حملات التسقيط ضد الكاتبات كثرانه هاي الايام بشكل مو طبيعي وبالتأكيد اني كان الي نصيب واسع من هالحملات بمختلف مواقع التواصل الاجتماعي
لفت انتباهي تعليق على منشور نزلته وحده من البنات بگروب قصص لكاتبه معروفه وچان المنشور عن قصة مياس قلب الشهم شنو موضوعها لأن اريد اقراها
احدى البنات علقت بهذا التعليق 👇🏻
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
حبيبتي صاحبة التعليق اني شخطت على اسمچ وصورتچ لأن هدفي اخذ رأيي البنات بكلامچ يجوز اني غلطانه وانتي صح
اني اجرر بلاحداث اريد وحده تأيدها وتگول مذاق الحرمان عباره عن مماطله بلاحداث وماكو شي جديد !!!!
يعني قسماً بذات الله من گد ما اكو زخم بلاحداث من يمي تعبت والبعض تعجبوا وگالوا ولا الافلام الهنديه وهسه انتي تگولين مماطله بلاحداث
يعني مياس ومذاق الحرمان صارت عباره عن جرجره وتطويل بدون داعي والمفروض مني اشوف هيچ تعليقات واتغاضى مو صح ؟!!
كلش زين اعرف وين تردون توصلون من هالكلام الاغلبيه تعجبكم سوالف الحب والاحضان وميصرفلكم 49 بارت بس مشاكل للأسف مو بس المراهقات بل حتى الكبار گاموا يقرون القصص علمود هالسوالف ومبتعدين كل البعد عن العبر والمواعظ اليستمدونها من اخطاء غيرهم
اترجاكم لحد يگلي ليش تردين وليش تبررين وانتي اكبر من هالشي لا والف لا هذا تعبي سهري كتابتي البس الله يعلم شگد تاخذ مني وقت وجهد حتى توصللكم بهذي الصوره
ما اعترض اذا متعجبكم القصه واكو هواي تعليقات بالمنشور الحچيتلكم عنه منتقصين من قصة مياس
عادي كلش عادي لأن لو تساوت الاذواق لبارت السلع والقصه مچان وصلت لهذا النجاح اذا مچانت معبره بس مال تجي وحده وتتهمني گدام الاف المتابعات بأني اجرر واطول بلاحداث هنا ما اگدر اسكت لأن مو الكل يعرفني ولا الكل قاري قصصي فمن يقرا هيچ تعليق راح ينتقدني مقدماً ويصدر الحكم عليه من خلال كلامچ وكلام غيرچ
ابطال قصصي موجودين هنا ويشهدون على كلامي من تجي البطله وتسردلي ماكو على لساني غير اختصري عبري مو مهم ماله داعي حتى مرات يضوجون بس اشرحلهم بالنهايه هدفي مو حشو سطور وانما اخذ محتوى مفيد من بين هاي السطور
يمكن حچيت هواي بس شسوي من حرگت كلبي كان الله في عون الرسول شلون تحمل بني قريش في ذاك الزمن يعني فعلاً شي يذبح لمن تقدم الخير وتتجازه بالشر
قصصي ما اخذ عليهن مقابل مجرد هوايه استسمتع بالعطاء من خلالها بس بنفس الوقت احب اشوف ثمرة تعبي بالكلام الطيب لأن (الكلمه الطيبه صدقه)
عموماً اليوم چنت كلش مريضه حشيت سني والوجع ديضرب براسي حالياً وكملت ويايه من شفت اكثر من تعليق سلبي لغرض مجهول او معلوم لكن لهدف خبيث !!!!
احاول باچر اكتبلكم بارت بس اتمنى تعذروني لو كان قصير لأن يشهد الله الوجع الحاملته حالياً مينوصف وما اعرف راح يستمر باچر لو الله يرحمني ويخلصني منه
