل دقيقه وكل ثانيه اشتاقله واحنله

نفضت الافكار من راسي ورجعت للدراسه هي الشي الوحيد الينسيني همومي
باوعت للمسأله بيها نقص واني ناقلتها من مها من چنت غايبه : شلون يربي هاي البنيه لشوكت تظل شلولو حتى مسأله مثل الاوادم متعرف تنقل من السبوره

گمت لغرفة خيال حتى اخابر مها بس ما لگيتها باوعت للميز شفت موبايلها موجود اني اعرف الرمز فـ فتحته ودخلت ع الوتساب چان يصير رقم عمار گدامي بالمحادثات يعني ديحچي ويا خيال واخير مره مراسلها اليوم

گلبت بالرسائل هواي واغلبها يسأل عليه وعلى دراستي بس اخيرها خيال كاتبتله

💌 عمار كافي عسل رجعت الدراستها والحياتها صح مو مثل قبل بس الايام تقوي وتنسي اترجاك اگطع الأمل وعوفها

💌 ما اگدر خيال والله ما اگدر

💌 لا تگدر ع الاقل لخاطرها ليش تريد تهدم مستقبلها واحلامها بـ أنانيتك
اهلي رافضيك رفض قطعي يعني مستحيل تصيرون البعض إلا اذا عاندتهم واعرف اختي متگدر تعاند اهلي بالخصوص ابويه لأن تحبه

💌 شنو المطلوب مني هسه

💌 انسحب عمار
انسحب من حياة عسل للأبد وخليها تنساك
ادري بيك تريد تحاچيها بأي شكل من الاشكال والشي الوحيد المانعك عنها ما عدها جهاز بس هالشي مو صح لازم تبعد حتى تنساك وترجع هذيچ عسل ام ضحكة الحلوه وروح المرحه

💌 هي نستني لو تتذكرني ؟؟ الله عليچ گولي الحقيقه

💌 مو بسهوله تنسى بس لابد تنسى النسيان نعمه من رب العالمين

💌 ماشي خيال راح ادوس على گلبي واعوفها بس ادعيلي الله يصبرني واگدر اقاوم حتى امنع نفسي عنها

💌 الله يكون بعونك وعونها

وراها ما رد عليها ولا راسلها بعد
انتبهت للموبايل انترس من دموعي الما حسيت شوكت وشلون نزلت وما شفت نفسي إلا واني اخابره

عمار.. ها خيال خير

عسل.. ها عمار

عمار.. عسل هاي انتي
شلونچ بالي يمچ والله العظيم

عسل.. الحمد لله على كل حال انت شلونك

عمار.. برحمة الله

عسل.. شتاقيتلك عمار